অসম লাইভ২৪ঃ বিধ্বংসী ভূমিকম্পত তছনছ নেপালৰ বিস্তীৰ্ণ এলেকা। বৃহৎ ভূঁইকপৰ পাছতেই ১৫৯ বাৰ কঁপিছে নেপালৰ মাটি। ইয়াৰোপৰি জাতীয় ভূমিকম্প পৰ্যবেক্ষণ আৰু গৱেষণা কেন্দ্ৰ নেশ্ব্যনেল আৰ্থকুইক মনিটৰিং এণ্ড ৰিচাৰ্ছ চেন্টাৰৰ তৰফৰ পৰা দিয়া হৈছে বিশেষ সতৰ্কবাণীও। ভূমিকম্প পৰ্যবেক্ষণ আৰু গৱেষণা কেন্দ্ৰই জনোৱা অনুসৰি শুকুৰবাৰে নিশা ভূমিকম্পৰ পাছতেই বৰ্তমান পৰ্যন্ত ১৫৯ বাৰ মূল কম্পনৰ পৰবৰ্তী কম্পন বা আফটাৰশ্বক অনুভূত হৈছে। বাঢ়িছে আতংকও। সংবাদ সংস্থা পিটিআইৰ প্ৰতিবেদন অনুসৰি মূল ভূমিকম্প আৰু আফটাৰশ্বকৰ আতংকত বহু মানুহে নিজৰ ঘৰত প্ৰৱেশ কৰিবলৈকো ভয় কৰিছে মৃত্যুভয়ে বহু মানুহকেই এতিয়াও খেদি আছে। দিনৰ পোহৰতো ঘৰৰ ভিতৰত সোমাবলৈ ভয় কৰিছে একাংশই।
চৰকাৰী হিচাপ অনুসৰি মৃতকৰ সংখ্যাই প্ৰায় ২০০ চুইছেগৈ। বহু মানুহ আহতও হৈছে। সুৰক্ষেত জিলা হাস্পতালত বেছিভাগ আহতৰ চিকিৎসা চলিছে। মৃত্যুৰ সংখ্যা আৰু বৃদ্ধি পাব পাৰে বুলি আশংকা কৰিছে প্ৰশাসনে। শুক্ৰবাৰে নিশা ১২ বজাত ভূমিকম্পত কঁপি উঠিছিল ভাৰতৰ প্ৰতিবেশী ৰাষ্ট্ৰ নেপাল। নেশ্ব্যনেল চেণ্টাৰ ফল ছেছম’লজিৰ তৰফৰ পৰা জনোৱা অনুসৰি ভূমিকম্পৰ উৎপত্তিস্থল হৈছে নেপালৰ জাজাৰকোটৰ ৰামিদণ্ডা। কম্পনৰ কেন্দ্ৰ মাটিৰ পৰা মাত্ৰ ১০ কিঃমিঃ গভীৰ আছিল। ৰিখটাৰ স্কেলত কম্পনৰ মাত্ৰা আছিল ৬.৮। নেপালৰ ভূমিকম্পৰ অভিঘাতত কঁপি উঠিছিল সুদূৰ দিল্লীৰ মাটিও। বেছ কিছু ক্ষণ ধৰি এই কম্পন অনুভূত হৈয়েই আছিল। ইয়াৰোপৰি ভূমিকম্পৰ কাৰণে এনচিআৰ, অযোধ্যাসহ উত্তৰ ভাৰতৰ বৃহৎ অংশৰ মাটিত কম্পন অনুভূত হৈছিল। লক্ষ্নৌ আৰু বিহাৰৰ বেছ কিছু অঞ্চলৰ মাটি কঁপি উঠিছিল। ভূমিকম্পৰ ফলত হোৱা ধ্বংসৰ কেইবাখনো ছবি ইতিমধ্যেই সামাজিক মাধ্যমত ভাইৰেলো হৈছে। নিশাৰ অন্ধকাৰতো মানুহৰ মুখৰ সেই আতংক ধৰা পৰিছে। কম্পনৰ ফলত ভাৰততো বহু লোকে নিজৰ বাসগৃহ এৰি পলোৱাও পৰিলক্ষিত হৈছে।
নেপালৰ সংবাদমাধ্যমৰ সূত্ৰৰ খবৰ অনুসৰি ভূমিকম্পই আঘাত কৰাৰ কিছুক্ষণৰ ভিতৰতেই কেইবাখনো ঘৰ খহি পৰিছিল। বহু লোকৰ বাসগৃহত ফাঁট মেলিছে। ধ্বংসস্তূপৰ মাজত চেঁপা খায়েই বহু মানুহৰ মৃত্যু হৈছে। সকলোতকৈ বেছি ক্ষতিগ্ৰস্থ হৈছে পশ্চিম ৰুকুম আৰু পাহাৰী জাজাৰকোট এলেকাৰ বাসিন্দাসকল। এই দুই এলেকা শ্মশানত পৰিণত হৈছে। দুই এলেকাত চাৰিওফালে এতিয়া কেৱল শুনা গৈছে আৰ্তনাদ।
নেপালৰ প্ৰধানমন্ত্ৰী পুষ্পকমল দাহালে ভূমিকম্পৰ ফলত হোৱা মৃত্যু আৰু ক্ষয়ক্ষতিক লৈ শোকপ্ৰকাশ কৰিছে। চিকিৎকৰ দল লগত লৈ ভূমিকম্প বিধ্বস্ত এলেকাসমূহ পৰিদৰ্শন কৰিছে। নেপাল সেনাবাহিনী আৰু নেপাল আৰক্ষীয়ে নিশাৰে পৰাই অব্যাহত ৰাখিছে উদ্ধাৰকাৰ্য। নেপালৰ প্ৰধানমন্ত্ৰীৰ কাৰ্যালয়ৰ তৰফৰ পৰা এক্সত কৰা পোষ্ট অনুসৰি, ‘শুকুৰবাৰে নিশা ১২ বজাত অহা ভূমিকম্পৰ ফলত মৃত্যু হোৱা আৰু ক্ষতি হোৱা সকলো পৰিয়ালক লৈ দুখ প্ৰকাশ কৰিছে প্রধানমন্ত্ৰী পুষ্পকমল দাহালে।’ উদ্ধাৰৰ কাম কেনেদৰে চলিছে সেই সন্দৰ্ভতো তেওঁ লিখিছে, ‘নেপালত হোৱা ভূমিকম্পৰ কাৰণে হোৱা প্ৰাণহানি আৰু ক্ষয় ক্ষতিকলৈ আমি গভীৰভাৱে শোকাহত। উদ্ধাৰৰ কাম আমি চলাই আছো।’
নেপালৰ কাষত থকাৰ বাৰ্তা দিছে ভাৰতৰ প্রধানমন্ত্ৰী নৰেন্দ্ৰ মোদীয়েও। এক্স হেণ্ডেলত পোষ্ট কৰি মোদীয়ে লিখিছে, ‘নেপালত হোৱা ভূমিকম্পৰ কাৰণে প্ৰাণহানি আৰু ক্ষয়ক্ষতি হোৱা লোকক লৈ আমি গভীৰভাৱে শোকাহত। নেপালৰ জনগণৰ কাষত ভাৰত আছে। নেপালক সাম্ভাব্য সকলো ধৰণৰ সহায় ভাৰতে কৰিব। আত্মীয়ক হেৰুওৱা পৰিয়ালৰ প্ৰতিও সমবেদনা জনাইছো। আহতসকলৰো দ্ৰুত সুস্থতাৰ বাবে প্ৰাৰ্থনা কৰিছো।’
উল্লেখ্য যে ২০১৫ চনৰ ২৫ এপ্ৰিলত ৰিখটাৰ স্কেলত প্ৰায় ৮ মাত্ৰাৰ এটা ভূমিকম্প আহিছিল। এই ভূইকঁপৰ কেন্দ্ৰস্থল আছিল গোৰ্খা জিলাৰ বাৰপাক। ভূমিকম্পৰ তাণ্ডৱত প্ৰায় ৯ হাজাৰ মানুহৰ মৃত্যুও হৈছিল। আহত হৈছিল প্ৰায় ২২ হাজাৰ মানুহ। হাজাৰ হাজাৰ ঘৰ, স্কুল তাচপাতৰ দৰে খহি পৰিছিল। মৃত্যুুপুৰীত পৰিণত হৈছিল নেপাল। সমগ্ৰ বিশ্ব সেই ভয়াৱহতাৰ সাক্ষীও হৈছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
