অসম লাইভ২৪ঃ ধীৰে ধীৰে কমিছে দূৰত্ব। আৰু মাত্ৰ ১৮মিটাৰ খান্দিলেই উদ্ধাৰ কৰিব উত্তৰকাশীৰ ভঙা সুৰংগত আৱদ্ধ থকা ৪১গৰাকী শ্ৰমিকক। বুধবাৰে এই কথা প্ৰকাশ কৰিলে উত্তৰাখণ্ডৰ প্রশাসনিক বিষয়াই। উত্তৰাখণ্ডৰ প্রশাসনিক বিষয়াৰ দাবী, ‘আৰু মাত্ৰ ২৪ ঘণ্টা ড্ৰিলিং কৰিলেই আহিব ভাল খবৰ!’ তেওঁ জনোৱামতে সুৰংগত আৱদ্ধ ৪১ শ্ৰমিকক বাহিৰলৈ উলিয়াই আনিবলৈ ২০ মিটাৰতকৈ কম দূৰত্ব ড্ৰিলিং কৰিলেই হ’ব। উত্তৰাখণ্ডৰ পৰিবহণ বিভাগৰ উচ্চপদস্ত বিষয়া মাহমুদ আহমেদে জনোৱামতে, ‘বুধবাৰে দুপৰীয়া ১ বজাৰ পৰা সুৰংগৰ মুখ বন্ধ কৰি ৰখা শিল খান্দি থকা হৈছে। দুঘণ্টাৰ ভিতৰতেই ১৮ মিটাৰ খনন কৰা হৈছে। এই সন্দৰ্ভত মাহমুদ আহমেদে কয়, ‘আমি জনাবলৈ সুখী হৈছো. ৩৯ মিটাৰ পৰ্যন্ত শিল ভঙা হৈছেই। আমি শ্ৰমিকক উদ্ধাৰ কৰাৰ পথ প্ৰায় মসৃণ হৈ পৰিছে। আমাৰ অনুমান ৫৭ মিটাৰ তলত শ্ৰমিকসকল আৱদ্ধ হৈ আছে। আৰু মাত্ৰ ১৮ মিটাৰ বাকী আছে। যদি কোনো বাধা নাহে তেন্তে বুধবাৰে নিশা বা বৃহস্পতিবাৰে পুৱা ডাঙৰ খবৰ লাভ কৰিব।’
আহমেদে লগতে কয়, ‘শিল ভাঙি সুৰংগৰ পৰা উদ্ধাৰকাৰীসকলক বাহিৰলৈ অনাৰ বাবে ঢালাই কৰা পাইপ সোমোৱাই দিয়া হৈছে। আৰু সেই প্ৰক্ৰিয়াটোৰ বাবেই আমাক সময় অলপ বেছি লাগিছে। ঝালাই কৰিবলৈকে বেছি সময় লাগিছে। খননৰ বাবে বেছি সময় নালাগে। মঙলবাৰে নিশাৰ পৰা বৰ্তমানলৈকে ১৮ মিটাৰ পাইপ সোমোৱাই দিবলৈ প্ৰায় ১৫ঘণ্টা সময় লাগিছে। এটা পৃথক পাইপ সুৰংগৰ ভিতৰক ২১ মিটাৰ পৰ্যন্ত ঠেলি সোমোওৱা হৈছে। ড্ৰিলিং মেছিন বাৰে বাৰে বিকল হোৱাৰ বাবেও উদ্ধাৰ প্ৰক্ৰিয়া জটিল হৈছে। বিগত সপ্তাহত এটা মেচিন বল্ডাৰৰ মাজত সোমাই পৰিল। যাৰ ফলত টানিলেই সুৰংগ আকৌ খহিব বুলি ভয় কৰিয়েই ড্ৰিলিং স্থগিত কৰা হয়।’
সুৰংগত আৱদ্ধ শ্ৰমিকক ঔষধ, খাদ্য পুৰামাত্ৰাই যোগান ধৰি থকা হৈছে। মঙলবাৰে দুপৰীয়া শ্ৰমিকক খিচিৰি প্ৰেৰণ কৰা হৈছে। নিশাৰ খাদ্যত পোলাও, মটৰ পনিৰ আৰু দুখনকৈ ৰুটি দি থকা হৈছে। শ্ৰমিকৰ স্বাস্থ্যৰ কথা ভাৱিয়েই খাদ্য চিকিৎসকক সুধিহে প্ৰেৰণ কৰি থকা হৈছে। মঙলবাৰে নিশা পাইপেৰে ১৫০ পেকেট খাদ্য পঠোৱা হৈছে। শীঘ্ৰেই তেওঁলোকৰ মোবাইল, চাৰ্জাৰ, কাপোৰো পঠিওৱা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
