গ্লোবেল মটৰ বাহন নিৰ্মাণ কোম্পানী হুণ্ডাই ভাৰতত সংকটত পৰিছে! হুণ্ডাই বয়কট ধ্বনিয়ে সমগ্ৰ সামাজিক মাধ্যমত তোলপাৰ লাগিছে৷ কিন্তু কিয় হঠাতে ভাৰতত হুণ্ডাইৰ বিৰুদ্ধে এই বিষোদগাৰ প্ৰকাশ কৰিছে ভাৰতীয়সকলে?
হুণ্ডাইৰ পাকিস্তানৰ গোটে ইনষ্টাগ্ৰামত এটা পোষ্ট দিয়াৰ পিছতেই মটৰ নিৰ্মাণ প্ৰতিষ্ঠানটোৱে ভাৰতত তীব্ৰ বিৰোধৰ সন্মুখীন হৈছে৷
হুণ্ডাইৰ পাকিস্তানৰ গোটে তেওঁলোকৰ ইনষ্টাগ্ৰামৰ অফিচিয়েল পেজত কাশ্মীৰৰ স্বাধীনতাক সমৰ্থন কৰি এইদৰে ভাৰতত তুমুল তীব্ৰ বিৰোধিতাৰ সন্মুখীন হৈছে৷
যোৱা ৫ ফেব্ৰুৱাৰীত কাশ্মীৰ সংহতি দিৱস উপলক্ষ্যে হুণ্ডাইৰ পাকিস্তান গোটে ইনষ্টাগ্ৰামত লিখিছিল ‘‘আহক আমি আমাৰ কাশ্মীৰী ভাতৃসকলৰ ত্যাগৰ কথা মনত ৰাখোঁ আৰু স্বাধীনতাৰ বাবে সংগ্ৰাম অব্যাহত ৰখাসকলৰ কাষত থিয় দিওঁ।’’
ইয়াৰ পিছতে ভাৰতত হুণ্ডাই বয়কট পোষ্টেৰে ধাৰাষাৰ বৰষুণৰ সৃষ্টি হৈছে৷ টুইটাৰত হুণ্ডাইৰ বাহন ক্ৰয় নকৰিবলৈ ভাৰতীয়সকলক আহ্বান জনাই টুইটৰ বৰষুণ পৰিছে৷ হুণ্ডাই বয়কট হেজটেগে টুইটাৰৰ ট্ৰেণ্ডত থকা পৰিলক্ষিত হৈছে৷
ভাৰতীয়সকলৰ এই হুংকাৰত কম্পমান হৈ হুণ্ডাই-এ স্পষ্টীকৰণ দিবলৈ বাধ্য হৈ পৰিছে৷ হুণ্ডাইৰ ভাৰতৰ গোটে স্পষ্টীকৰণ দি কয় ‘‘হুণ্ডাই মটৰ ইণ্ডিয়া-এ ২৫ বছৰৰো অধিক সময় ধৰি ভাৰতীয় বজাৰৰ প্ৰতি প্ৰতিশ্ৰুতিৱদ্ধ হৈ আছো আৰু আমি ভাৰতীয় জাতীয়তাবাদক সন্মান জনোৱাৰ লগতে শক্তিশালীভাৱে সমৰ্থন দি আহিছো৷’’
প্ৰতিষ্ঠানটোৱে লগতে কয়, ‘‘হুণ্ডাই মটৰ ইণ্ডিয়াক এটা অবাঞ্ছিত ছ’চিয়েল মিডিয়া পোষ্টৰ সৈতে সংযোগ কৰি এই মহান দেশখনৰ প্ৰতি আমাৰ অতুলনীয় প্ৰতিশ্ৰুতি আৰু সেৱাক বাধাপ্ৰাপ্ত কৰিছে।’’
হুণ্ডাইৰ পাকিস্তান গোটৰ ইনষ্টাগ্ৰাম পোষ্টৰ বাবে ক্ষমা খুজি হুণ্ডাই ভাৰতীয় গোটে লগতে কয় ‘‘ভাৰতক দিয়া আমাৰ প্ৰতিশ্ৰুতি অনুসৰি আমি এই দেশৰ নাগৰিকসকলৰ উন্নতিৰ হকে আমাৰ প্ৰচেষ্টা অব্যাহত ৰাখিম৷’’
উল্লেখ্য যে মাৰুতি চুজুকীৰ পিছতে হুণ্ডাই হৈছে ভাৰত দ্বিতীয় বৃহত্তম বাহন নিৰ্মাতা প্ৰতিষ্ঠান৷ প্ৰতিষ্ঠানটোৱে ভাৰতত গ্ৰাহকৰ বাবে ১২ টা মডেলৰ বাহন নিৰ্মাণ কৰি বিক্ৰী কৰি আহিছে৷
যোৱা ডিচেম্বৰত ঘোষণা কৰা অনুসৰি প্ৰতিষ্ঠানটোৱে ২০২৮ চনৰ ভিতৰত ৪,০০০ কোটি টকা বিনিয়োগ কৰি ছটা মডেলৰ ইলেক্ট্ৰিক বাহন নিৰ্মাণ কৰিব৷ ১৯৬৭ চনত প্ৰতিষ্ঠা লাভ কৰা প্ৰতিষ্ঠানটোৰ বিশ্বৰ ২০০ খন দেশত প্ৰায় ১ লাখ ২০ হাজাৰ কৰ্মচাৰী আছে৷
প্ৰতিষ্ঠানটোৰ পাকিস্তান গোটৰ এই কাণ্ডই ভাৰতৰ দৰে লাভজনক বিশাল বজাৰখনত হুণ্ডাইক যথেষ্ট ক্ষতি কৰাৰ সম্ভাৱনা আছে৷ পাকিস্তান গোটে সৃষ্টি কৰা এই অনাহূত পৰিস্থিতিক প্ৰতিষ্ঠানটোৱে কেনেকৈ মোকাবিলা কৰে কৰে সেয়া পৰৱৰ্তী সময়ত লক্ষণীয় হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
