অসম লাইভ২৪ঃ প্ৰিয় নেতাক হেৰুৱাই শোকস্তব্ধ উত্তৰপ্ৰদেশ। মুলায়েম সিং যাদৱৰ মৃত্যুত তিনিদিনীয়া ৰাজ্যিক শোক পালন কৰিবলৈ ৰাজ্যবাসীক আহ্বান জনাইছে উত্তৰ প্ৰদেশৰ মুখ্যমন্ত্ৰী যোগী আদিত্যনাথে। উত্তৰ প্ৰদেশৰ ভুতপূৰ্ব মুখ্যমন্ত্ৰী মুলায়েম সিং যাদৱৰ শেষকৃত্য ক’ত কৰা হ’ব সেই সম্পৰ্কেও মন্তব্যত প্ৰকাশ কৰিছে যোগী আদিত্যনাথে। মুলায়েম সিং যাদৱৰ শেষকৃত্য তেওঁৰ পৈতৃক গাঁৱতেই কৰা হ’ব। ইপিনে সমাজবাদী পাৰ্টীৰ নেতা তথা এসময়ত উত্তৰ প্ৰদেশৰ মুখ্যমন্ত্ৰীৰ আসন শুৱনি কৰা মুলায়েম সিং যাদৱৰ মৃত্যু দেশৰ ৰাজনীতিতো বৃহৎ ক্ষতি বুলি উল্লেখ কৰিছে দেশৰ ৰাজনৈতিক মহলে। সম্পূৰ্ণ ৰাষ্ট্ৰীয় মৰ্যাদাৰে যাদৱৰ শেষকৃত্য অনুষ্ঠিত হ’ব।
মুখ্যমন্ত্ৰী যোগীয়ে তেওঁৰ টুইটত কয়,’প্ৰাক্তন মুখ্যমন্ত্ৰী মুলায়েম সিং যাদৱৰ মৃত্যু অন্ত্যন্ত দুখজনক। তেওঁৰ মৃত্যুত সমাজবাদৰ এটা প্ৰধান স্তম্ভ তথা সংগ্ৰামী যুগৰ অৱসান ঘটিছে। আমি তেওঁৰ বিদেহী আত্নাৰ কামনা কৰিছো। লগতে শোকসন্তপ্ত পৰিয়ালৰ লগতে তেওঁৰ সমৰ্থকসকললৈকো সমবেদনা জ্ঞাপন কৰিছো। মুলায়েম সিং যাদৱৰ মৃত্যুত উত্তৰ প্ৰদেশৰ চৰকাৰে তিনিদিনীয়া শোক পালনৰ সিদ্ধান্ত লৈছো। সম্পূৰ্ণ ৰাষ্ট্ৰীয় মৰ্যাদাৰে আমি তেওঁক বিদায় দিম।’
মুলায়েম সিং যাদৱৰ মৃত্যুত শোকবাৰ্তা প্ৰেৰণ কৰিছে প্ৰধানমন্ত্ৰী নৰেন্দ্ৰ মোদীয়েও। প্ৰধানমন্ত্ৰী মোদীয়ে টুইটযোগে কয়, ‘ দেশৰ জৰুৰী অৱস্থা চলি থকাৰ সময়ত গণতন্ত্ৰ ৰক্ষাৰ অন্যতম সৈনিকেই হৈছে মূলায়েম সিং যাদৱ। উত্তৰপ্ৰদেশ তথা দেশৰ ৰাজনীতিতেই মুলায়েম সিং যাদৱ এটা বৰ্ণিল চৰিত্ৰ। কেন্দ্ৰীয় প্ৰতিৰক্ষামন্ত্ৰী হিচাপেও তেখেতে দেশৰ বাবে সেৱা আগবঢ়াই থৈছে। সংসদীয় ৰাজনীতত যাদৱৰ চিন্তাধাৰা সদায়ে লেখত ল’বলগীয়া। জাতীয় স্বাৰ্থ ৰক্ষাক লৈ তেওঁৰ ভাৱধাৰা সদায়ে লেখত ল’বলগীয়া।’ মুলায়েম সিং যাদৱৰ সৈতে কটোৱা স্মৃতি ৰোমন্থন কৰি প্ৰধানমন্ত্ৰীগৰাকীয়ে কয়,’মুলায়েম জী মাটিৰ মানুহ আছিল। জনতাৰ সমস্যা তেওঁৰ দৃষ্টিত সদায়ে ওপৰত। দুখন বেলেগ বেলেগ ৰাজ্যৰ মুখ্যমন্ত্ৰী হৈ থাকোতেও আমি ৰাজ্যৰ সমস্যাসমূহক লৈ কথা-বাৰ্তাত মিলিত হৈছিলো। তেওঁ মৃত্যুৱে মোক মনোকষ্ট দিছে। মুলায়েমজীৰ লাখ লাখ অনুৰাগীৰ লগতে পৰিয়ালবৰ্গলৈ মই সমবেদনা জ্ঞাপন কৰিছো। ওঁম শান্তি।’
মুলায়েম সিং যাদৱৰ মৃত্যুত শোকবাৰ্তা প্ৰেৰণ কৰিছে কংগ্ৰেছ নেত্ৰী ছোনীয়া গান্ধী, তৃণমূল কংগ্ৰেছৰ নেতা মমতা বেনাৰ্জীকে ধৰি বহু নেতাই। শোকবাৰ্তাত ছোনীয়া গান্ধীয়ে লিখিছে,’কেন্দ্ৰীয় প্ৰতিৰক্ষা মন্ত্ৰী তথা উত্তৰ প্ৰদেশৰ মুখ্যমন্ত্ৰী হিচাপে ভাৰতৰ ৰাজনীতিত তেওঁৱ অৱদান চিৰস্মৰণীয়। দেশৰ ৰাজনীতিত সদায়ে তেওঁৰ নাম উচ্চাৰিত হৈয়েই থাকিব।’ আনহাতে তৃণমূল নেত্ৰী মমতা বেনাৰ্জীয়ে টুইটত লিখিছে,’সমাজবাদী পাৰ্টীৰ প্ৰতিষ্ঠাতা তথা জাতীয় ৰাজনীতিবিদ মুলায়েম সিং যাদৱৰ মৃত্যু দেশৰ ৰাজনীতিত অপুৰণীয় ক্ষতি। তেওঁৰ পৰিয়াললৈ মোৰ সমবেদনা।’
উল্লেখ্য যে মুলায়েম সিং যাদৱৰ মৃত্যুত শোকবাৰ্তা প্ৰেৰণ কৰিছে মুখ্যমন্ত্ৰী হিমন্ত বিশ্ব শৰ্মাইয়ো। মুখ্যমন্ত্ৰী শৰ্মাই লিখিছে,’মুলায়ম সিং যাদৱজীৰ মৃত্যু ভাৰতীয় ৰাজনীতিত বৃহৎ ক্ষতি। বহু দশক ধৰি তেওঁ দেশৰ লাখ লাখ লোকৰ হৃদয়ত বাস কৰিছে। মই তেওঁৰ মৃত্যুত সমবেদনা জনাবলৈ শব্দ হেৰুৱাইছো। তেওঁৰ পৰিয়ালবৰ্গ তথা সমূহ অনুৰাগীলৈ সমবেদনা জ্ঞাপন কৰিছো।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
