বিশ্বৰ এনে বহু উদ্যোগপতি বা পুঁজিপতি আছে যাৰ এটা সিদ্ধান্তই ভাগ্য সলনি কৰি দিয়ে আৰু পৰৱৰ্তী সময়ত জীৱনো সলনি হৈ পৰে। মাত্ৰ চাৰি বছৰ আগলৈকে MITৰ হোষ্টেলত বহি কোডিং শিকি থকা এজন যুৱক আজি বিশ্বৰ সৰ্বকনিষ্ঠ আৰবপতিসকলৰ তালিকাত স্থান লাভ কৰিছে। সেই যুৱকজন হৈছে ২৫ বছৰীয়া অমন সাংগাৰ। তেওঁৰ AI ভিত্তিক কোডিং কোম্পানী Cursorৰ মূল প্ৰতিষ্ঠান Anysphereক মহাকাশ প্ৰযুক্তি কোম্পানী SpaceX-এ ৬০ বিলিয়ন ডলাৰ, অৰ্থাৎ প্ৰায় ৫ লাখ কোটি টকাত ক্ৰয় কৰাৰ সিদ্ধান্ত লৈছে। এই বিশাল চুক্তিৰ পিছত অমন সাংগাৰৰ মুঠ সম্পত্তিৰ পৰিমাণ ৫.৫ বিলিয়ন ডলাৰলৈ বৃদ্ধি পাইছে।
অমন সাংগাৰে ৪ বছৰতে লাভ কৰা সফলতাৰ কাহিনী
অমন সাংগাৰৰ জন্ম হৈছিল আমেৰিকাৰ নিউয়ৰ্কত। তেওঁ ভাৰতীয় মূলৰ এটা পৰিয়ালৰ সন্তান। তেওঁৰ পিতৃ অৰবিন্দ সাংগাৰ IIT বম্বেৰ প্ৰাক্তন ছাত্ৰ আছিল। মাতৃ শিল্পা সাংগাৰ এগৰাকী অৰ্থোডণ্টিষ্ট তথা উদ্যোগপতি। অমনে মাত্ৰ ১৪ বছৰ বয়সতেই কোডিং শিকিবলৈ আৰম্ভ কৰিছিল। পিছত MITত কম্পিউটাৰ বিজ্ঞানৰ অধ্যয়ন কৰি থাকোঁতেই তেওঁ তিনিজন বন্ধু—মাইকেল ট্ৰুৱেল, ছালেহ আছিফ আৰু আৰভিড লুনমাৰ্কৰ সৈতে মিলি ২০২২ চনত Cursor নামৰ ষ্টাৰ্টআপটো প্ৰতিষ্ঠা কৰে। ব্যৱসায়ত সম্পূৰ্ণ মনোনিবেশ কৰাৰ উদ্দেশ্যেৰে চাৰিওজনে ২১ বছৰ বয়সতে কলেজ ত্যাগ কৰে।
MITৰ হোষ্টেলৰ পৰা আৰম্ভ হৈছিল ৬০ বিলিয়ন ডলাৰৰ সফলতাৰ কাহিনী
আৰম্ভণিতে তেওঁলোকৰ লক্ষ্য আছিল Mechanical Engineering খণ্ডৰ বাবে AI Copilot তৈয়াৰ কৰা। কিন্তু পিছত AI ভিত্তিক কোডিং প্লেটফৰ্মৰ ওপৰত গুৰুত্ব আৰোপ কৰে আৰু এই সিদ্ধান্তই তেওঁলোকৰ জীৱনৰ টাৰ্নিং পইণ্ট হিচাপে পৰিগণিত হয়। বৰ্তমান Anysphere-ত অমন সাংগাৰে Chief Operating Officer হিচাপে দায়িত্ব পালন কৰি আছে, আনহাতে মাইকেল ট্ৰুৱেল কোম্পানীটোৰ Chief Executive Officer হিচাপে দায়িত্ব পালন কৰি আছে।
Cursor কি আৰু কিয় বিশ্বজুৰি ইমান জনপ্ৰিয়?
Cursor হৈছে এটা AI-চালিত কোডিং প্লেটফৰ্ম, যিয়ে ডেভেলপাৰসকলক কোড লিখা, সম্পাদনা কৰা আৰু জটিল ছফ্টৱেৰ সমস্যাবোৰ বুজি সমাধান কৰাত সহায় কৰে। ই কেৱল এটা Auto-Complete সঁজুলি নহয়; বৰং সমগ্ৰ কোডবেছ বুজি ডেভেলপাৰসকলৰ AI সহযোগী হিচাপে কাম কৰা এটা মাধ্যম। Cursor-ৰ দ্ৰুত বিকাশৰ অনুমান পাব পাৰি কোম্পানীটোৰ ৰাজহৰ পৰিসংখ্যাৰ পৰা। ২০২৫ চনৰ নৱেম্বৰ মাহত কোম্পানীটোৱে ১ বিলিয়ন ডলাৰৰ বাৰ্ষিক ৰাজহ অতিক্ৰম কৰিছিল। আনহাতে ২০২৬ চনৰ আৰম্ভণিলৈকে এই ৰাজহ বৃদ্ধি পাই ৪ বিলিয়ন ডলাৰ হৈছেগৈ। AI প্ৰযুক্তিৰ ক্ষেত্ৰত Cursorৰ এই অভূতপূৰ্ব সফলতাই অমন সাংগাৰক বিশ্বৰ সৰ্বাধিক সফল যুৱ উদ্যোগপতিসকলৰ শাৰীত স্থান দিয়াত সহায় কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
