বুধবাৰে সমাপ্ত হোৱা G7 বৈঠক অনুষ্ঠিত হৈছিল ফ্ৰান্সৰ মনোমোহা এভিয়ান চহৰত। ভাৰতৰ প্ৰধানমন্ত্ৰী নৰেন্দ্ৰ মোদীয়েও আল্পছ পৰ্বতমালাৰ পাদদেশত অৱস্থিত এই চহৰখনত উপস্থিত হৈছিল G7 শীৰ্ষ সন্মিলনত অংশগ্ৰহণৰ উদ্দেশ্যে। G7 শীৰ্ষ সন্মিলন অনুষ্ঠিত হোৱাৰ উপৰিও এভিয়ান চহৰ আন বহুকেইটা কাৰণৰ বাবে বিশেষ গুৰুত্বপূৰ্ণ। চুইজাৰলেণ্ডৰ জেনেভাৰ দৰেই অপূৰ্ব প্ৰাকৃতিক সৌন্দৰ্যৰে ভৰপূৰ এভিয়ান মূলতঃ এখন বিশ্বখ্যাত ৰিজ’ৰ্ট চহৰ। আল্পছ পৰ্বতমালাৰ পাদদেশত আৰু জেনেভা হ্ৰদৰ পাৰত অৱস্থিত এই চহৰখন নিজৰ প্ৰাকৃতিক খনিজ পানীৰ বাবে সমগ্ৰ বিশ্বতে পৰিচিত।
এভিয়ানৰ বিশ্ববিখ্যাত বিশুদ্ধ পানী
এভিয়ান চহৰৰ নাম শুনিলেই বহুতে বিশ্বখ্যাত ‘Evian’ মিনাৰেল ৱাটাৰৰ কথা মনত পেলায়। যিটো ব্ৰেণ্ডৰ ১ লিটাৰ পানীৰ মূল্য ভাৰতীয় টকাৰ হিচাপত প্ৰায় ২৫০ টকা। যি ব্ৰেণ্ডৰ পানী বিৰাট কোহলিৰ দৰে তাৰাকায়ো সেৱন কৰে বুলি মাজে মাজে চৰ্চা চলে। অৱশ্যে কোহলিয়ে সঁচাকৈয়ে এই ব্ৰেণ্ডৰ পানী সেৱন কৰে নে নাই সেই সন্দৰ্ভত নাই কোনো নিশ্চিত তথ্য। এভিয়ান কোম্পানীৰ তথ্য অনুসৰি, ফ্ৰেন্স আল্পছৰ পৰা অহা নিৰ্মল আৰু প্ৰাকৃতিক পানীৰ উৎসৰ বাবেই এভিয়ান বিশ্বৰ অন্যতম আকৰ্ষণীয় গন্তব্যস্থান হিচাপে পৰিচিত হৈছে। ঊনবিংশ শতিকাৰ পৰাই ইয়াৰ থাৰ্মেল স্পা আৰু আৰোগ্যদায়ক পানীয়ে ধনী লোক, ৰাজপৰিয়াল আৰু বিশ্বৰ বহু খ্যাতনামা ব্যক্তিক আকৰ্ষিত কৰি আহিছে। জেনেভা হ্ৰদৰ কাষত অৱস্থিত এই মনোৰম চহৰখনৰ ৩৫ বৰ্গ কিলোমিটাৰ বিস্তৃত পাহাৰীয়া অঞ্চল ইউনেস্ক’ৰ ৰামছাৰ কনভেনশ্যনৰ অধীনত ৰাসায়নিক সাৰ আৰু কীটনাশকমুক্ত কৰি সংৰক্ষণ কৰা হৈছে, যাতে পানীৰ বিশুদ্ধতা অক্ষুণ্ণ থাকে।
১৫ বছৰৰ দীঘল যাত্ৰাৰ অন্তত তৈয়াৰ হয় Evian water
Evian waterৰ আটাইতকৈ উল্লেখযোগ্য বৈশিষ্ট্য হ’ল—ইয়াক কোনো কাৰখানাত কৃত্ৰিমভাৱে ফিল্টাৰ কৰা নহয় আৰু বাহিৰৰ পৰা কোনো খনিজ পদাৰ্থও মিহলি কৰা নহয়। এই পানী ফ্ৰেন্স আল্পছত পৰা বৰফ আৰু বৰষুণৰ পানীৰ পৰাই সৃষ্টি হয়। পানীখিনি আল্পছ পৰ্বতমালাৰ ভিতৰত থকা এক প্ৰাচীন হিমবাহজনিত স্তৰৰ মাজেৰে ধীৰে ধীৰে তললৈ সৰি যায়। পাহাৰৰ বিভিন্ন প্ৰাকৃতিক শিলাস্তৰৰ মাজেৰে ছেকা খাই ‘Source Cachat’ নামৰ ঝৰ্ণা এটালৈ আহি পোৱালৈ এই পানীৰ প্ৰায় ১৫ বছৰ সময় লাগে। এই দীঘল যাত্ৰাৰ সময়ছোৱাত পানী স্বাভাৱিকভাৱেই বিশুদ্ধ আৰু নিৰ্মল হৈ উঠে। ১৫ বছৰৰ এই প্ৰাকৃতিক পৰিশোধন প্ৰক্ৰিয়াত পানীয়ে পাহাৰৰ শিলৰ পৰা বহু উপকাৰী খনিজ পদাৰ্থ আহৰণ কৰে। এভিয়ান পানীৰ pH মান ৭.২, যি ইয়াক এক সু-সামঞ্জস্যপূৰ্ণ পানী হিচাপে গঢ়ি তোলে। ইয়াত থকা কেলচিয়াম আৰু মেগনেছিয়ামে হাড় আৰু পেশী শক্তিশালী ৰখাত সহায় কৰে। বাইকাৰ্বনেটে পাচন প্ৰক্ৰিয়া সুস্থ ৰখাত ভূমিকা পালন কৰে। আনহাতে, ছডিয়াম বা নিমখৰ পৰিমাণ অতি কম হোৱাৰ বাবে এই পানী স্বাস্থ্যৰ বাবে নিৰাপদ আৰু উপযোগী বুলি গণ্য কৰা হয়। আজিৰ দিনত Evian waterৰ এই প্ৰাকৃতিক খনিজ পানী বিশ্বৰ ১৪০ৰো অধিক দেশলৈ ৰপ্তানি কৰা হয় আৰু বিশুদ্ধতা তথা গুণগত মানৰ বাবে ই বিশ্বজুৰি বিশেষ সমাদৰ লাভ কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
