অসম লাইভ২৪ঃ দিল্লী MCD নিৰ্বাচনৰ ফলাফল ঘোষণা৷ আম আদমী পাৰ্টীয়ে বিজেপিৰ ১৫ বছৰীয়া শাসনক উৎখাত কৰি নিজৰ দখললৈ আনিলে দিল্লীৰ শাসনৰ গাদী৷ দিল্লীত আম আদমী পাৰ্টীয়ে এমচিডি নিৰ্বাচনত বিপুল ভোটত জয়লাভ কৰিছে৷ বিজেপি দলেও দিল্লীৰ এই নিৰ্বাচনত নিজৰ অস্তিত্ব ৰক্ষাৰ বাবে চেষ্টা কৰিও সফল হ’ব নোৱাৰিলে৷ বিজেপি, কংগ্ৰেছেও তেওঁলোকৰ নিজা বিজয় দাবী কৰিছিল দিল্লীৰ এই নিৰ্বাচনত। কিন্তু সকলো দাবীৰ বিপৰীতে, প্ৰথমবাৰৰ বাবে, এমচিডিত আম আদমী পাৰ্টিৰ নিজা মেয়ৰ থাকিব। কিন্তু ইমান কেইগৰাকী হাইপ্ৰফাইল নেতাই নিৰ্বাচনী প্ৰচাৰ চলোৱাৰ পাছতো কিয় বিজেপিয়ে লাভ কৰিব নোৱাৰিলে সংখ্যাগৰিষ্ঠতা? এই বিষয়টোৱে এতিয়া দেশজুৰি লাভ কৰিছে চৰ্চা৷
বিজেপিৰ পৰাজয়ৰ কাৰণসমূহ
বিজেপি দলে ১৫ বছৰ ধৰি MCD-ত আছিল। বিজেপিয়ে তেওঁলোকৰ সন্মাুখত আপ নগণ্য বুলি গণ্য কৰিছিল৷ বহুদিন ধৰি বিজেপিৰ সাসনত থাকি দিল্লীবাসীয়েও কিছু পৰিবৰ্তন বিচাৰিছিল যাৰবাবে এইবাৰ দিল্লীবাসীয়ে আম আদমী পাৰ্টিক সুযোগ দিয়ে৷ আৱৰ্জনা আৰু পৰিষ্কাৰ পৰিচ্ছন্নতাৰ বিষয়বোৰক লৈয়েই বিজেপি আৰু আম আদমী পাৰ্টিৰ মাজৰ মূল ভোটযুদ্ধ চলিছিল৷ গাজীপুৰত আৱৰ্জনাৰ পাহাৰ, ৰাস্তাৰ দুৰাৱস্থা, যমুনা নদীত আৱৰ্জনা আদি বিষয়বোৰেও নিৰ্বাচনত বিজেপিৰ যথেষ্ট ক্ষতি সাধন কৰিছিল।
দিল্লীত অত্যাধিক ভিৰৰ সমস্যাটোৱে দিল্লীবাসীক সদায়ে অতিষ্ঠ কৰি আহিছে৷ অত্যাধিক ব্যৱসায়ীকৰণ, অবৈধ নিৰ্মাণ আৰু এমচিডিয়ে কাম কৰাৰ ধৰণে, বিশেষকৈ পুৰণি দিল্লী অঞ্চলৰ ঠেক পথক লৈ হতাশাত ভূগিছিল দিল্লীবাসী৷ এই কাৰণবোৰৰ বাবে বিজেপিয়ে এইবাৰ শাসনৰ গাদীৰ পৰা আঁতৰিব লগা হ’ল বুলি বহুতেই দাবী কৰিছে৷
দিল্লীত পাৰ্কিঙৰ সমস্যা অতি ভয়াৱহ সমস্যা৷ এক প্ৰতিবেদন অনুসৰি, দিল্লীত প্ৰতিদিনে গড়ে ৫৪৮ খন বাহন পঞ্জীয়ন কৰা হয়। ইয়াৰ ফলত, পাৰ্কিং লটত পাৰ্কিং কৰাটো জনতাৰ বাবে গুৰুত্বপূৰ্ণ সমস্যা হৈ পৰিছে৷ এই সমস্যাইয়ো দিল্লীবাসীক নতুন বিকল্পৰ বিষয়ে ভাবিবলৈ বাধ্য কৰে।
দিল্লীত প্ৰদূষণৰ সমস্যাই গুৰুতৰ ৰূপ ধাৰণ কৰিছে৷ বিজেপি আৰু আম আদমী পাৰ্টীয়ে ইয়াৰ বাবে ইটো দলে আনটো দলক দোষাৰোপ কৰি আহিছে। আপে এমচিডিক দোষাৰোপ কৰে, আনহাতে বিজেপিয়ে দোষাৰোপ কৰে আপক৷ এই বাকযুদ্ধৰ মাজতেই প্ৰদূষণৰ বাবে সমস্যাৰ সন্মুখীন হৈ আহিছে দিল্লীবাসীয়ে৷ প্ৰদূষণ নিয়ন্ত্ৰণৰ বাবে এমচিডিয়ে কোনো কাৰ্যপন্থা হাতত নোলোৱাৰ বাবেই বিজেপিৰ পৰাজয় ঘটা বুলিও একাংশ ৰাজনৈতিক বিশ্লেষকে দাবী কৰিছে।
দিল্লীৰ বিদ্যালয়সমূহৰ উন্নত অৱস্থা আৰু বিদ্যুৎ আৰু পানীৰ ওপৰত আম আদমী পাৰ্টিৰ ৰাজসাহায্যই আম আদমী পাৰ্টিক এই নিৰ্বাচনত জয়লাভ কৰাৰ বাবে পথ মসৃণ কৰি দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
