বৰ্তমানলৈকে পেৰিছ অলিম্পিকৰ উদ্বোধনী অনুষ্ঠান আয়োজিত হোৱা নাই৷ এইবাৰ প্ৰথমবাৰৰ বাবে উদ্বোধনী অনুষ্ঠানৰ পূৰ্বেই আৰম্ভ হৈছে খেল৷ কিন্তু টুৰ্নামেণ্ট আৰম্ভণিৰ প্ৰথম দিনটোতেই পেৰিছ অলিম্পিকত দেখা গৈছে একাধিক বিতৰ্ক৷ প্ৰথমেই আৰ্জেণ্টিনা বনাম মৰক্কো মেচ বিতৰ্ক বিশ্বজুৰি আলোচনাৰ কেন্দ্ৰবিন্দু হৈ উঠিছিল৷ এইবাৰ আকৌ ফ্ৰান্সৰ এগৰাকী মহিলা এথলিটে হিজাব পৰিধান কৰাৰ বাবেই বৰ্ণবৈষম্যৰ বলি হৈছে৷ ফৰাছী মহিলা দৌৰবিদ ছুনকাম্বা ছিলাই অনা অভিযোগ অনুসৰি কাইলৈ অৰ্থাৎ শুকুৰবাৰে আয়োজিত হ’বলগীয়া অলিম্পিকৰ উদ্বোধনী অনুষ্ঠানত তেওঁক হিজাব পিন্ধি সেই অনুষ্ঠানত ভাগ ল’ব নোৱাৰিব বুলি নিৰ্দেশনা দিয়া হৈছে৷ অন্যহাতে ফৰাছী অলিম্পিক কমিটিৰ স্পষ্ট মত যে এই বিষয়টোক লৈ তেওঁলোকে তদন্ত কৰা আৰম্ভ কৰিছে৷
উল্লেখ্য যে ২৬ বছৰীয়া দৌৰবিদ ছুনকাম্বাই এইবাৰ অলিম্পিক টুৰ্নামেণ্টত ৪০০ মিটাৰ দৌৰ প্ৰতিযোগিতাত অংশগ্ৰহণ কৰিব৷ তেওঁ ফ্ৰান্সৰ মহিলা আৰু মিক্সড দলৰ সদস্য৷ উদ্বোধনী অনুষ্ঠানত প্ৰৱেশাধিকাৰ নোপোৱাৰ অভিযোগ তুলি তেওঁ কয়, ‘অলিম্পিক টুৰ্ণামেণ্টৰ বাবে মোৰ নাম নিৰ্বাচিত হৈছে৷ এই প্ৰতিযোগিতা মোৰ নিজা দেশত অনুষ্ঠিত হৈছে অথচ নিজ দেশৰ খেলুৱৈৰ ওপৰতেই নিষেধাজ্ঞা৷ মোৰ ভুল এটাই মই হিজাব পিন্ধো৷ কেৱল হিজাব পৰিধান কৰাৰ বাবেই মোক উদ্বোধনী অনুষ্ঠানত অংশগ্ৰহণ কৰাতো বাধা দিয়া হৈছে৷’
বুধবাৰে ফৰাছী অলিম্পিক কমিটিৰ চেয়াৰমেন ডেভিড লেপাৰ্টিয়েন্টে কয় যে, ফ্ৰান্সে সকলোসময়তে এথলিটসকলৰ ধৰ্মনিৰপেক্ষতাৰ ওপৰত জোৰ দি আহিছে৷ এই নিয়ম দেশৰ প্ৰতিটো ক্ষেত্ৰতেই সমানভাৱে তেওঁলোকে প্ৰযোজ্য কৰিবলৈ যত্ন কৰিছে৷ এই সিদ্ধান্তৰ কাৰণেই হিজাব পৰিধানৰ ওপৰত বিধি-নিষেধ আৰোপ কৰা হৈছে৷
সমাধানৰ চেষ্টা অব্যাহত
ডেভিড লেপাৰ্টিয়েন্টে লগতে কয় যে তেওঁলোকে এই অভিযোগৰ দ্ৰুত সমাধানৰ বাবে ইতিমধ্যে আলোচনা চলাইছে৷ ইয়াৰ সমাধান অচিৰেই উলিওৱা হ’ব৷ ফ্ৰান্সৰ ধৰ্মনিৰপেক্ষতাক আঘাত লগা কাম তেওঁলোকে কৰিব নোৱাৰে৷ ইয়াৰোপৰি এথলিটৰো যাতে ব্যক্তিগত সিদ্ধান্তক সমানভাৱে সন্মান দিয়া হয় সেই কথাক নজৰ দিহে সিদ্ধান্ত লোৱা হ’ব৷ এই বিতৰ্কিত বিষয়টোক লৈ সামাজিক মাধ্যমতো পোষ্ট কৰিছে পেৰিছ অলিম্পিক আয়োজক সংস্থাই৷ এই পোষ্টত অলিম্পিক টুৰ্নামেণ্টত অংশগ্ৰহণকাৰী একাধিক এথলিটে সমৰ্থন জনাইছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
