টংলাৰ কুলশী নৈৰ পাৰত সংঘটিত হৈছে এক চাঞ্চল্যকৰ ঘটনা। নৈত গা ধুবলৈ যোৱা এগৰাকী ১৩ বছৰীয়া কিশোৰীক অপকৰ্মৰ অপচেষ্টা চলোৱাৰ লগতে গামোচাৰে ডিঙি চিপি হ*ত্যাৰ অপচেষ্টা চলোৱাৰ অভিযোগ উত্থাপন হৈছে এজন ৰাজমিস্ত্ৰীৰ বিৰুদ্ধে। পৰৱৰ্তী সময়ত কিশোৰীগৰাকীক নৈৰ পাৰৰ ঝাৰণিত অচেতন অৱস্থাত উদ্ধাৰ কৰে পৰিয়ালৰ লোকে।
অভিযোগ অনুসৰি, টংলাৰ উত্তৰ জংঘলপাৰাৰ নৱম শ্ৰেণীত অধ্যয়নৰত কিশোৰীগৰাকী অইন দিনাৰ দৰে ১০ নৱেম্বৰৰ পুৱাৰ ভাগত কুলশী নৈত গা ধুবলৈ গৈছিল। সেই সময়ত কিশোৰীগৰাকী অকলে থকাৰ সুযোগ লৈ গাঁৱখনত কাম কৰিবলৈ অহা ৰাজমিস্ত্ৰী উৎপল দাসে তেওঁক নৈৰ পাৰৰ ঝাৰণিলৈ টানি লৈ যায় আৰু অপকৰ্মৰ অপচেষ্টা চলায় বুলি অভিযোগ উত্থাপন হৈছে।
কিশোৰীগৰাকীয়ে চিঞৰ-বাখৰ কৰাত অভিযুক্তই গামোচাৰে তেওঁৰ ডিঙি চিপি অচেতন কৰি নৈৰ পাৰৰ ঝাৰণিতে পেলাই থৈ যোৱাৰ অভিযোগ উঠিছে। ইফালে, কিশোৰীগৰাকী ঘৰলৈ উভতি অহাত পলম হোৱা দেখি পৰিয়ালৰ লোকসকলে বিচাৰ-খোচাৰ আৰম্ভ কৰে। বিচাৰি গৈ তেওঁলোকে নৈৰ পাৰৰ ঝাৰণিত কিশোৰীগৰাকীক অচেতন অৱস্থাত উদ্ধাৰ কৰে। পিছত কিশোৰীগৰাকীৰ চেতনা ঘূৰি অহাৰ পাছত পৰিয়ালৰ লোকে সোধা-পোছা কৰাত ঘটনাৰ বিষয়ে জানিব পাৰে।
অভিযোগ অনুসৰি, অভিযুক্ত ৰাজমিস্ত্ৰীজনৰ নাম উৎপল দাস (৪২)। তেওঁৰ ঘৰ টংলাৰ নিকটৱৰ্তী ভুকলী কাণ্ডা গাঁৱত বুলি জানিব পৰা গৈছে। ঘটনাৰ পিছতে কিশোৰীগৰাকীৰ পৰিয়ালে টংলা আৰক্ষীক অৱগত কৰে। অভিযুক্তৰ বিৰুদ্ধে কঠোৰতম শাস্তি প্ৰদানৰ দাবী জনাইছে পৰিয়ালৰ লোকে। ইতিমধ্যে আৰক্ষী ঘটনাস্থলীত উপস্থিত হৈ তদন্ত আৰম্ভ কৰিছে। এগৰাকী নাবালিকাৰ সৈতে সংঘটিত এই জঘন্য ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
