অসম লাইভ ২৪ঃ লতা দিদি কুশলে আছেনে? সম্প্ৰতি মুম্বাইৰ ব্ৰীচ কেণ্ডি হাস্পতালত চিকিৎসাধীন হৈ থকা ভাৰত গৌৰৱ লতা মংগেশকাৰক উদ্বিগ্নতা বৃদ্ধি পাইছে অনুৰাগীসকলৰ মাজত৷ কিয়নো বিগত সপ্তাহতে ক’ৰোনাৰ লগতে নিউম’নিয়াত আক্ৰান্ত কোকিলকণ্ঠী গায়িকাগৰাকী এইপৰ্যন্ত অন্য লোকক সাক্ষাৎ কৰাৰ পৰা বাৰণ কৰি ৰাখিছে হাস্পতাল কৰ্তৃপক্ষই৷
ভাৰত মানেই যেন লতা মংগেশকাৰ৷ চিৰবৈৰী পাকিস্তানৰ ৰাজনৈতিক নেতায়ো ধেমালিৰ ছলেৰে এদিন কৈয়ে দিছিল- আপোনালোকে আমাক লতা মংগেশকাৰক দিয়ক, আমি কাশ্মীৰ আপোনালোকক দিম৷ এনে এগৰাকী জনসন্মোহিনী কণ্ঠৰ অধিকাৰীৰ স্বাস্থ্যৰ অৱনতিয়ে সীমাৰ পৰিধি ভাঙি পাকিস্তান, বাংলাদেশ, ভূটান, নেপাল আদি চুবুৰীয়া দেশতো গুণমুগ্ধৰ হা-হুমুনিয়াহ পৰিলক্ষিত হৈছে৷ দিদিয়ে ভাল পাইছেনে, আকৌ সুস্থ হৈ দিদিয়ে গাবনে তেওঁলোকৰ প্ৰিয় গীত?
এই উদ্বিগ্নতা-উত্তেজনাৰ মাজতে ব্ৰীচ কেণ্ডি হাস্পতাল কৰ্তৃপক্ষই স্পষ্ট কৰি দিছে যে দিদিৰ স্বাস্থ্য অপৰিৱৰ্তিত হৈ আছে৷ মহাৰাষ্ট্ৰৰ স্বাস্থ্যমন্ত্ৰী ৰাজেশ টোপে সংবাদ মাধ্যমৰ সন্মুখত সদৰী কৰা মতে লতা দিদিৰ স্বাস্থ্যৰ কিছু উন্নতি হৈছে৷ খুব কম দিনৰ ভিতৰত সুস্থ হ’ব দিদি৷ চিকিৎসক আৰু মন্ত্ৰীৰ এই ঘোষণাৰ পাছতো আশ্বস্ত হ’ব পৰা নাই অনুৰাগীসকল৷ ৯২ বছৰীয়া শিল্পীগৰাকী সোনকালে সুস্থ হওক৷
এই কামনাৰে মুম্বাই-দিল্লীতে নহয়, চিকাগো-লণ্ডন আদিতো চলিছে দিদিৰ আৰোগ্যৰ প্ৰাৰ্থনা৷ আন এটা সূত্ৰই দাবী কৰা মতে, সম্প্ৰতি স্বাস্থ্যৰ অৱনতি ঘটিছে মংগেশকাৰৰ৷ যাৰ বাবে চিকিৎসকৰ বিশেষ পৰ্যবেক্ষণত ৰখা হৈছে তেওঁক৷ আনকি লতা মংগেশকাৰৰ নিজা ঘৰতো আৰোগ্যৰ আশাৰে পৰিয়াল তথা আত্মীয়-কুটুম্বই নেদেখাজনৰ ওচৰত আগবঢ়াইছে পূজা-অৰ্চনা৷ ভগ্নী আশা ভোশলেয়ে লতা দিদিৰ আশু আৰোগ্য কামনাৰে লৰ্ড শিৱা ৰুদ্ৰ পেলেচত অনুষ্ঠিত পূজাৰ ছবিও শ্বেয়াৰ কৰিছে৷ দিদি ভাল হওক৷
দিদি জীয়াই থাকক৷ লতা দিদি বিহীন হিন্দুস্তান, দিদি বিহীন বলীউড কোনে বাৰু কল্পনা কৰিব! সেয়ে পাকিস্তানৰ দৰে ভাৰতবিৰোধী দেশতো লতা বন্দনাৰে আৰোগ্য কামনা কৰা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
