অসম লাইভ২৪ঃ কাহিনীৰ দৰে কথাবোৰ! শৈশৱ-কৈশোৰত অসহনীয় দাৰিদ্ৰতা, ক্ষুধাৰ যন্ত্ৰনা। পঢ়াশুনাৰ বাবে প্ৰয়োজনীয় ধন যোগাৰ কৰিব নোৱাৰিয়েই আধাতেই বাদ দিছিল আনুষ্ঠানিক শিক্ষা। অৰ্থ, প্ৰাচুৰ্য্য নাথাকিলেও আছিল জীৱনত কিবা এটা কৰাৰ অদম্য হেপাঁহ। পেটৰ ভাতমুঠিৰ বাবে হোটেলত কাম কৰাৰ ওপৰিও কৰিছিল বিড়ি বন্ধাৰ কাম। কেৰালাৰ অখ্যাত এখন গাওঁৰ পৰা গৈ সুৰেন্দ্ৰন কে পেটেল এতিয়া আমেৰিকাৰ টেক্সাছৰ ডিষ্ট্ৰিক্ট জাজ। এদিন বিড়িৰ বন্ধাৰ কাম কৰি ভাত মোকলোৱা সুৰেন্দৰ কেনেকৈ পালেগৈ আমেৰিকা?
কেৰালাৰ পৰা আমেৰিকা যাত্ৰা মসৃণ নাছিল সুৰেন্দৰৰ। কেৰালাৰ কাছাৰগড়ত জন্মলাভ কৰা সুৰেন্দ্ৰন কে পেটেলে টেক্সাছৰ জিলা আদালতৰ ন্যায়াধীশ হৈয়েই সংবাদ মাধ্যমৰ সন্মুখত দিয়া মন্তব্যত কয়, ‘মোৰ এই যাত্ৰা মুঠেও মসৃণ নহয়। দশম শ্ৰেণী উত্তীৰ্ণ হোৱাৰ পাছত ঘৰৰ পৰা মোক আৰু পঢ়োৱাৰ খৰচ দিব নোৱাৰো বুলি ঘৰৰ পৰা স্পষ্টকৈ জনাই দিয়ে। ব্যধ্য হৈয়েই মই আনুষ্ঠানিক শিক্ষা বাদ দিলো। আৰম্ভ হয় জীৱন সংগ্ৰাম। কিতাপ পত্ৰৰ সৈতে সম্পৰ্ক বিচ্ছেদ কৰি বিড়ি তৈয়াৰ কৰা কামত সোমালো। তাতেই আৰম্ভ হৈছিল জীৱনমুখী এটা মন। কিবা এটা কৰাৰ মন।’
সেই যে জীৱনত কিবা এটা কৰাৰ মন, দৃঢ় মনৰ সুৰেন্দ্ৰনৰ কাষত থিয় দিলে তেওঁৰ বিশেষ এজন বন্ধু। বন্ধুৰ সাহায্যতেই পুনৰ পঢ়া-শুনা আৰম্ভ কৰে সুৰেন্দ্ৰনে। কেৰালাৰ পৰাই আইনৰ ডিগ্ৰী গ্ৰহণ কৰে। আইনৰ ডিগ্ৰী লোৱাৰ পাছতেই কেৰালাৰে এখন কৰ্টত প্ৰেকটিছ কৰে সুৰেন্দ্ৰনে। সপোন সাৰ্থক হৈছিল যদিও কৰোবাত যেন ইয়াতকৈয়ো বেছি কিবা এটা কৰি পেলোৱাৰ মন। হঠাতেই সুৰেন্দ্ৰনে মন বান্ধিলে নাই তেওঁ আমেৰিকালৈ যাব। ভৱামতেই সুৰেন্দ্ৰনে উৰা মাৰিলে আমেৰিকালৈ। আমেৰিকাৰ টেক্সাছ কৰ্টত প্ৰেকটিছ আৰম্ভ কৰে সুৰেন্দ্ৰনে।
শেহতীয়াভাৱে সুৰেন্দ্ৰনে যেতিয়া ন্যায়াধীশ পদৰ বাবে প্ৰতিদ্বন্দিতা কৰিছিল তেতিয়া বহু সমালোচনাৰো সন্মুখীন হৈছিল। ভাৱিবই পৰা নাছিল সুৰেন্দ্ৰনে এই নিৰ্বাচনত প্ৰতিদ্বন্দিতা কৰি সফল হ’ব। কিন্তু সকলোৰে ধাৰণাক ভুল প্ৰমাণিত কৰি জয়ী হ’ল সুৰেন্দ্ৰন। এই যাত্ৰাত সফল হৈ সুৰেন্দ্ৰনে দেশৰ নৱপ্ৰজন্মক উদ্দেশ্যি কয়, ‘কেতিয়াও কাকো নিজৰ ভৱিষ্যত নিৰ্ধাৰণ কৰিবলৈ নিদিব। নিজৰ ভৱিষ্যতৰ দায়িত্ব সদায়ে নিজৰ হাতত।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
