আজিৰে পৰা আৰম্ভ হ’বলগীয়া FIFA বিশ্বকাপক লৈ সমগ্ৰ বিশ্বৰ ফুটবলপ্ৰেমীসকলৰ মাজত ব্যাপক উৎসাহ দেখা গৈছে। এই উৎসাহৰ মাজতেই ইংলেণ্ডৰ পিটাৰব’ৰ’ চহৰৰ ৬০ বছৰীয়া নেথান ৰিচাৰ্ডছনে নিজৰ পৰিয়ালসহ টৰণ্ট’ ভ্ৰমণৰ বাবে প্ৰস্তুতি সম্পূৰ্ণ কৰিছে। ৰিচাৰ্ডছনে এই ভ্ৰমণৰ বাবে প্ৰায় ১০,০০০ ডলাৰ অৰ্থাৎ ৭.৩ লাখ টকা ব্যয় কৰিও এই পৰ্যন্ত লাভ কৰা নাই এখনো খেলৰ টিকট। নিজৰ ৬০ বছৰীয়া জন্মদিনটো স্মৰণীয় কৰি ৰাখিবলৈ নেথান ৰিচাৰ্ডছনে পত্নী আৰু তিনিজন পুত্ৰক লগত লৈ ২১ জুনৰ পৰা ২৭ জুনলৈ টৰণ্ট’তে থাকিব। বিমানৰ ভাৰা, থকা-খোৱাৰ ব্যৱস্থা আৰু আন আন খৰচ মিলাই ইতিমধ্যে ৰিচাৰ্ডছনৰ প্ৰায় ১০,০০০ ডলাৰ ব্যয় হৈছে। তথাপিও তেওঁলোকৰ পৰিয়ালে কানাডাৰ টৰণ্ট’ত অনুষ্ঠিত হ’বলগীয়া বিশ্বকাপ খেলসমূহৰ এখনো টিকট ক্ৰয় কৰিবলৈ সক্ষম হোৱা নাই। অৱশ্যে তেওঁলোক নিৰাশাবাদী নহয়, কিবাকৈ এখন হলেও খেলৰ টিকট লাভ কৰে নেকি তাৰেই প্ৰচেষ্টা অব্যাহত ৰাখিছে দলটোৱে। ৰিচাৰ্ডছনে যে ২০০৬ চনত জাৰ্মানীত অনুষ্ঠিত FIFA বিশ্বকাপৰ সময়ৰ কথা স্মৰণ কৰি কয় যে উক্ত সময়তো তেওঁৰ হাতত খেলৰ এখনো টিকট নাছিল, তথাপিও বিশ্বকাপ অনুষ্ঠিত হোৱা চহৰত উৎসাহিত ফুটবলৰ অনুৰাগীৰ মাজত থকাটোও এটা অনন্য অভিজ্ঞতা।
কিয় এখনো খেলৰ টিকট ক্ৰয় কৰিব পৰা নাই ৰিচাৰ্জছনে?
কানাডাৰ টৰণ্ট’ত অনুষ্ঠিত হ’বলগীয়া ক্ৰোৱেছিয়া বনাম পানামা আৰু ছেনেগাল বনাম ইৰাকৰ খেল দুখনৰ টিকট FIFA-ৰ আনুষ্ঠানিক প্লেটফৰ্মত এতিয়াও উপলব্ধ আছে। কিন্তু প্ৰায়কেইখন মেচৰেই কেৱল প্ৰীমিয়াম আসনসমূহহে উপলব্ধ আছে যাৰ মূল্য প্ৰায় ৬০০ ডলাৰ অৰ্থাৎ ৪৪ হাজাৰ টকাকৈ। যিটো তেওঁৰ পৰিয়ালৰ ৫ গৰাকী সদস্যৰ বাবে ক্ৰয় কৰাটো তেওঁৰ পক্ষে সম্ভৱ নহয়। ৰিচাৰ্ডছনে FIFA-ৰ টিকট বিতৰণ ব্যৱস্থা আৰু অধিক মূল্য নিৰ্ধাৰণ নীতিৰ সমালোচনা কৰি কয় যে-ইয়াৰ ফলত সাধাৰণ ফুটবলপ্ৰেমীসকলৰ বাবে খেল উপভোগ কৰাটো অত্যন্ত ব্যয়বহুল হৈ পৰিছে।
কিয় আমেৰিকাৰ পৰিৱৰ্তে কানাডাক বাছনি কৰিলে পৰিয়ালটোৱে?
বিশ্বকাপ উপভোগ কৰিবলৈ ৰিচাৰ্ডছনৰ পৰিয়ালে আমেৰিকাৰ পৰিৱৰ্তে কানাডাক বাছনি কৰিছে। তেওঁলোকৰ মতে, আমেৰিকাৰ কঠোৰ নীতি আৰু সামগ্ৰিক পৰিৱেশৰ কথা বিবেচনা কৰিয়েই তেওঁলোকে টৰণ্ট’ক বাছি লৈছে। ৰিচাৰ্ডছনৰ ভাষ্য অনুসৰি, টৰণ্ট’ এখন অত্যন্ত মনোৰম চহৰ আৰু চহৰখন ফুটবল বিশ্বকাপৰ ইতিহাসৰ অংশ হ’ব পৰাটো নিজেই এক বিশেষ অভিজ্ঞতা। পৰিয়ালটোৱে চহৰখনৰ এটা Air bnb বুকিং কৰিছে, যাৰ বাবে প্ৰতিদিনে প্ৰায় ৩,০০০ ডলাৰ ব্যয় হৈছে।
খেলৰ টিকট নাপালেও তেওঁলোকে FIFA Fan Festival-ত অংশগ্ৰহণ কৰাৰ পৰিকল্পনা কৰিছে। অৱশ্যে ফেন ফেষ্টিভেলৰ টিকট সংগ্ৰহ কৰাটোও তেওঁলোকৰ বাবে সহজ নাছিল। আৰম্ভণিতে তেওঁলোকৰ পছন্দৰ সকলো খেলৰ বাবে ফেন ফেষ্টিভেলৰ টিকট শেষ হৈ গৈছিল। কিন্তু পিছত চহৰ প্ৰশাসনে পৰ্যায়ক্ৰমে নতুন টিকট মুকলি কৰাৰ পিছত তেওঁলোকৰ সেই ক্ষেত্ৰত তেওঁলোকৰ ভাগ্য কিছু উদয় হয়।
এই প্ৰতিবেদনটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
