আমেৰিকাৰ প্ৰেছিডেণ্ট ডোনাল্ড ট্ৰাম্পে যুদ্ধবিৰতিক কথা ঘোষণা কৰাৰ পাছতেই হৰমুজ প্ৰণালী খুলিছিল ইৰানে৷ কিন্তু সেই প্ৰণালী খুলি দিয়াৰ কেইঘণ্টাৰ ভিতৰতেই আকৌ বন্ধ কৰি দিলে তেহৰানে৷ যুদ্ধবিৰতি ঘোষণা কৰাৰ পাছতো লেবাননত আক্ৰমণ চলাইছে ইজৰায়েলে৷ সেই অভিযোগতেই আকৌ হৰমুজ প্ৰণালী বন্ধ কৰিলে ইৰানে৷ ইয়াৰ সৈতে আমেৰিকাৰ বিৰুদ্ধেও যুদ্ধবিৰতি লঙ্ঘনৰ অভিযোগ তুলিছে তেহৰানে৷
দু’সপ্তাহৰ বাবে যুদ্ধবিৰতিৰ কথা কৈছিল আমেৰিকাৰ প্ৰেচিডেণ্টে৷ যদিও ইজৰায়েলৰ প্ৰধানমন্ত্ৰী বেঞ্জামিন নেতানিয়াহুৰ দাবী, যুদ্ধবিৰতিৰ আওঁতাত কেতিয়াও নপৰে লেবানন৷ বুধবাৰে লেবাননত আক্ৰমণ চলাইছে ইজৰায়েলে৷ এই আক্ৰমণত মৃত্যু হৈছে কমেও ২০০ জন লোকৰ৷ লেবাননত এই আক্ৰমণ আৰু ধ্বংসযজ্ঞৰ নিন্দা কৰি উদ্বেগ প্ৰকাশ কৰিছে ৰাষ্ট্ৰপুঞ্জৰ মানৱাধিকাৰবিষয়ক হাইকমিছনাৰ ফলকাৰ টুৰ্কই৷ ইৰানৰ সৈতে যুদ্ধবিৰতিত সন্মত হোৱাৰ মাত্ৰ কেইঘণ্টাৰ ভিতৰত এনে আক্ৰমণ অবিশ্বাস্য বুলি মন্তব্য কৰিছে তেওঁ৷ লেবাননত ইজৰায়েলৰ আক্ৰমণ অব্যাহত ৰখাৰো ইংগিত দিছে নেতানিয়াহুৱে৷
এই ঘটনাৰ পাছতেই আকৌ হৰমুজ প্ৰণালী বন্ধ কৰি দিছে ইৰানে৷ সংবাদমাধ্যম সূত্ৰৰ খবৰ অনুসৰি লেবাননত আক্ৰমণ কৰাৰ পাছতেই আমেৰিকাৰ বিৰুদ্ধে যুদ্ধবিৰতি লংঘনৰ অভিযোগ তুলিছে ইৰানে৷ তেহৰানে জনাইছে যুদ্ধ আৰু যুদ্ধবিৰতি দুটা একেলগে চলিব নোৱাৰে৷ যিকোনো এটা ৱাছিংটনে বাচি লওক৷ ইৰানৰ অভিযোগ যে ১০ দফাৰ চৰ্তৰ ভিত্তিত যুদ্ধবিৰতিৰ সিদ্ধান্ত লোৱা হৈছিল৷ তাৰমাজত তিনি দফা লঙ্ঘিত হৈছে৷ ইয়াৰোপৰি ইৰানত ড্ৰোণ আক্ৰমণ কৰা বুলিও অভিযোগ দিছে ইৰানে৷
ইৰানৰ এক সংবাদমাধ্যমৰ উদ্ধৃতি দি ৰয়টাৰ্ছে জনাইছে যে ইৰানে আকৌ হৰমুজ প্ৰণালী সম্পূৰ্ণৰূপে বন্ধ কৰাৰ কাৰণে বিভিন্ন দেশৰ তেলবাহী জাহাজসমূহ আকৌ উভতি যাবলৈ বাধ্য হৈছে৷ ইৰানৰ বিদেশমন্ত্ৰী আব্বাছ আৰঘচিয়ে কৈছে, ইৰান আৰু আমেৰিকাৰ যুদ্ধবিৰতিৰ চৰ্ত স্পষ্ট৷ কিন্তু সেয়া মনা হোৱা নাই৷ লেবাননত কৰা আক্ৰমণৰ কথাও উল্লেখ কৰিছে তেওঁ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
