উচ্চতম ন্যায়ালয়ে কেৱল বিভিন্ন গোচৰৰ শুনানিয়েই নকৰে, বৰং আইন আৰু সংবিধানৰ অধীনত গুৰুত্বপূৰ্ণ বিষয়সমূহৰ পৰ্যালোচনাও কৰে। এনে এক গুৰুত্বপূৰ্ণ গোচৰত দেশৰ সৰ্বোচ্চ ন্যায়ালয়ে পথ দুৰ্ঘটনাৰ বলি হোৱা এগৰাকী মহিলাৰ ক্ষতিপূৰণ নিৰ্ধাৰণৰ ক্ষেত্ৰত এক ঐতিহাসিক ৰায় প্ৰদান কৰিছে।
এজন ব্যক্তিৰ পত্নীৰ পথ দুৰ্ঘটনাত মৃত্যু হোৱা গোচৰত উচ্চতম ন্যায়ালয়ে এক ঐতিহাসিক ৰায়দান কৰি কৈছে যে-গৃহিণীসকলেও ৰাষ্ট্ৰ নিৰ্মাণত সমানভাৱে অৱদান আগবঢ়ায়। সৰ্বোচ্চ ন্যায়ালয়ে লগতে মন্তব্য কৰে যে -তেওঁলোকৰ ঘৰুৱা কাম কৰাৰ উপৰিও পৰিয়ালটোকো সমানেই সঠিককৈ পৰিচালনা কৰে, গতিকে এই সেৱাৰ ন্যূনতম মূল্য প্ৰতিমাহে ৩০ হাজাৰ টকা হোৱা উচিত।
আদালতৰ মন্তব্য
এই ঐতিহাসিক ৰায়ত আদালতে স্পষ্টভাৱে উল্লেখ কৰিছে যে গৃহিণীসকলৰ ঘৰুৱা কাম-কাজ আৰু পৰিয়ালৰ সদস্যসকলৰ প্ৰতি যত্ন লোৱাটো ৰাষ্ট্ৰ গঠন আৰু সমাজ বিকাশৰ ক্ষেত্ৰত এক গুৰুত্বপূৰ্ণ অৱদান। সেয়েহে পথ দুৰ্ঘটনাত তেওঁলোকৰ মৃ*ত্যু বা চিৰদিনৰ বাবে শাৰীৰিকভাৱে অক্ষম হোৱাৰ ফলত পৰিয়ালৰ যি ক্ষতি হয়, তাক প্ৰকৃতাৰ্থত কোনোভাৱেই পূৰাব নোৱাৰি। ন্যায়াধীশ সঞ্জয় কৰোল আৰু এন কোটিছৰ সিংহৰ বিচাৰপীঠে এক পথ দুৰ্ঘটনাৰ ক্ষতিপূৰণ গোচৰৰ শুনানিৰ সময়ত এই গুৰুত্বপূৰ্ণ ৰায় প্ৰদান কৰে। আদালতে কয় যে গৃহিণীৰ অৱদান কেৱল ঘৰৰ চাৰি বেৰৰ মাজতে সীমাবদ্ধ নহয়। তেওঁলোকে ভৱিষ্যৎ প্ৰজন্ম গঢ়ি তোলা, সন্তানৰ লালন-পালন, পৰিয়ালৰ কল্যাণ আৰু সমাজৰ উন্নয়নত গুৰুত্বপূৰ্ণ ভূমিকা পালন কৰে। সেইবাবে তেওঁলোকক ‘ৰাষ্ট্ৰ নিৰ্মাতা’ হিচাপে যথোপযুক্ত স্বীকৃতি দিয়া উচিত।
আদালতে স্পষ্ট কৰি দিয়ে যে ‘ঘৰুৱা যত্নৰ ক্ষতি’ (Loss of Domestic Care) এতিয়াৰ পৰা পথৰ দুৰ্ঘটনা ক্ষতিপূৰণ অতিৰিক্ত দাবী হিচাপে গণ্য কৰা হ’ব।
কি গোচৰৰ ভিত্তিত আদালতৰ এই যুগান্তকাৰী ৰায়?
এই ৰায় পাঞ্জাবৰ এটা পথ দুৰ্ঘটনা গোচৰৰ সৈতে জড়িত। ২০০১ চনত ৰেশমা নামৰ এগৰাকী মহিলাৰ পথ দুৰ্ঘটনাত মৃত্যু হৈছিল। এই সন্দৰ্ভত তেওঁৰ স্বামী আৰু তিনি সন্তানে ক্ষতিপূৰণ দাবীৰে আদালতত গোচৰ দাখিল কৰিছিল। কিন্তু দুখজনকভাৱে এই গোচৰটো দুটা দশকৰো অধিক সময় বিভিন্ন আদালতত অমীমাংসিত হৈ আছিল। এই বিষয়ত উদ্বেগ প্ৰকাশ কৰি উচ্চতম ন্যায়ালয়ে কয় যে পথ দুৰ্ঘটনা ক্ষতিপূৰণ সম্পৰ্কীয় গোচৰসমূহ সাধাৰণতে এবছৰৰ ভিতৰতে নিষ্পত্তি হোৱা উচিত। আদালতে দেশৰ সকলো উচ্চ ন্যায়ালয়ৰ মুখ্য ন্যায়াধীশসকলক এনে গোচৰসমূহৰ ক্ষিপ্ৰতাৰে নিষ্পত্তি কৰিবলৈ প্ৰয়োজনীয় প্ৰশাসনিক নিৰ্দেশনা জাৰি কৰাৰ আহ্বান জনায়।
ঘৰুৱা কামৰো আৰ্থিক মূল্য আছে
আদালতে পূৰ্বৰ কেইবাটাও ৰায়ৰ কথা উল্লেখ কৰি কয় যে-ঘৰুৱা কাম-কাজৰো এক স্পষ্ট আৰ্থিক মূল্য আছে, যদিও তাৰ বিপৰীতে কোনো প্ৰত্যক্ষ দৰমহা বা পাৰিশ্ৰমিক প্ৰদান কৰা নহয়। আইন বিশেষজ্ঞসকলৰ মতে, এই ঐতিহাসিক ৰায়ে সমগ্ৰ দেশৰ পথ দুৰ্ঘটনাৰ ক্ষতিপূৰণৰ গোচৰসমূহত সুদূৰপ্ৰসাৰী প্ৰভাৱ পেলাব। বিশেষকৈ গৃহিণীৰ মৃত্যু সম্পৰ্কীয় গোচৰসমূহত ক্ষতিপূৰণৰ পৰিমাণ লক্ষণীয়ভাৱে বৃদ্ধি পাব পাৰে। একেদৰে, আদালতৰ এই সিদ্ধান্তক এক যুগান্তকাৰী পদক্ষেপ বুলিও গণ্য কৰিব পাৰি।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
