বেচিক ছেভিংছ বেংক ডিপ’জিট (BSBD) একাউণ্টধাৰীৰ সেৱা চাৰ্জ সংশোধন কৰিছে ৰাজহুৱা খণ্ডৰ বেংক SBI-এ। শাখাৰ জৰিয়তে নগদ ধন উলিওৱাৰ নিয়ম সংশোধন কৰিছে বেংকে। সংশোধিত নিয়মাৱলী ২০২৬ চনৰ ১ অক্টোবৰৰ পৰা কাৰ্যকৰী হ’ব। এই একাউণ্টসমূহ মূলতঃ সমাজৰ দৰিদ্ৰ শ্ৰেণীৰ বাবে, যাতে তেওঁলোকে কোনো ধৰণৰ চাৰ্জ বা মাচুলৰ বোজা নপৰাকৈ সঞ্চয় আৰম্ভ কৰিবলৈ উৎসাহিত কৰিব পাৰে।
SBIৰ আপডেট অনুসৰি ২০২৬ চনৰ ১ অক্টোবৰৰ পৰা এমাহৰ ভিতৰত প্ৰথম ৪বাৰ বিনামূলীয়াকৈ নগদ ধন উলিওৱাৰ পিছত প্ৰতিটো লেনদেনত ১৫ টকা প্লাছ GST লোৱা হ’ব। ইয়াৰ পূৰ্বে ডিজিটেল লেনদেন বাদ দি প্ৰাৰম্ভিক চাৰিটা বিনামূলীয়া লেনদেনৰ পিছত প্ৰতিটো লেনদেনত ১৫ টকা প্লাছ GST লোৱা হৈছিল। অৰ্থাৎ প্ৰথম চাৰিটা বিনামূলীয়া লেনদেন গণনা কৰাৰ সময়ত ডিজিটেল লেনদেন অন্তৰ্ভুক্ত কৰা হোৱা নাছিল। অৱশ্যে এই ৰেহাই এতিয়া SBIৰ সংশোধিত নিয়মত আঁতৰাই দিয়া হৈছে।
একাউণ্টৰ বৈশিষ্ট্যসমূহ
SBIৰ এই একাউণ্টত নূন্যতম বেলেঞ্চৰ প্ৰয়োজন নাই। অৱশ্যে এই একাউণ্টত চেক বুক নাহে। অৱশ্যে ধন উলিওৱাৰ প্ৰ-পত্ৰ বা ATM ব্যৱহাৰ কৰি শাখাত ধন উলিওৱাৰ সুবিধা থাকিব। একাউণ্টধাৰীজনক এখন বেচিক RuPay ATM-ডেবিট কাৰ্ড প্ৰদান কৰা হব।
একাউণ্ট খোলাৰ বাবে মূল চৰ্তসমূহ
এই বেচিক চেভিংছ বেংক একাউণ্ট খোলা গ্ৰাহকৰ আন কোনো চেভিংছ বেংক একাউণ্ট থাকিব নোৱাৰিব। যদি গ্ৰাহকৰ ইতিমধ্যে চেভিংছ বেংক একাউণ্ট আছে, তেন্তে বেচিক চেভিংছ বেংক ডিপ’জিট একাউণ্ট খোলাৰ ৩০ দিনৰ ভিতৰত বন্ধ কৰিব লাগিব। BSBD গ্ৰাহকক বিনামূলীয়াকৈ এটা মৌলিক RuPay ATM-ডেবিট কাৰ্ড প্ৰদান কৰা হয়। বাৰ্ষিক ৰক্ষণাবেক্ষণৰ কোনো চাৰ্জ নাই। ইয়াৰ উপৰিও NEFT/RTGSৰ দৰে ইলেক্ট্ৰনিক পেমেণ্ট চেনেলৰ জৰিয়তে জমা ধনৰ বাবেও কোনো ধৰণৰ চাৰ্জ লোৱা নহয়। নিষ্ক্ৰিয় একাউণ্ট পুনৰ সক্ৰিয় কৰাৰ বাবে কোনো ধৰণৰ চাৰ্জ লোৱা নহয় যদিও বন্ধ কৰাৰ বাবে চাৰ্জ লোৱা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
