গ্লেমাৰাছ IPLৰ সমাপ্তিৰ পিছতে ক্ৰিকেটৰ সবাটোকৈ পুৰণি সংস্কৰণটোলৈ ঘূৰি আহিছে টীম ইণ্ডিয়া। ক্ৰিকেটৰ দীঘলীয়া সংস্কৰণটোত আহিয়েই যেন হেৰুওৱা ছন্দ উভতাই পাইছে টীম ইণ্ডিয়াই। চণ্ডীগড়ৰ মুল্লানপুৰ ষ্টেডিয়ামত আফগানিস্তানৰ বিৰুদ্ধে অনুষ্ঠিত একমাত্ৰ টেষ্টখনৰ তৃতীয়টো দিনতেই এক ইনিংছ আৰু ৩০০ ৰানৰ বৃহৎ ব্যৱধানত জয়ী হৈছে শুভমন গিলৰ টীম ইণ্ডিয়া। এয়া ভাৰতৰ টেষ্ট ইতিহাসৰ সৰ্ববৃহৎ জয়। ইয়াৰ পূৰ্বে এই তালিকাৰ শীৰ্ষত আছিল ২০১৮ত ৰাজকোটত ৱেষ্ট ইণ্ডিজৰ বিৰুদ্ধে খেলা মেচখন। মেচখনত টীম ইণ্ডিয়াই ৱেষ্ট ইণ্ডিজৰ বিৰুদ্ধে এক ইনিংছ আৰু ২৭২ ৰানৰ ব্যৱধানত জয়লাভ কৰিছিল। চলিত মেচখনত টীম ইণ্ডিয়াই টছত জয়ী হৈ প্ৰথম ইনিংছত ৮ উইকেটৰ বিনিময়ত সংগ্ৰহ কৰিছিল ৫৬৪ ৰান। ৫৬৪ ৰানত টীম ইণ্ডিয়াৰ কেপ্টেইন গিলে ইনিংছ ঘোষণা কৰি আফগানিস্তানক বেটিঙৰ বাবে আমন্ত্ৰণ জনায়।
টীম ইণ্ডিয়াৰ হিমালয়সদৃশ ৰানৰ পাহাৰ সমুখত লৈ ক্ৰিজলৈ অহা আফগানিস্তানৰ বেটাৰসকলে প্ৰথমৰ পৰাই বিপৰ্যয়ৰ সন্মুখন হয়। আফগানিস্তানৰ বেটিং লাইনআপত ক্ষুৰধাৰ আক্ৰমণ কৰা টীম ইণ্ডিয়াৰ মূল নায়ক আছিল আন্তঃৰাষ্ট্ৰীয় ক্ৰিকেটত অভিষেক ঘটোৱা বাওঁহতীয়া স্পীনাৰ মানৱ সুথৰ। মানৱ সুথৰে মাত্ৰ ৩৩ ৰান খৰছ কৰি আলহী দলটোৰ ৬ গৰাকীকৈ বেটাৰক দেখুৱায় পেভিলিয়নৰ ৰাস্তা। প্ৰথম ইনিংছত মানৱ সুথৰৰ উপৰিও প্ৰসিদ্ধ কৃষ্ণায়ো ৩৭ ৰানৰ বিনিময়ত দখল কৰে ৩ টা উইকেট। আফগানিস্তানে প্ৰথম ইনিংছত আটাইকেইটা উইকেটৰ বিনিময়ত ১৫২ ৰান সংগ্ৰহ কৰি ফলো অনৰ সন্মুখীন হোৱাত পুনৰবাৰ বেটিঙৰ বাবে আমন্ত্ৰণ লাভ কৰে। প্ৰথম ইনিংছত আফগানিস্তানৰ একমাত্ৰ ৰহমত শ্বাহে অৰ্ধশতকৰ দেওনা পাৰ কৰিবলৈ সংক্ষম হয়। ৰহমত শ্বাহে ১৩৫টা বল খেলি সংগ্ৰহ কৰে ৬০ ৰান। দ্বিতীয় ইনিংছতো আলহী দলটোৰ একেই দুৰ্বল প্ৰদৰ্শন অব্যাহত ৰাখি মাত্ৰ ১১২ ৰানতে হেৰুৱাই আটাইকেইটা উইকেট। দ্বিতীয় ইনিংছত ৱাশ্বিংটন সুন্দৰে ৩৬ ৰানত ৪টা আৰু কুলদ্বীপ যাদৱে ৩০ ৰান খৰচ কৰি দখল কৰে ৩টা উইকেট। দ্বিতীয় ইনিংছত মানৱ সুথৰেও এটা উইকেট দখল কৰে।
ইয়াৰ পূৰ্বে টীম ইণ্ডিয়াৰ কেপ্টেইন শুভমন গিলে ১২৬ আৰু কে এল ৰাহুলৰ ১০০ ৰানৰ বিনিময়ত টীম ইণ্ডিয়াই সংগ্ৰহ কৰিছিল ৫৬৪ ৰান। গিল-ৰাহুলৰ উপৰিও ছাই সুদৰ্শন আৰু ঋষভ পণ্টে ৮১ ৰানকৈ আৰু ৱাশ্বিংটন সুন্দৰে ৫২ ৰান সংগ্ৰহ কৰিছিল। আফগানিস্তানৰ মহম্মদ ছালেমে দখল কৰে ৬টা উইকেট। প্ৰথম ইনিংছত ৬টা উইকেট আৰু ২৮ ৰান আৰু দ্বিতীয় ইনিংছ এটা উইকেট দখল কৰা নৱাগত মানৱ সুথৰ দিয়া হয় প্লেয়াৰ অব দ্য মেচৰ সন্মান।
এই বাতৰিটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
