অইন ৫জন ভিখাৰীৰ দৰেই তেওঁ বাটি পাতি ভিক্ষা খোজে৷ নিয়মিত এটা স্থানত বাটি লৈ তেওঁ বহে৷ কিন্তু অইন ৫ভিখাৰীৰ দৰে বহিলেও তেওঁৰ কিছু বিশেষত্ব আছে৷ ভিক্ষা কৰিয়েই মাহিলী তেওঁ ৬০ৰ পৰা ৭৫ হাজাৰ টকা আয় কৰে৷ কেৱল সেয়াই নহয় আছে বহু কোটি কোটি টকাৰ সম্পত্তিও৷ ভিখাৰীৰ ইমান সম্পত্তি দেখি লাজ পাব আপুনিও৷
ভিখাৰীৰ সৈতে কোটিপতি শব্দটো আচহুৱা যেন নিশ্চয় লাগে৷ কিন্তু উপায় নাই পেছাক সন্মান দিয়েই আমি তেওঁক ভিখাৰী বুলি ক’বলৈ বাধ্য৷ শব্দৰ পৰিভাষা সলনি কৰা এই ব্যক্তি ভিখাৰী পেছাৰে এজন অতি ধনবান ব্যক্তি৷ ভাৰতৰেই এই ধনী ভিখাৰীৰ নাম হৈছে ভৰত জৈন৷ ভিক্ষাবৃত্তি কৰি ধনকুবেৰ ভৰত জৈন বিশ্বৰ সকলোতকৈ ধনী ভিখাৰী হিচাপে এতিয়া পৰিগণিত হৈছে৷ মুম্বাই চহৰৰ ছত্ৰপতি শিৱাজী টাৰ্মিনাছলৈ গ’লেই তেওঁক ভিক্ষা কৰি থকা দেখা যায়৷ কেতিয়াবা কেতিয়াবা তেওঁ গুচি আহে আজাদ ময়দানলৈকো৷ বৰ্তমান ভৰতৰ ১বা ২ কোটি নহয় প্ৰায় ৭ কোটিৰ সম্পত্তি আছে৷ সেই সম্পদৰ তালিকাত কি নাই? কোটি টকাৰ ওপৰিও আছে ২টাকৈ বিলাসী ফ্লেট৷ আৰৱ সাগৰৰ তীৰত মহাৰাষ্ট্ৰৰ থানে এলেকাত আছে দুখন ডাঙৰ দোকান৷
অৱশ্যে ভৰতৰ জীৱনৰ আৰম্ভণিটো ইমান মসৃণ নাছিল৷ সোণৰ চামুছ মুখত লৈ জন্ম হোৱা নাই ভৰত৷ সৰুৰে পৰা কোনোমতে ভাত এমুঠি পালেও মূৰৰ ওপৰত নাছিল কোনো ছাদ৷ অৰ্থৰ বাবে পঢ়াশুনাও কৰিব নোৱাৰিলে ভৰতে৷ তাৰপাছতেই পেছা হিচাপে বাচি লয় ভীক্ষাবৃত্তি৷ প্রথমে লাজ লাগিছিল যদিও পাছলৈ সেয়া সহজ হৈ পৰিল৷ যিদিনা যি ভিক্ষা পাইছিল তাৰ অৰ্ধেক ধন সঞ্চয় কৰিছিল৷ এনেকৈয়ে ধীৰে ধীৰে জমাবলৈ আৰম্ভ কৰে ধন৷ সঞ্চিত ভিক্ষাৰ অৰ্থৰেই কিনিছে দুখন দোকান৷ ভাড়াৰ বাবদ সেই দোকানসমূহৰ পৰা আহে মাহিলী ৩০ হাজাৰ টকা৷
মুম্বাইৰ পেৰেল এলেকাত থাকে এই ভিখাৰীজন৷ টকাৰ বাবে নিজে পঢ়াশুনা নকৰিলেও দুই সন্তানক নামী স্কুলত পঢ়াইছে৷ পৰিয়ালৰ অন্য সদস্যসকলে দোকানত কাম কৰে৷ কিন্তু এতিয়া পৰিপূৰ্ণ জীৱন হ’লেও ভিক্ষা পেছাক এৰিব পৰা নাই কোটিপতি ভিখাৰীয়ে৷ ভিক্ষা যে এতিয়া দেশত লাভজনক পেছা সেই কথাৰেই প্ৰমাণ দিছে ভীখাৰি ভৰতে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
