ইছৰোৰ সাফল্য অব্যাহত। ইতিমধ্যেই মহাকাশত কেইবাটাও গৱেষণা চলাইছে ইছৰোই। এতিয়াও বহু গৱেষণাৰ কাম বাকী আছে বুলি জনাইছে ইছৰোই। সাফল্যৰ মাইলফলক চুবলৈ এতিয়াও বহু বাকী। বহুতেই আশা কৰিছে যে পোহৰৰ গতিৰ দৰেই স্পীডত আগুৱাইছে ইছৰো। বিগত কেইটামান মাহৰ ভিতৰত বহু উন্নতি কৰিছে ভাৰতীয় মহাকাশ গৱেষণা সংস্থাই।
২৩ চনৰ ২৩ আগষ্টত ইতিহাস তৈয়াৰ কৰিলে ইছৰোই। চন্দ্ৰৰ দক্ষিণ মেৰুত বিশ্বৰ ভিতৰত প্ৰথম ভাৰতেই সফলভাৱে অৱতৰণ কৰিছে। সামগ্ৰিকভাৱে চতুৰ্থ দেশ হিচাপে চন্দ্ৰ পৃষ্ঠত ভাৰতৰ বিক্ৰম আৰু ৰোভাৰ প্ৰজ্ঞানে অৱতৰণ কৰিছে। টাস্ক শেষ কৰি চন্দ্ৰ পৃষ্ঠত শুই পৰিছিল দুই সহোদৰ। ক্ষীণ আশা আছিল চন্দ্ৰপৃষ্ঠত আকৌ সুৰ্যোদয় হওঁতে সাৰ পাব পাৰে বিক্ৰম আৰু প্ৰজ্ঞানে। বিজ্ঞানীৰ সেই আশা পূৰ্ণ নহ’লেও নিৰ্দিষ্ট কাম ১০০ শতাংশই সম্পূৰ্ণ কৰিছে চন্দ্ৰযান-৩য়ে। এই সফলতাৰ পাছতেই বিজ্ঞানীৰ আশা দুগুণে বৃদ্ধি পাইছে। ইছৰোৰ মতে নিসন্দেহে চন্দ্ৰলৈ মানুহ পঠিয়াব পৰা হ’ব। ২০২৪ ৰ ভিতৰতেই এই কাম সম্পন্ন কৰিব ইছৰোৱে। ২০৪০ চনৰ মাজত এই মিছনক সফল কৰাৰ নিৰ্দেশ দিছে খোদ প্ৰধানমন্ত্ৰী নৰেন্দ্ৰ মোদীয়ে।
মাত্ৰ ১৭ বছৰৰ মাজত অসম্ভৱক সম্ভৱ কৰি চন্দ্ৰৰ মাটিত কেনেকৈ ভৰি দিব ভাৰতীয় নভোশ্বৰে? নতুন প্ৰযুক্তি ইমান সোনকালে ডেভেলপ কেনেকৈ কৰিব ভাৰতে? বিষয়টো নিসন্দেহে কঠিন যদিও অসম্ভৱ নহয় বুলি জনাইছে ইছৰোৱে।
চন্দ্ৰলৈ মানুহ পঠিওৱাত কি কি চেলেঞ্জৰ সন্মুখীন হ’ব?
বিজ্ঞানীমহলৰ মতে, প্ৰথমতে চন্দ্ৰলৈ মানুহ পঠিয়াবলৈ দৰকাৰ হ’ব এটা শক্তিশালী মানুহ কঢ়িয়াব পৰা মহাকাশযানৰ। চন্দ্ৰযান-৩ মিছনৰ মেৰুদণ্ড আছিল LVM-3 ৰকেট। এই ৰকেটে নিম্ন কক্ষপথত ১০০০০ কিঃগ্ৰাঃ পৰ্যন্ত ওজন কঢ়িয়াই নিব পাৰে। কিন্তু ২০৪০ চনলৈ মানুহ পঠিওৱাৰ সপোন পূৰণ কৰিবলৈ ইছৰোক প্ৰয়োজন হ’ব ছুপাৰ লিফ্ট ক্ষমতাসম্পন্ন মহাকাশযানৰ। যি মহাকাশযানৰ লিফট কেপাচিটি হ’ব ১ লাখ কিঃগ্ৰাঃৰো বেছি। দ্বিতীয়তে ছেমি ক্ৰয়োজেনিক আৰু ক্ৰায়োজেনিক ইঞ্জিনসমূহৰ এটা ভাৰসাম্যপূৰম সংমিশ্ৰণৰ দৰকাৰ।
বৰ্তমান ভাৰতৰ হাতত বিশাল কোনো লঞ্চ যান নাই। সেয়ে চন্দ্ৰলৈ মানুহ পঠিয়াবৰ বাবে অতি উচ্চ ক্ষমতাসম্পন্ন ৰকেট তৈয়াৰ কৰিব লাগিব। এই সকলোবোৰেই অৱশ্যে নিৰ্ভৰ কৰিছে গগণযানৰ সফলতাৰ ওপৰত। গগণযান মিছনত মহাকাশচাৰীক পৃথিৱীৰ নিম্ন কক্ষপথত ৪০০ কিঃমিঃ উচ্চতালৈ পঠিওৱা হ২ব। এই বিশেষ যানখনৰ নাম হৈছে গগণযান। কেইবাটাও পৰীক্ষা নিৰীক্ষা চলোৱাৰ অন্তত পৃথিৱীলৈ যানখনক ঘূৰাই অনা হ’ব। এই মিছন যদি সফল হয় তেন্তে ভৱিষ্যতে চন্দ্ৰলৈ মানৱযান পঠিয়াবলৈ সহজ হ’ব। প্ৰকৃতপক্ষে এই যানেই হৈছে ভাৰতৰ মনুষ্যবাহী চন্দ্ৰ অভিযানৰ মেৰুদণ্ড। চন্দ্ৰত মানুহ পঠিওৱাৰ পূৰ্বে বিস্তৰ গৱেষণাৰ প্ৰয়োজন। কেৱল মানুহ পঠিয়াই দিলেই নহ’ব। মহাকাশচাৰীক আকৌ পৃথিৱীলৈ নিৰাপদে ওভটাই অনাৰো ব্যৱস্থা ৰাখিব লাগে। বিষয়টোক লৈ প্ৰচুৰ গৱেষণাৰ প্ৰয়োজন আছে। এই গৱেষণাৰ বাবেই বেচৰকাৰী সংস্থাৰো প্ৰয়োজন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
