নিৰাশাজনক আয়াৰলেণ্ড আৰু ইংলেণ্ড ভ্ৰমণ সামৰি এইবাৰ টীম ইণ্ডিয়া উপস্থিত হৈছে জিম্বাবুৱেত। জিম্বাবুৱেত শ্ৰেয়াছ আয়াৰবাহিনীয়ে তিনিখন T20 মেচৰ এটা শৃংখলাত অৱতীৰ্ণ হ’ব। জিম্বাবুৱেৰ বিৰুদ্ধে অনুষ্ঠিত হ’বলগীয়া এই শৃংখলাটোৰ আজি প্ৰথমখন মেচ। মেচখন অনুষ্ঠিত হ’ব জিম্বাবুৱেৰ হাৰাৰে স্পৰ্টছ গ্ৰাউণ্ডত। জিম্বাবুৱে অভিমুখী টীম ইণ্ডিয়াৰ এই দলটোৰ প্ৰশিক্ষকৰ দায়িত্ব গম্ভীৰৰ পৰিৱৰ্তে দিয়া হৈছে ভি ভি এছ লক্ষ্মণক।
এতিয়াও প্ৰথমটো জয়ৰ অপেক্ষাত শ্ৰেয়াছ আয়াৰ
টীম ইণ্ডিয়াৰ T20ৰ কেপ্টেইনৰ দায়িত্ব লোৱাৰ পিছৰে পৰা শ্ৰেয়াছ আয়াৰে এই পৰ্যন্ত এখনো মেচত জয়ৰ মুখ দেখা নাই। প্ৰথমে আয়াৰলেণ্ডৰ বিৰুদ্ধে দুখন আৰু পৰৱৰ্তী সময়ত ইংলেণ্ডৰ বিৰুদ্ধে ৪খন মেচত পৰাস্ত হৈছিল টীম ইণ্ডিয়া। আয়াৰলেণ্ডৰ বিৰুদ্ধে শৃংখলাটোৰে শ্ৰেয়াছ আয়াৰে টীম ইণ্ডিয়াৰ অধিনায়ক হিচাপে আৰম্ভণি কৰিছিল। টীম ইণ্ডিয়াতকৈ তুলনামূলকভাৱে দুৰ্বল বুলি ভবা আয়াৰলেণ্ডৰ বিৰুদ্ধে হোৱাইট ৱাশ্ব হৈছিল টীম ইণ্ডিয়া। ইয়াৰ পিছতে ইংলেণ্ডৰ বিৰুদ্ধেও হোৱাইট ৱাশ্বৰ সন্মুখীন হ’বলগীয়া হৈছিল বিশ্ব চেম্পিয়ন দলটো। জিম্বাবুৱেও টীম ইণ্ডিয়াৰ তুলনাত তুলনামূলকভাৱে দুৰ্বল যদিও আয়াৰলেণ্ডৰ পৰা পোৱা শিক্ষা মনত ৰাখিব, সেয়েহে ভাৰতে পূৰ্ণ শক্তিৰে খেলপথাৰত নমাৰ সম্ভাৱনা আছে।
বৈভৱ সূৰ্যবংশীৰ ওপৰত সকলোৰে থাকিব দৃষ্টি
ভাৰতীয় ক্ৰিকেট অনুৰাগীৰ বাবে এই শৃংখলাটোৰ মুখ্য আকৰ্ষণ হৈছে বৈভৱ সূৰ্যবংশী। সঞ্জু ছেমছনৰ অনুপস্থিতিত বৈভৱ সূৰ্যবংশীয়ে শৃংখলাৰ আটাইকেইখন মেচত সুযোগ পোৱাৰ পূৰ্ণ সম্ভাৱনা আছে। অৱশ্যে ১৫ জনীয়া দলটোত প্ৰথমবাৰৰ বাবে টীম ইণ্ডিয়াৰ জাৰ্ছী পৰিধান কৰাৰ সুযোগ লাভ কৰা প্ৰভছিমৰন সিঙৰ ৰূপত আন এজন অপেনাৰো আছে। কিন্তু উইকেটকীপাৰ বেটাৰ ঈষাণ কিষাণৰ উপস্থিতিত প্ৰভছিমৰনে এতিয়াই মূল একাদশত সুযোগ পোৱাৰ আশা ক্ষীণ। বৈভৱৰ আন্তঃৰাষ্ট্ৰীয় ক্ৰিকেটৰ প্ৰথম তিনিখন মেচ অনুৰাগীয়ে আশা কৰা ধৰণে নহল। গতিকে জিম্বাবুৱেৰ বিৰুদ্ধে মেচকেইখনত IPLত দেখা বৈভৱজনক পুনৰাই দেখা পাব বুলি নিঃসন্দেহে আশা কৰিছে। ইপিনে প্ৰতিপক্ষৰ বলিং লাইন আপত ব্লেছিং মুজৰবানী আৰু ছিকন্দৰ ৰাজাৰ দৰে দুগৰাকী বিশ্বমানৰ বলাৰ আছে। সেই কথাও টীম ইণ্ডিয়াৰ বেটাৰসকলে মনত ৰাখিব লাগিব।
ভাৰতীয় অনুৰাগীসকলে ক’ত চাব এই মেচকেইখন?
মেচকেইখন ভাৰতীয় সময় অনুসৰি আবেলি ৪.৩০ বজাৰ পৰা আৰম্ভ হ’ব। সাধাৰণে টীম ইণ্ডিয়াৰ সকলো মেচ জিঅ হটষ্টাৰত পোনপটীয়া সম্প্ৰচাৰৰ ব্যৱস্থা থাকে। কিন্তু জিম্বাবুৱেৰ বিৰুদ্ধে এই মেচকেইখন ভাৰতীয় অনুৰাগীসকলে জিঅ’ হটষ্টাৰত চাবলৈ নাপাব। জিঅ’ হটষ্টাৰে মেচকেইখনৰ পোনপটীয়া সম্প্ৰচাৰৰ দায়িত্ব লোৱা নাই। ভাৰতীয় অনুৰাগীসকলে মেচকেইখন fancode নামৰ মোবাইল এপটোৰ জৰিয়তে পোনপটীয়া সম্প্ৰচাৰ উপভোগ কৰিব পাৰিব। ইয়াৰ উপৰিও টেলিভিছনত united 8 sportsত মেচকেইখন উপভোগ কৰিব পাৰিব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
