হিন্দুস্তান ইউনিলিভাৰ লিমিটেডে (HUL) নিজৰ জনপ্ৰিয় সামগ্ৰী ছাৰ্ফ এক্সেল আৰু ভীমক লৈ Beco-এ চলোৱা এটা বিজ্ঞাপন অভিযানৰ বিৰুদ্ধে দিল্লী উচ্চ ন্যায়ালয়ৰ দ্বাৰস্থ হৈছে। Beco-এ নিজৰ ‘WarOnWhatsHidden’ নামৰ অভিযানৰ জৰিয়তে এই দুটা সামগ্ৰীত ব্যৱহৃত কিছুমান ৰাসায়নিক উপাদানৰ সুৰক্ষাক লৈ প্ৰশ্ন উত্থাপন কৰিছিল। এই অভিযানক লৈয়ে দুয়োটা কোম্পানীৰ মাজত আইনী বিতৰ্কৰ সৃষ্টি হৈছে।
Beco-এ শেহতীয়াকৈ ‘WarOnWhatsHidden’ নামৰ এক বিজ্ঞাপন অভিযান আৰম্ভ কৰে। ছ’চিয়েল মিডিয়া, ভিডিঅ’, ইনফ্লুৱেঞ্চাৰ আৰু বিজ্ঞাপনৰ জৰিয়তে এই অভিযান চলোৱা হয়। Becoৰ দাবী অনুসৰি, তেওঁলোকে কৰা লেবৰেটৰী পৰীক্ষাত ছাৰ্ফ এক্সেলত BIT আৰু LAS পোৱা গৈছে। আনহাতে, ভীমতো LAS পোৱা বুলি কোম্পানীটোৱে দাবী কৰিছে। Beco-এ এই ৰাসায়নিক উপাদানসমূহক ছালত হোৱা জ্বলা-পোৰা, ইৰিটেচন আৰু এলাৰ্জিৰ দৰে সমস্যাৰ সৈতে সম্পৰ্কিত বুলি উল্লেখ কৰি ছাৰ্ফ এক্সেল আৰু ভীমৰ সুৰক্ষাক লৈ প্ৰশ্ন উত্থাপন কৰিছে।
Becoৰ দাবীত HULৰ আপত্তি
Becoৰ এই দাবীৰ বিৰুদ্ধে হিন্দুস্তান ইউনিলিভাৰ লিমিটেডে তীব্ৰ আপত্তি প্ৰকাশ কৰিছে। কোম্পানীটোৰ যুক্তি হৈছে—কোনো সামগ্ৰীত এটা নিৰ্দিষ্ট ৰাসায়নিক উপাদান পোৱা গৈছে বুলিয়েই সেই সামগ্ৰীয়ে ব্যৱহাৰকাৰীৰ ছালত ইৰিটেচন, জ্বলা-পোৰা বা এলাৰ্জিৰ সৃষ্টি কৰিব বুলি প্ৰমাণিত নহয়। HULৰ মতে, কোনো সামগ্ৰীৰ সুৰক্ষা নিৰ্ধাৰণ কৰিবলৈ কেৱল কোনো এটা ৰাসায়নিক উপাদানৰ উপস্থিতি বা পৰিমাণ পৰীক্ষা কৰাই যথেষ্ট নহয়। সম্পূৰ্ণ সামগ্ৰীৰ সুৰক্ষা সম্পৰ্কীয় প্ৰয়োজনীয় পৰীক্ষাও কৰা উচিত।
HULএ বিশেষভাৱে LASৰ ব্যৱহাৰৰ বিষয়টোও উত্থাপন কৰিছে। কোম্পানীটোৰ মতে, LAS হৈছে বিভিন্ন ক্লিনিং প্ৰডাক্টত ব্যৱহৃত এক সাধাৰণ ক্লিনিং উপাদান, যাৰ সহায়ত তেল আৰু ময়লা আঁতৰোৱাত সহায় হয়। HULৰ অভিযোগ, Beco-এ Vimৰ ক্ষেত্ৰত LASৰ উপস্থিতিক বিশেষভাৱে প্ৰদৰ্শন কৰি গ্ৰাহকৰ মাজত সামগ্ৰীটোৰ বিষয়ে ভুল ধাৰণা সৃষ্টি কৰাৰ চেষ্টা কৰিছে।
HULৰ টেগলাইন ব্যৱহাৰক লৈও আপত্তি
কেৱল ৰাসায়নিক উপাদানক লৈ কৰা দাবীয়েই নহয়, Becoৰ বিজ্ঞাপনত HULৰ জনপ্ৰিয় সামগ্ৰীৰ টেগলাইন ব্যৱহাৰ কৰাৰ বিষয়তো আপত্তি উত্থাপন কৰিছে কোম্পানীটোৱে। Becoৰ অভিযানত Vimৰ ‘১০০টা নেমুৰ শক্তি’ আৰু ছাৰ্ফ এক্সেলৰ ‘দাগ ভাল’ৰ দৰে জনপ্ৰিয় টেগলাইন ব্যৱহাৰ কৰা বুলি HULএ অভিযোগ কৰিছে।
HULৰ মতে, এই ধৰণৰ বিজ্ঞাপনৰ জৰিয়তে তেওঁলোকৰ ব্ৰেণ্ড আৰু সামগ্ৰীৰ বিষয়ে গ্ৰাহকৰ মাজত নেতিবাচক ধাৰণা সৃষ্টি হোৱাৰ আশংকা আছে। কোম্পানীটোৱে লগতে অভিযোগ কৰিছে যে Beco-এ ১৪ আগষ্টৰ নিশা এই অভিযান আৰম্ভ কৰিছিল। অভিযানটো হঠাতে আৰম্ভ কৰাৰ ফলত ইয়াৰ বিৰুদ্ধে তাৎক্ষণিকভাৱে আইনী ব্যৱস্থা গ্ৰহণ কৰাত অসুবিধা হোৱা বুলিও HUL-এ আদালতক অৱগত কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
