টেলিভিছনৰ অভিনেত্ৰী ছানভী তালৱাৰে অভিনেতা কৰণ কুন্দ্ৰাৰ বিৰুদ্ধে গুৰুতৰ অভিযোগ উত্থাপন কৰিছে। ছানভীয়ে দাবী কৰে যে, টিভি ধাৰাবাহিক ‘য়ে কহাঁ আ গয়ে হম’ৰ শ্বুটিঙৰ সময়ত কৰণে তেওঁৰ সৈতে দুৰ্ব্যৱহাৰ আৰু মাৰপিট কৰিছিল। ছানভীয়ে কৰণৰ বিৰুদ্ধে গুৰুতৰ অভিযোগ উত্থাপন কৰি কয় যে এদিন এটা দৃশ্যৰ শ্বুটিং চলি থকাৰ সময়ত পৰিচালকে ACTION টেক দিয়াৰ আগতেই কৰণে হঠাতে ছানভীক জোৰকৈ চুম্বন কৰিছিল আৰু ইয়াৰ প্ৰতিক্ৰিয়াত ছানভীয়ে কৰণক প্ৰচণ্ড চৰ শোধাইছিল। ইয়াৰ পিছতে কৰণ কুন্দ্ৰাই ছানভী উপৰ্যুপৰি চৰ শধোৱাৰ উপৰিও শাৰীৰিকভাৱেও প্ৰহাৰ কৰিছিল। ছানভীৰ এই অভিযোগে সকলোকে আচৰিত কৰিছে। সামাজিক মাধ্যমতো ব্যৱহাৰকাৰীসকলে বিভিন্ন ধৰণৰ প্ৰতিক্ৰিয়া প্ৰকাশ কৰিছে। অৱশ্যে, এতিয়ালৈকে কৰণ কুন্দ্ৰা বা তেওঁৰ প্ৰেমিকা তেজস্বী প্ৰকাশে এই অভিযোগৰ ওপৰত কোনো প্ৰতিক্ৰিয়া জনোৱা নাই। ছানভীয়ে লগতে কয় যে-কৰণে মোক শাৰীৰিকভাৱেও ছেটত প্ৰহাৰ কৰিছিল। মোৰ লগতে মোৰ পৰিয়ালক লৈও সকলোৰে সন্মুখত গালি-গালাজ পাৰিছিল কৰণে।
ছানভীয়ে লগতে কয় যে, সেই সময়ত ছেটত উপস্থিত কোনেও তেওঁৰ পক্ষ লোৱা নাছিল। অৱশ্যে পিছত প্ৰযোজক একতা কাপুৰে কৰণৰ হৈ তেওঁৰ ওচৰত ক্ষমা বিচাৰিছিল আৰু তেওঁক সমৰ্থন জনাইছিল। ইয়াৰ ফলত তেওঁৰ বাবে কাম কৰাটো কিছু সহজ হৈছিল। ছানভীয়ে এই কথাও জনায় যে, সেই সময়ত কৰণে অভিনেত্ৰী অনুষা ডাণ্ডেকাৰক ডেট কৰি আছিল। ঘটনাটোৰ বিষয়ে জানিব পাৰি অনুষাও ছেটলৈ আহিবলৈ আৰম্ভ কৰিছিল। কিন্তু ইয়াৰ পিছতো কৰণ আৰু পৰিচালকে তেওঁৰ বাবে কামৰ পৰিৱেশ কঠিন কৰি তুলিছিল বুলি ছানভীয়ে অভিযোগ কৰে।
ইপিনে The GlamWorld Talksক দিয়া এটা সাক্ষাৎকাৰত ছানভীয়ে কয় যে, যেতিয়া তেওঁ নিজৰ অধিকাৰৰ বাবে মাত মাতিছিল, তেতিয়া পৰিচালকে তেওঁৰ অভিনয় ক্ষমতাক লৈয়ে প্ৰশ্ন উত্থাপন কৰিবলৈ আৰম্ভ কৰিছিল। যদিও তেওঁ পৰিচালকৰ নাম প্ৰকাশ কৰা নাই, তথাপিও উক্ত ধাৰাবাহিকখনৰ সৈতে দীপক বিঠোবা চৌহান, ৰঞ্জন কুমাৰ সিং আৰু ৰণদীপ শান্তাৰাম মহাডিক জড়িত আছিল।
উল্লেখযোগ্য যে, ছানভীয়ে ধাৰাবাহিকভাৱে বিভিন্ন সংবাদ মাধ্যমক দিয়া সাক্ষাৎকাৰত কৰণ কুন্দ্ৰাৰ বিৰুদ্ধে এই অভিযোগসমূহ উত্থাপন কৰি আহিছে। অৱশ্যে, এতিয়ালৈকে এই সমগ্ৰ বিষয়টোৰ ওপৰত কৰণ কুন্দ্ৰাই কোনো আনুষ্ঠানিক প্ৰতিক্ৰিয়া দিয়া নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
