কিছুদিন পূৰ্বে GenZক লৈ অভিনেত্ৰী তথা সাংসদ কংগনা ৰানাৱটৰ মন্তব্যক লৈ প্ৰতিক্ৰিয়া প্ৰকাশ কৰিছিল যোগগুৰু বাবা ৰামদেৱে। ৰাষ্ট্ৰীয় সংবাদ মাধ্যমৰ এটা অনুষ্ঠানত কংগনাৰ মন্তব্যৰ সমালোচনা কৰি তেওঁ যুৱপ্ৰজন্মক ‘গাটাৰ জেনেৰেচন’ বুলি কোৱাটো লেতেৰা মানসিকতাৰ পৰিচায়ক বুলি মন্তব্য কৰিছিল। এই মন্তব্যৰ পিছতে এইবাৰ বাবা ৰামদেৱক কঠোৰ ভাষাৰে প্ৰত্যুত্তৰ দিছে কংগনা ৰানাৱটে।
নিজৰ ইনষ্টাগ্ৰাম ষ্ট’ৰীত বাবা ৰামদেৱৰ বক্তব্য সম্পৰ্কীয় সংবাদ মাধ্যমৰ এটা স্ক্ৰীণশ্বট শ্বেয়াৰ কৰি কংগনাই লিখিছে, “বাবাজী, মোৰ যৌৱন আৰু শোৱা কোঠাৰ বিষয়ে দিবাস্বপ্নত নাথাকিব। উৰাবাতৰি আৰু গুজৱৰ ভিত্তিত যিকোনো ব্যক্তিয়েই যিকোনো কথা ধৰি ল’ব পাৰে। অন্ততঃ মোক মিছা আৰু অপপ্ৰচাৰমূলক দাবীৰ বাবে উচ্চতম ন্যায়ালয়ে ধমক দিয়া নাই। এয়া সত্য, এয়া কোনো গুজৱ নহয়।” কংগনাৰ এই মন্তব্যৰ পিছতে দুয়োৰে মাজৰ বাকযুদ্ধই নতুন চৰ্চাৰ সৃষ্টি কৰিছে।
কংগনাক লৈ কি কৈছিল বাবা ৰামদেৱে?
‘TV9 ভাৰতবৰ্ষ সত্তা সন্মিলন উত্তৰাখণ্ড’ অনুষ্ঠানত বাবা ৰামদেৱক কংগনা ৰানাৱটৰ GenZ সম্পৰ্কীয় মন্তব্যৰ বিষয়ে প্ৰশ্ন কৰা হৈছিল। ইয়াৰ উত্তৰত তেওঁ কংগনাৰ অতীত আৰু ব্যক্তিগত জীৱনক লৈও মন্তব্য কৰে। বাবা ৰামদেৱে কয়, “তেওঁৰ অৰ্হতা কেনেকুৱা? শৈশৱ কেনেকুৱা আছিল? যৌৱন কেনেকুৱা আছিল? অতীতৰ শোষণ কেনেকুৱা আছিল? মই এনে মানুহৰ কথা ক’ব নিবিচাৰো।” ইয়াৰ পিছতে তেওঁ যুৱপ্ৰজন্মক ‘নলাৰ প্ৰজন্ম’ বুলি কোৱাটোও সমালোচনা কৰে। তেওঁৰ মতে, কোনো যুৱপ্ৰজন্মক এনেদৰে অভিহিত কৰাটো লেতেৰা মানসিকতাৰ পৰিচায়ক আৰু সংশ্লিষ্ট দলৰ সদস্যসকলে এই কথাটো গুৰুত্বসহকাৰে বিবেচনা কৰা উচিত।
অনুষ্ঠানটোত কংগনা ৰানাৱট বাবা ৰামদেৱৰ যোগৰ অনুৰাগী আৰু নিজকে সনাতনী বুলি পৰিচয় দিয়ে বুলি উল্লেখ কৰা হৈছিল। ইয়াৰ উত্তৰত বাবা ৰামদেৱে কয় যে কোনোবাই তেওঁৰ প্ৰশংসা কৰিলে বা যোগৰ প্ৰশংসা কৰিলে বুলিয়েই তেওঁ সেই ব্যক্তিৰ ভুল বা অপৰাধ ঢাকি ৰাখিব নোৱাৰে। তেওঁ লগতে কয় যে যুৱপ্ৰজন্মৰ ভিতৰত সমাজৰ সকলো শ্ৰেণীৰ লোকৰ সন্তান আছে—ব্ৰাহ্মণ, ক্ষত্ৰিয়, বৈশ্য, দলিত, জনজাতি আৰু অনুসূচিত জাতিৰ যুৱক-যুৱতীও ইয়াৰ অংশ। সেয়ে সমগ্ৰ যুৱপ্ৰজন্মক একেলগে লক্ষ্য কৰি কোনো নেতিবাচক মন্তব্য কৰা উচিত নহয় বুলি তেওঁ মত প্ৰকাশ কৰে। বাবা ৰামদেৱৰ মতে, বৰ্তমানৰ যুৱপ্ৰজন্ম এটা বৃহৎ শক্তি আৰু এই শক্তিক কোনো কাৰণতে অস্বীকাৰ কৰিব নোৱাৰি। ইফালে, বাবা ৰামদেৱৰ এই বক্তব্যৰ প্ৰতিক্ৰিয়াত কংগনাই ব্যক্তিগত জীৱন আৰু যৌৱনক লৈ মন্তব্য কৰাৰ বাবে তেওঁক কঠোৰ ভাষাৰে সমালোচনা কৰিছে। ফলত দুয়োৰে মাজৰ এই বাক-বিতণ্ডাই সামাজিক মাধ্যমতো যথেষ্ট চৰ্চা লাভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
