অসম লাইভ২৪ঃ মূৰত হিজাব। খালী ভৰি। পিঠিত এটা বেগ। বেগৰ ওপৰত লগোৱা আছে এখন গেৰুৱা ৰঙৰ পতাকা। এনেকৈয়ে খোজ লৈছে ছবনম শ্বেখে। এই যাত্ৰাত ছবনমৰ সংগী ৰমন ৰাজ শৰ্মা আৰু বিনীত পাণ্ডে। তেওঁলোকৰ গন্তব্যস্থান অযোধ্যা। ৰামক পাবৰ বাবেই ১,৪২৫ কিঃমিঃ খালী ভৰিৰে খোজ কাঢ়ি যাত্ৰা কৰিছে ছবনমে। ছবনমক এই যাত্ৰাত দেখি বহুতেই প্ৰশ্ন কৰিছে, মুছলমান যুৱতী হৈ ৰামৰ প্ৰতি আপোনাৰ ইমান অনুকম্পা কিয়? ইয়াৰ উত্তৰত ছবনমে সকলোকে কৈছে এটাই কথা, ‘ৰামৰ আৰাধনা কৰিবলৈ কেৱল হিন্দুৱেই হ’ব লাগিব বুলি কথা আছে নেকি? ৰাম অন্য কোনো ধৰ্মৰ লোকৰ বাবে আদৰ্শ হ’ব নোৱাৰে নেকি? মোৰ মতে ৰামক পূজা কৰিবলৈ হিন্দুৱেই হ’ব লাগিব বুলি কথা নাই।’
ছবনমে প্ৰতিদিনেই ২৫ ৰ পৰা ৩০ কিঃমিঃ খোজ কাঢ়ি যাত্ৰা কৰি আছে। এই প্ৰতিবেদন লিখি থকাৰ সময়ত ছবনমে মধ্যপ্ৰদেশৰ সিন্ধবায় এলেকা অতিক্ৰম কৰিছে। সামাজিক মাধ্যমত খুবেই ভাইৰেল হৈ পৰিছে ছবনম। বহুতেই এই যাত্ৰাক লৈ ছবনমক কটাক্ষও কৰিছে। মুছলমান হৈয়ো অযোধ্যালৈ কিয় গৈছে ছবনম? কিয় তেওঁ ৰামভক্ত, হাজাৰ প্ৰশ্ন, হাজাৰ কটাক্ষ। ছবনমৰ উত্তৰ এটাই, তেওঁৰ দুভৰিৰ যিমান পাৰি খৰকৈ লৈ যোৱা। কাৰণ ২২ জানুৱাৰীত তেওঁ অযোধ্যাত উপস্থিত হ’ব লাগিবই।
ছবনমে কটাক্ষৰ উত্তৰত বাৰে বাৰে কৈছে, ‘ৰামৰ পূজা কৰিবলৈ ধৰ্মৰ কথা নাহে। এজন ভাল মানুহ হ’লেই ৰাম আপোনাৰো উপাস্য দেৱতা হৈ পৰিব। ৰাম জাতি-ধৰ্ম-বৰ্ণ নিৰ্বিশেষে সকলোৰেই। কেৱল পুৰুষেই ৰামক উপাসনা কৰিব সেই কথাও নহয়। ৰাম নাৰীৰো উপাস্য হ’ব পাৰে।’
উল্লেখ্য যে, ছবনমৰ যাত্ৰাপথ কিন্তু নিষ্কণ্টক নহয়। পথৰ বিভিন্ন স্থানত তেওঁ বাধাৰ সন্মুখীন হৈছে। মুছলমান হৈয়ো কিয় অযোধ্যালৈ যাব সেই বিষয়টোক লৈয়েই বহুতে ক্ষোভ প্ৰকাশো কৰিছে। কিন্তু ছবনমক এই যাত্ৰাপথত সহায়ৰ বাবে আগুৱাই আহিছে আৰক্ষী। বহু স্থানত তেওঁ নিশা আৰক্ষী খানাতেই কটাইছে। আৰক্ষীসকলেই তেওঁক খাদ্যও যোগান ধৰিছে। মহাৰাষ্ট্ৰৰ এটা অতি সংবেদনশীল এলেকাৰ পৰা ওলাই অহাত আৰক্ষীয়ে তেওঁক সহযোগিতা আগবঢ়াইছে। ছবনমক একাংশ হিন্দু লোকে সমালোচনা কৰিলেও প্ৰায়সংখ্যকেই ছবনমক যাত্ৰাপথত দেখি চিঞৰিছে, ‘জয় শ্ৰী ৰাম।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
