মেটাভাৰ্ছৰ যোগে মৃত পিতৃৰ আশীৰ্বাদ গ্ৰহণ কৰি বিবাহত বহিল তামিলনাডুৰ এগৰাকী কন্যাই আৰু তেওঁৰ সৈতে মৃত শহুৰেকৰ আশীষ হ’লে জোঁৱায়েকে৷ অৰ্থাৎ মৃত পিতৃয়ে ভাৰ্চুৱেলি নিজ কন্যাৰ বিবাহৰ অভ্যথনাত আশীৰ্বাদ প্ৰদান কৰে৷
যোৱা ৫ ফ্ৰেবুৱাৰিত তামিলনাডুৰ কৃষ্ণগিৰি জিলাৰ আনচেট্টী মহকুমাৰ অতি প্ৰত্যন্ত এলেকাৰ জনজাতীয় গাঁও শিৱলিঙ্গপুৰমত দীনেশ এছপি আৰু জনগণানন্দিনী ৰামাস্বামীয়ে বিবাহপাশত আৱদ্ধ হয়৷ দীনেশ এছপি হৈছে আইআইটি মাদ্ৰাজ এক প্ৰকল্প সহযোগী আৰু জনগণানন্দিনীও হৈছে এগৰাকী প্ৰযুক্তিবিদ৷
সংবাদ মাধ্যমত প্ৰকাশ পোৱা অনুসৰি যোৱা বছৰ জনগণানন্দিনীৰ পিতৃৰ মৃত্যু হৈছিল আৰু তেতিয়াই দীনেশ এছপিয়ে তেওঁক দেউতাকৰ এটা ‘অৱতাৰ’ উপহাৰ দিয়া সিদ্ধান্ত লৈছিল যাতে তেওঁৰ পিতৃয়ে দম্পতীহালক আশীৰ্বাদ দিব পাৰে৷
বিবাহপাশত আৱদ্ধ হোৱাৰ পিছতে দীনেশ আৰু জনগণানন্দিনীয়ে কোভিড প্ৰটকলৰ বাবে মেটাভাৰ্ছৰ যোগে অভ্যৰ্থনা আয়োজন কৰে৷ ইয়াৰ সমগ্ৰ দৃশ্যৰাজি সামাজিক মাধ্যম যোগে ভাইৰেল হৈ পৰিছে৷
দীনেশ, জনগণানন্দিনী আৰু ৰামাস্বামী (জনগণানন্দিনীৰ পিতৃ)ৰ তিনিটা অৱতাৰ সৃষ্টি কৰি মেটাভাৰ্ছৰ যোগেদি বিবাহৰ অভ্যৰ্থনা সম্পন্ন কৰে আৰু ৰামাস্বামীয়ে কন্যা আৰু জোঁৱায়েকক আশীৰ্বাদ প্ৰদান কৰে৷
চেন্নাইৰ পৰা মেটাভাৰ্চৰ জৰিয়তে এটা সংগীতানুষ্ঠানও অনুষ্ঠিত কৰা হয় আৰু মেটাভাৰ্চৰ অভ্যৰ্থনা অনুষ্ঠানত উপস্থিত থকা প্ৰায় ২০০ জন লোকৰ বাবে ঘৰত খাদ্য বিতৰণ কৰা হয়।
সামাজিক মাধ্যমত এই দৃশ্য ভাইৰেল হোৱাৰ পিছতে দেশজুৰি এই সমগ্ৰ বিবাহখনে চৰ্চা লাভ কৰিছে৷ উল্লেখ্য যে এই বিবাহখন ভাৰতৰ প্ৰথম মেটাভাৰ্ছ বিবাহ হিচাপেও স্বীকৃতি লাভ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
