অসম লাইভ২৪ঃমৃত উপত্যকাত পৰিণত হৈছে বালাচূড়। চাৰিওফালে কৰাল মৰা তেজৰ চেকুৰা। কৰোবাৰ যদি চিঙা এখন ভৰি কৰোবাত আকৌ চিঙি যোৱা হাত, মুণ্ড ইত্যাদি। চাৰিওফালে মৃতদেহ। দুৰ্ঘটনাৰ প্ৰায় ২০ ঘণ্টাতকৈ অধিক সময় পাৰ হৈ গ’লেও এতিয়া বালাচূড়ত শুনা গৈছে আহতৰ মৰণকাতৰ চিঞৰ।
শুকুৰবাৰে নিশা ভয়াৱহ দুৰ্ঘটনাত পতিত হৈছিল কৰমণ্ডল এক্সপ্ৰেছ। যশৱন্তপুৰ-হাওড়া হামছফৰ এক্সপ্ৰেছ, হাওড়া-চেন্নাই চেণ্ট্ৰেল কৰমণ্ডল এক্সপ্ৰেছ আৰু মালগাড়ীৰ মাজত এই সংঘৰ্ষ হয়। দুৰ্ঘটনাত মৃত্যু হোৱা লোকৰ সংখ্যা প্ৰায় ৩০০ জনলৈ বৃদ্ধি হৈছে। আহত হৈছে ১০০০ ৰো অধিক লোকৰ। আহতসকলক ওড়িশাৰ বিভিন্ন হাস্পতালত ভৰ্তি কৰোৱা হৈছে। এফালে হাস্পতালত যদি বিচনাৰ অভাৱ ঘটিছে আনফালে হাস্পতালত ভিৰ কৰিছে স্থানীয় জনতাই।
এইসমূহৰ মাজতেই আন এক হৃদয়স্পৰ্শী দৃশ্য দেখা গৈছে ওড়িশাত। হাস্পতালৰ বাহিৰত দীঘলীয়া লাইন। ওড়িশাৰ বিভিন্ন স্থানৰ পৰা মানুহে আহি হাস্পতালত শাৰী পাতিছে। কিন্তু এই শাৰী চিকিৎসাৰ বাবে নহয়। এইসকল লোকে শাৰী পাতিছে ৰক্তদানৰ বাবে। বালাচুড়ৰ দুৰ্ঘটনাস্থলীত ঠায়ে ঠায়ে পৰি আছে তেজৰ কৰাল মৰা টুকুৰা। চাৰিওফালে ছিটিকি পৰি আছে আহত নিহত ট্ৰেইনযাত্ৰীৰ কাপোৰ, পোছাক বেগ আদি সামগ্ৰী। শুকুৰবাৰে নিশাৰে পৰাই যাত্ৰীক উদ্ধাৰ অভিযান অব্যাহত ৰাখিছে উদ্ধাৰকাৰী দলে। তেওঁলোকক লৈ যোৱা হৈছে বালাচুড়, কটক, ভুৱনেশ্বৰকে ধৰি আশেপাশে থকা হাস্পতালসমূহত। আহতসকলৰ অধিকাংশৰেই অৱস্থা অতি সংকটজনক। এই পৰিস্থিতিত আহতসকলক চিকিৎসা কৰিবৰ পাৰে বহু পৰিমানৰ তেজৰ প্ৰয়োজন আছে। তেজৰ অভাৱত যাতে আৰু কাৰোৱেই মৃত্যু নহয় তাৰবাবে আগুৱাই আহিছে ওড়িশাৰ স্থানীয় বাসিন্দাসকল। ৰক্তদানৰ বাবে লাইন ধৰিছে স্থানীয় লোকসকলে। কেৱল যে স্থানীয় বাসিন্দাসকলেই আহিছে তেনে নহয়। আৰক্ষীৰ লোকসকলেও ৰক্তদানৰ বাবে ওলাই আহিছে।
বিপদৰ সময়ত মানুহেই মানুহৰ কাষত থিয় দিয়ে, এয়াই মানৱতা। যিসকলে ৰক্তদান কৰিবলৈ আহিছে তেওঁলোকৰ মুখতো একেই কথা। অধিকাংশই সংবাদমাধ্যমৰ আগত এই সন্দৰ্ভত কৈছে, ‘আহতসকলক হাস্পতালত ভৰ্তী কৰোৱা হৈছে। আমি তেওঁলোকক একো সহায় কৰিব নোৱাৰিলেও অন্তত অলপমান তেজ দিয়েই তেওঁলোকৰ জীৱন ৰক্ষাত সহায় কৰিব পাৰো। আশা কৰিছো আমাৰ তেজেৰে অন্তত কেইজনমান লোক জীয়াই উঠক। সকলো ওলাই আহক। মানুহ হিচাপে আমি এইখিনি মানৱীয়তা ৰখাটো খুবেই প্ৰয়োজন।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
