অসম লাইভ২৪ঃ ভাৰতে নোৱাৰিলে। টি-২০ বিশ্বকাপৰ ছেমিফাইনেলৰ পৰাই বিদায় ল’লে টিম ইণ্ডিয়াই। ইংলেণ্ডৰ হাতত আত্মসমৰ্পণ কৰে ভাৰতীয় দলটোৱে।
টি-২০ ফৰমেটত ১৬৮ ৰান কৰা ইমান সহজ টাৰ্গেটো নাছিল। ইংলেণ্ডে ইমান অনায়াসে এই টাৰ্গেট পূৰ কৰিব সেয়া টিম ব্লুৱে ভাৱিবই পৰা নাছিল। খেলৰ প্ৰতি উদ্যম যেন হেৰুৱাই পেলাইছিল ভাৰতীয় টিমে। খেলৰ প্ৰতি যি তীব্ৰতা সেয়া যেন কৰোবাত কমি গ’ল ভাৰতীয় দলটোৰ। বিনাশকালত বুদ্ধিনাশ হোৱাৰ দলে হ’ল ভাৰতীয় দলটোৰ। ৪ অভাৰ বাকী থাকোতেই ভাৰতে বান্ধি দিয়া টাৰ্গেট সম্পূৰ্ণ কৰে ইংলেণ্ডৰ দলটোৱে। বিনা উইকেটতেই ইংলেণ্ডে ১৭০ ৰান কৰি ফাইনেলত প্ৰৱেশ কৰিছে। বাটলাৰে অপৰাজিত ৮০ ৰান কৰাৰ লগতে হেলছেও অপৰাজিত ৮৬ ৰান কৰে।
দেওবাৰে বিশ্বকাপৰ ফাইনেলত ইংলেণ্ডৰ মুখামুখি হ’ব পাকিস্তান। ১৯৯২ চনৰ সেই দিনটোৰেই যেন এইবাৰ আকৌ পুনৰাবৃত্তি ঘটিব। সেইবাৰো মেলবৰ্ণত ইংলেণ্ডক হৰুৱাই বিশ্বচেম্পিয়ন হৈছিল পাকিস্তান। তাতকৈয়ো গুৰুত্বপূৰ্ণ কথা যে সেইবাৰো পাকিস্তানে ছেমিফাইনেলত নিউজিলেণ্ডক পৰাস্ত কৰিয়েই ফাইনেলত প্ৰৱেশ কৰিছিল। অৱশ্যে এইবাৰ ট্ৰফী কাৰ হাতলৈ যাব সেই কথা দেওবাৰেহে স্পষ্ট হ’ব।
২০১৩ চনৰ পাছত এটাও আইচিচি টুৰ্নামেণ্ট জিকিবলৈ সক্ষম হোৱা নাই ভাৰতীয় দলটোৱে। মহেন্দ্ৰ সিং ধোনীৰ নেতৃত্বত সেইবাৰেই যি চেম্পিয়ন ট্ৰফী জিকিছিল তাৰ পাছত আৰু কোনো টুৰ্নামেণ্টতেই জয়ী হোৱা নাই ভাৰতীয় দলটো। আইচিচি বিশ্বকাপৰ পৰা এইবাৰো খালী হাতে উভতিছে টিম ব্লু।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
