পাকিস্তান অধিকৃত কাশ্মীৰ (PoK)ত পাকিস্তান সেনাৰ এখন MI-17 হেলিকপ্টাৰ দুৰ্ঘটনাগ্ৰস্ত হয়। মুজাফ্ফৰাবাদৰ সমীপৰ পৰা উৰণ আৰম্ভ কৰাৰ কিছু সময়ৰ পাছতেই সংঘটিত হয় এই দুৰ্ঘটনা। দুৰ্ঘটনাত হেলিকপ্টাৰখনত থকা আটাইকেইগৰাকী নিৰাপত্তাৰক্ষীৰ মৃ*ত্যু হোৱা বুলি জানিব পোৱা গৈছে। অৱশ্যে পাক সেনাই এই পৰ্যন্ত হেলিকপ্টাৰখনত মুঠ কিমানজন লোক আছিল সেই বিষয়ে আনুষ্ঠানিকভাৱে জনোৱা নাই।
খবৰ অনুসৰি, PoK-ৰ নীলম উপত্যকা যোৱাৰ সময়তে এই দুৰ্ঘটনা সংঘটিত হয়। উল্লেখ্য যে বিগত কিছু দিনৰ পৰা নীলম উপত্যকাত বিধানসভাৰ ১২খন আসন সংৰক্ষিত কৰাক লৈ উত্তেজনাময় পৰিস্থিতিৰ সৃষ্টি হৈ আছে। পৰিস্থিতি নিয়ন্ত্ৰণৰ বাবে চৰকাৰে অঞ্চলটোত অতিৰিক্ত সৈন্য মোতায়েন কৰি আছে।
মুজাফ্ফৰাবাদৰ পৰা যাত্ৰা আৰম্ভ কৰাৰ পিছতেই হেলিকপ্টাৰখনত কাৰিকৰী বিজুতি দেখা দিয়ে। পাইলটে জৰুৰী অৱতৰণৰ চেষ্টা চলাই যদিও হেলিকপ্টাৰখন সুৰক্ষিতভাৱে অৱতৰণ কৰাবলৈ সক্ষম নহ’ল। ইতিমধ্যে পাকিস্তান সেনাই এই দুৰ্ঘটনাৰ তদন্তৰ নিৰ্দেশ দিছে। পাকিস্তান সেনাৰ মুৰব্বী আছিম মুনীৰকে ধৰি সেনাৰ সকলো বিষয়া আৰু জোৱানে এই ঘটনাত গভীৰ শোক প্ৰকাশ কৰি নিহতসকলৰ পৰিয়ালবৰ্গলৈ সমবেদনা জ্ঞাপন কৰিছে।
পাকিস্তানৰ ৰাষ্ট্ৰপতি আছিফ আলী জাৰদাৰী আৰু প্ৰধানমন্ত্ৰী শ্বাহবাজ শ্বৰীফেও এই হেলিকপ্টাৰ দুৰ্ঘটনাত শোক প্ৰকাশ কৰে। এই দুৰ্ঘটনা এনে এক সময়ত সংঘটিত হৈছে যেতিয়া মুজাফ্ফৰাবাদ আৰু ইয়াৰ পাৰ্শ্বৱৰ্তী অঞ্চলসমূহত নিৰাপত্তা ব্যৱস্থা যথেষ্ট কটকটীয়া কৰি তোলা হৈছে। শেহতীয়াকৈ তাত বৃহৎ সংখ্যক নিৰাপত্তাৰক্ষী মোতায়েন কৰা হৈছিল। বিধানসভাত ১২খনকৈ আসন সংৰক্ষণ কৰাক লৈ অঞ্চলটোত বিগত কিছুদিন ধৰি অব্যাহত আছে তীব্ৰ প্ৰতিবাদ। এই প্ৰতিবাদত এই পৰ্যন্ত আৰক্ষী-নিৰাপত্তাৰক্ষীকে ধৰি নি*হত হৈছে অৰ্ধশতাধিক লোক।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
