অসম লাইভ২৪ঃ বিশ্বকাপৰ পাছৰে পৰাই আলোচনাৰ কেন্দ্ৰ হৈ আছে মহম্মদ ছামী। পেছাৰ বলাৰ মহম্মদ ছামীৰ বিষয়ে জানিবলৈ বহুজনেই আগ্ৰহীও হৈ আছে। ক্ৰিকেটাৰ ছামীক বিশ্ব সৈতে পৰিচয় কৰাই দিয়াৰ আঁৰতেই আছে কলকাতা নাইট ৰাইডাৰ্ছ। ছামী পশ্চিমবংগৰ নহয় যদিও পশ্চিমবংগই গঢ় দিছিল আজিৰ এইজন মহম্মদ ছামীক। ছামী জন্মসূত্ৰে উত্তৰপ্ৰদেশৰ আমৰোহাৰ বাসিন্দা। ঘৰুৱা ক্ৰিকেট খেলাৰ বাবে কিন্তু উত্তৰপ্ৰদেশৰ পৰা সুযোগ পোৱা নাছিল ছামীয়ে। পশ্চিমবংগতেই আৰম্ভ হৈছিল ছামীৰ কেৰিয়াৰ। কেনেকৈ বঞ্চনা, অপমান সকলো অতিক্ৰমী ছামী এতিয়া ভাৰতীয় দলৰ অন্যতম খেলুৱৈ হ’ল সবিশেষ কাহিনী ছামীয়ে নিজেই জনাইছে।
উত্তৰপ্ৰদেশৰ বাটে ঘাটে বেট বল লৈ খেলি ফুৰা ছামীক চিনি উলিয়াইছিল ইডেন গাৰ্ডেন্সে। উত্তৰপ্ৰদেশতেই কেইবাজনো তাৰকা খেলুৱৈ যেনে, মহম্মদ কাইফ, সুৰেশ ৰায়না, কুলদীপ যাদৱ, পীয়ুষ চাওলা, প্ৰবীণ কুমাৰ, ভুৱনেশ্বৰ কুমাৰকে ধৰি উত্তৰপ্ৰদেশৰ বহু ক্ৰিকেটাৰেই ভাৰতীয় দলৰ হৈ খেলিছে। কিন্তু ছামীয়ে উত্তৰপ্ৰদেশৰ হৈ খেলৰ কেৰিয়াৰ আৰম্ভ কৰা নাছিল। এই সন্দৰ্ভত বৈষম্যৰ অভিযোগ তুলিছিল ছামীয়ে। পেছাৰ বলাৰ ছামীয়ে এই সন্দৰ্ভত কয়, ‘উত্তৰপ্ৰদেশত ট্ৰায়েলত দুবছৰ অংশ লৈছিলো। আৰম্ভণিতে সকলো ঠিকেই আছিল। ফাইনেল ৰাউণ্ড অহাত উত্তৰপ্ৰদেশৰ খেলুৱৈ টীমত মোক সুবিধা দিয়া নহ’ল। মোক চিধাকৈয়ে কৈ দিয়া হ’ল এই দলক তোমাৰ প্ৰয়োজন নাই।’ তাৰপিছৰ বছৰ ইয়াতকৈয়ো ভয়ংকৰ অভিজ্ঞতা হ’ল ছামীৰ। ছামীয়ে এই সন্দৰ্ভত কয়, ‘পিছৰ বছৰো একেই ঘটনা ঘটিল। প্ৰায় ১৬০০ লৰা ট্ৰায়েল দিবলৈ আহিল। তিনি দিন সকলোকে ট্ৰায়েল দিয়াই ৰঞ্জী ট্ৰফীৰ দল তৈয়াৰ কৰাৰো কথা আছিল। সেইবাৰ মোৰ সৈতে দাদাও আছিল। দাদাই মোৰ হৈ সেইদিনা খাটনি ধৰিছিল। মোক যাতে টীমত সুবিধা দিয়ে সেই কথাও জনাইছিল। কিন্তু শীৰ্ষ অধিকাৰীয়ে দাদাক যি কথা ক’লে সেই কথা মই জীৱনত পাহৰিব নোৱাৰিম। শীৰ্ষ অধিকাৰীয়ে দাদাৰ খাটনি শুনি পোনপটীয়াকৈ কৈছিল, তোমাৰ ভাইটীক আমি কোনো কাৰণতে সুযোগ দিব নোৱাৰিম। দাদাই তথাপিও কৈছিল যে, ছামীৰ খেল আপোনালোকে দেখিছে। সি শক্তিশালী। খেল সলনি কৰি দিব পৰা ক্ষমতা তাৰ আছে। যোগ্যতাৰ প্ৰমাণ দিবলৈ সুযোগৰ দৰকাৰ এই সুযোগ তাক এবাৰ দিয়ক। এই মন্তব্যৰ পাছতেই দাদাক শীৰ্ষকৰ্তাই কৈছিল, তোমাৰ ভাইটীকে কেনেকৈ কি খেলে সেই প্ৰতিভা চাই থাকিবলৈ আমাৰ সময় মুঠেও নাই। ইয়াত প্ৰতিভাৰ কথা নাই। দাদাই এই মন্তব্য শুনাৰ পাছত সেই শীৰ্ষকৰ্তাক কৈছিল, মোৰ পৰিয়ালৰ কোনো লোকে কেতিয়াও উত্তৰপ্ৰদেশৰ হৈ খেলত অংশ নলয়।’
দুবছৰীয়া দুৰ্বিসহ অভিজ্ঞতাৰ কথা নিজেই প্ৰকাশ কৰিছে ছামীয়ে। ছামীৰ ২০১০ চনৰ ১৭ নৱেম্বৰত ইডেনত আইপিএলেৰে অভিষেক ঘটে। এইবাৰ বিশ্বকাপত ছামীৰ খেলৰ যাদু দেখি উত্তৰপ্ৰদেশ চৰকাৰেও বাহ বাহ দিছে। ছামী উত্তৰপ্ৰদেশৰ বাসিন্দা বুলি গৌৰৱ কৰিছে যোগী আদিত্যনাথেও। তেঁঁওৰ নামেৰে এখন ক্ৰিকেট ষ্টেডিয়াম উত্তৰপ্ৰদেশত তৈয়াৰ কৰাৰ নিৰ্দেশ দিছে মুখ্যমন্ত্ৰী যোগী আদিত্যনাথে। বিশ্বকাপৰ ফাইনেলৰ পাছত ছামীক বুকুত সাবটি সান্তনা দিছে প্রধানমন্ত্ৰী নৰেন্দ্ৰ মোদীয়েও।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
