ৰাজ্যত আজিৰে পৰা আৰম্ভ ৰাস মহোৎসৱ, উখল-মাখল হাউলী-নলবাৰীৰ পৰা আৰম্ভ কৰি মাজুলীলৈ
আজি ১৫ নৱেম্বৰ কাতি মাহৰ পূৰ্ণিমা তিথি। এই পূৰ্ণিমাৰ পৰাই ৰাজ্যত পালন কৰা হয় শ্ৰীকৃষ্ণৰ ৰাস মহোৎসৱ। উজনি-নামমি সকলোতে ৰাইজৰ ভিৰ, কৃষ্ণৰ ৰাসলীলা উদযাপনৰ বাবে।
উজনি আৰু নামনিৰ ৰাসৰ মাজত বহু পাৰ্থক্য দেখিবলৈ পোৱা যায়। উজনিৰ ৰাস অভিনয়কেন্দ্ৰিক, য’ত কৃষ্ণৰ লীলা বোৰ ভাওনাৰ জৰিয়তে দেখুওৱা হয় আনহাতে নামনিৰ ৰাস মূৰ্তিকেন্দ্ৰিক। নামমিৰ নলবাৰী, শুৱালকুছি, ৰামদিয়া, হাউলী, টিহু, পলাশবাৰী আদি অঞ্চলৰ ৰাস মহোৎসৱ উল্লেখনীয়।
ৰাসোৎসৱ মাজুলীৰ দক্ষিণপাট সত্ৰত প্ৰথমে আৰম্ভ হৈছিল। ১৭৬২ শকৰ পৰা দক্ষিণপাট সত্ৰত ৰাসোৎসৱ উদ্যাপন হৈ আহিছে। অসমৰ সত্ৰসমূহত বৈদিক ক্ৰিয়াকাণ্ড আৰু নাট্যৰূপে ৰাসোৎসৱ উদ্যাপন হয়। দক্ষিণপাট সত্ৰৰ পিছতহে গড়মূৰ, আউনীআটী, বেঙেনাআটী, কমলাবাৰী, ভোগপুৰ আদি সত্ৰলৈ ৰাসৰ প্ৰসাৰ ঘটে।
নামনিৰ হাউলী ৰাসত এইবাৰ ১ কোটি ৭৮ লাখ টকাৰ বাজেটেৰে প্ৰায় ১ হাজাৰ মৃন্ময় মুৰ্ত্তিৰ লগতে এক ব্যত্তিক্ৰমী চিন্তাধাৰাৰে লেজাৰ শ্ব’ আৰু এনিমেছনৰ জৰিয়তে ভক্ত দৰ্শনাৰ্থীক মনোৰঞ্জন প্ৰদানৰ প্ৰয়াস কৰা কৰা হ’ব।
এইবাৰ ১৫ ৰ পৰা ২৯ নৱেম্বৰলৈ পোন্ধৰদিনীয়া বৰ্ণাঢ্য কাৰ্যসূচীৰে অনুষ্ঠিত হ’ব হাউলী ৰাস মহোৎসৱ। নলবাৰী হৰি মন্দিৰ প্ৰাংগনৰ ৰাসোৎসৱো এইবেলি ১৫ দিনীয়া কাৰ্যসূচীৰে আৰম্ভ হব আজিৰে পৰা। য’ত ৰাজ্যৰ প্ৰতিখন থিয়েটাৰ গোষ্ঠীয়ে অংশ লোৱাৰ লগতে বৃহৎ মীনা বজাৰৰো আয়োজন হব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
