‘কন্যাই দেৰিকৈ বিয়া হোৱাৰ বাবেই বাঢ়িছে ধ*ৰ্ষণৰ দৰে ঘটনা’

শেহতীয়াকৈ এলাহাবাদ উচ্চ ন্যায়ালয়ে এক ৰায়ত কৈছিল যে-মুছলমান সমাজতো ১৮ বছৰৰ তলৰ কন্যাৰ বিয়া আইন বিৰুদ্ধ। এনে ক্ষেত্ৰত POCSO Actৰ অধীনত ব্যৱস্থা গ্ৰহণ কৰিব পাৰি। এলাহবাদ উচ্চ ন্যায়ালয়ৰ এই ৰায়ৰ পিছতে কন্যা সন্তানৰ বিৱাহ সন্দৰ্ভত অল ইণ্ডিয়া ইমাম এছ’চিয়েশ্যনৰ সভাপতি মৌলানা ছাজিদ ৰছিদীয়ে কৰা এক অদ্ভুত মন্তব্যই দেশজুৰি তীব্ৰ বিতৰ্কৰ সৃষ্টি হৈছে। অল ইণ্ডিয়া ইমাম এছ’চিয়েশ্যনৰ দৰে সংস্থা এটাৰ সভাপতিৰ দায়িত্বত থকাৰ পিছতো ৰছিদীয়ে কৰা মন্তব্যটোত কন্যা সন্তানৰ অধিকাৰ খৰ্ব হোৱাৰ উপৰিও ৰছিদীৰ ঠেক মানসিকতা প্ৰকাশ পাইছে বুলি দেশৰ বিভিন্ন প্ৰান্তত সমালোচনাত মুখৰ হৈছে নেতা-পালিনেতাৰ উপৰিও সাধাৰণ লোক।

কি কৈছিল মৌলানা ছাজিদ ৰছিদীয়ে?

এলাহবাদ উচ্চ ন্যায়ালয়ৰ ৰায়টোৰ পিছতে মৌলানা ছাজিদ ৰছিদীয়ে কৰা অদ্ভুত আৰু বিতৰ্কিত মন্তব্যটো আছিল এনেধৰণৰ- ‘কন্যা সন্তানে দেৰিকৈ বিয়া হোৱাৰ বাবেই ধ*ৰ্ষণৰ দৰে অপৰাধ বৃদ্ধি পাইছে। যদি কন্যাসকলৰ সুৰক্ষা নিশ্চিত কৰিব বিচাৰে, তেন্তে তেওঁলোকৰ বিয়া সময়মতে কৰাই দিয়ক।’
ৰছিদীৰ এই বিতৰ্কিত মন্তব্যৰ পিছতে তীব্ৰ সমালোচনাত মুখৰ হৈ পৰিছে দেশৰ কেইবাজনো বিজেপি নেতা। ঝাৰখণ্ড বিধানসভাৰ বিৰোধী দলপতি বাবুলাল মৰাণ্ডীয়ে ৰছিদীক উদ্দেশ্যি কয়,-‘যিসকলে সংবিধান অনুসৰি চলিব নিবিচাৰে, তেওঁলোকে দেশ এৰি যাব লাগে।’ আনহাতে বিজেপি নেতা চৈয়দ শ্বাহনৱাজ হুছেইনে কয়, ‘এই মন্তব্য অত্যন্ত দুৰ্ভাগ্যজনক। আমি ইয়াৰ কঠোৰ নিন্দা কৰোঁ। এনে বক্তব্যই সমগ্ৰ সম্প্ৰদায়ক বদনাম কৰে। ৰছিদীয়ে এনে মন্তব্যৰ বাবে ক্ষমা খোজা উচিত।’

বিতৰ্কৰ পিছত মন্তব্যটো সন্দৰ্ভত ৰছিদীৰ ব্যাখ্যা

ৰছিদীয়ে কৰা মন্তব্যটোৰ পিছতে আৰম্ভ হোৱা বিতৰ্কত তীব্ৰ ৰূপ লোৱাৰ পিছতে মৌলানা ছাজিদ ৰছিদীয়ে নিজৰ স্থিতি স্পষ্ট কৰে। ৰছিদীয়ে নিজৰ মন্তব্যৰ স্পষ্টীকৰণ দি কয় যে- বৰ্তমান সমাজত এনে বহু আইন প্ৰচলিত হৈছে য’ত একে লিংগৰ দুজন ব্যক্তিয়ে বিয়া কৰিব পাৰে বা বিৱাহিত মহিলাও আন এজন পুৰুষৰ সৈতে বসবাস কৰিব পাৰে। এনে পৰিস্থিতিত যদি কোনোবাই কন্যাসকলক সম্ভাব্য যৌ*ন অপৰাধৰ আশংকাৰ পৰা সুৰক্ষিত ৰাখিবলৈ বিচাৰে তেনে লোককহে নিজৰ কন্যা সন্তানক সোনকালে বিয়া দিয়াৰ পৰামৰ্শ দিয়া বুলি মন্তব্য কৰে ৰছিদীয়ে।

বিতৰ্কবোৰৰ পিছতে ৰছিদীয়ে কয়, “মোৰ বক্তব্যৰ ভুল বাখ্যা কৰা হৈছে। মই কেৱল বৰ্তমানৰ সামাজিক বাস্তৱতাৰ কথাহে কৈছিলোঁ।” ৰছিদীয়ে দাবী কৰে যে তেওঁ কোনো ৰাজনৈতিক উদ্দেশ্যেৰে নহয়, সামাজিক সংস্কাৰৰ স্বাৰ্থতেই এই মন্তব্য কৰিছিল। তেওঁৰ মতে, “শ্বৰীয়ত বা আন যিকোনো ধৰ্মত যি ভাল কথা কোৱা হৈছে, সেয়া মানি চলাত আপত্তি ক’ত? ইছলামত কোৱা হৈছে যে কন্যা প্ৰাপ্তবয়স্ক হোৱাৰ পিছত সময় মতে বিয়া কৰাই দিয়া উচিত।” নিজৰ বক্তব্যৰ সমৰ্থন কৰি ৰছিদীয়ে কয় যে ঝাৰখণ্ড, অসম, বিহাৰ, ত্ৰিপুৰা, মধ্যপ্ৰদেশ আৰু ৰাজস্থান আদি কেইবাখনো ৰাজ্যত এতিয়াও বাল্য বিৱাহৰ ঘটনা দেখা যায়। বহু পৰিয়ালে কম বয়সতে, বিশেষকৈ অশিক্ষিত কন্যাসকলক বিয়া কৰোৱাই দিয়ে। তেওঁ কয়, “সমাজত এই বাস্তৱ চিত্ৰ এতিয়াও আছে। ইছলামেও প্ৰাপ্তবয়স্ক হোৱাৰ পিছত সময়মতে বিয়া দিয়াৰ পৰামৰ্শ দিয়ে।” শেষত ৰছিদীয়ে স্পষ্টকৈ কয়, “মই কেতিয়াও ১৮ বছৰৰ তলৰ কন্যাৰ বিয়াৰ সমৰ্থন কৰা নাই। মোৰ বক্তব্যক বিকৃত কৰি প্ৰচাৰ কৰা হৈছে।”
এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ