অসম লাইভ ২৪ঃ কন্যা মমতা বেনাৰ্জী। দৰা ছ’চিয়েলিজম। ১৩ জুন দেওবাৰে শুভ-বিবাহ। হয়, আপুনি ঠিকেই পঢ়িছে। মমতা বেনার্জী বিয়াত বহিব ছ’চিয়েলিজমৰ সৈতে। বিয়া হ’ব তামিলনাডুৰ চালেম জিলাত। ভাইৰেল হৈছে বিয়াৰ কার্ড। তামিল ভাষাত নিমন্ত্ৰণী-পত্ৰ। অৱশ্যে, আপুনি ভবা মমতা বেনার্জী গৰাকীৰ বিয়া নহয়। বিয়া তামিলনাডুৰ মমতা বেনার্জী নামৰ এগৰাকী যুৱতীৰহে আৰু দৰাৰ নামটোও ছ’চিয়েলিজম। কাহিনী তাতেই শেষ হোৱা নাই। ছ’চিয়েলিজম নামৰ যুৱকজনৰ দুজন ভাতৃ আছে। এজনৰ নাম কমিউনিজম, আনজনৰ নাম লেনিনিজম। ইফালে, কমিউনিজমৰ কণমানি পুত্ৰৰ নাম মার্ক্সিজম। এই ৩ পুত্ৰ আৰু নাতি মার্ক্সিজমক লৈ মোহন নামৰ এজন ব্যক্তিৰ পৰিয়াল। তামিলনাডুৰ চালেম জিলাৰ cpiৰ জিলা সম্পাদক মোহনৰ জনোৱা মতে তেওঁৰ পৰিয়াল দীঘৰ্দিন ধৰি সমাজতন্ত্ৰত বিশ্বাসী। মোহন নিজে পৰিয়ালটোৰ চতুৰ্থ প্ৰজন্ম। ৯০ দশকত ছোভিয়েট ৰাছিয়া ভংগ হওঁতে মোহনৰ পত্নী আছিল গৰ্ভৱতী। সেয়ে প্ৰথম সন্তানৰ নাম ৰাখিলে কমিউনিজম। দ্বিতীয়বাৰ এটা মিছা গোচৰত আত্মগোপন কৰি থাকোতে জন্ম হ’ল লেনিনিজিমৰ। তাৰ পাছত জন্ম ছ’চিয়েলিজিমৰ। আনহাতে, কন্যা মমতাৰ পৰিয়াল কংগ্ৰেছী। ২০ বছৰ পূৰ্বে কংগ্ৰেছতে আছিল পশ্চিমবংগৰ বৰ্তমানৰ মুখ্যমন্ত্ৰী মমতা বেনাৰ্জী। সেই সময়ত মমতাৰ প্ৰতি অনুৰক্ত হৈয়ে পৰিয়ালটোৱে কন্যাৰ নাম ৰাখিছিল তেওঁৰ নামেৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
