অসম লাইভ ২৪ঃ ১৪ জানুৱাৰীত বিশ্বজুৰি সূৰ্য নমস্কাৰ প্ৰদৰ্শন কাৰ্যসূচীৰ বাবে প্ৰস্তুতি সম্পূৰ্ণ কৰিছে আয়ুষ মন্ত্ৰ্যালয়ে। কেন্দ্ৰীয় আয়ুষ মন্ত্ৰী সৰ্বানন্দ সোণোৱালে জানিবলৈ দিয়ে যে শুকুৰবাৰে ১ কোটি লোকে সূৰ্য নমস্কাৰ প্ৰদৰ্শনীত অংশগ্ৰহণ কৰিব পাৰিব। স্বাধীনতাৰ ৭৫ তম বৰ্ষ উপলক্ষে এই প্ৰদৰ্শনীত মানুহৰ অংশগ্ৰহণ চৰকাৰীভাৱে ৭৫ লাখ নিৰ্দ্ধাৰণ কৰা হৈছিল যদিও অংশগ্ৰহণকাৰীৰ সংখ্যা নিৰ্দ্ধাৰিত লক্ষ্যক অতিক্ৰম কৰিব বুলি কেন্দ্ৰীয় চৰকাৰে আশা কৰিছে।
এখন ভাৰ্চুৱেল সংবাদ মেলত কেন্দ্ৰীয় মন্ত্ৰী সোণোৱালে কয় যে সূৰ্য নমস্কাৰে জীৱনীশক্তি বৃদ্ধি কৰাৰ লগতে শৰীৰত প্ৰতিৰোধ ক্ষমতা বৃদ্ধি কৰাটো এক প্ৰমানিত সত্য। ইয়ে কৰ’না প্ৰতিৰোধত সহায় কৰিব পাৰে। লগতে তেখেতে কয়, ‘আমাৰ কাৰ্যসূচীত অংশগ্ৰহণৰ বাবে ৭৫ লাখ লোকৰ লক্ষ্য নিৰ্দ্ধাৰণ কৰা হৈছে। কিন্তু পঞ্জীয়ন তথা আমাৰ প্ৰস্তুতিৰ ফালৰ পৰা আমি এই কাৰ্যসূচীত ১ কোটিতকৈয়ো অধিক লোকে অংশগ্ৰহণ কৰিব বুলি আশা কৰিছো’।
এই কাৰ্যসূচীত দেশ-বিদেশৰ পৰা সকলো আগশাৰীৰ যোগ প্ৰতিষ্ঠান, ভাৰতীয় যোগ সংস্থা, নেশ্যনেল যোগ ফেডাৰেশ্যন, যোগ চাৰ্টিফিকেশ্যন ব’ৰ্ড, এফআইটি ইণ্ডিয়াকে ধৰি চৰকাৰী তথা বেচৰকাৰী সংস্থাই অংশগ্ৰহণ কৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
