নগাঁও লোকসভা সমষ্টিৰ উপ-নিৰ্বাচনৰ দিন চমু চাপি অহাৰ লগে লগে অসমত ৰাজনৈতিক উত্তাপো বৃদ্ধি পাইছে। নিৰ্বাচনী প্ৰচাৰত প্ৰাৰ্থী আৰু বিভিন্ন ৰাজনৈতিক দলৰ নেতাসকলে ইজনে সিজনক আক্ৰমণ-প্ৰত্যাক্ৰমণ কৰাৰ লগতে বিভিন্ন বিষয়ক লৈ সৰৱ হৈ পৰিছে। ফলত নগাঁও কেন্দ্ৰিক ৰাজনীতি ক্ৰমাৎ অধিক আকৰ্ষণীয় হৈ উঠিছে। এফালে বিজেপিৰ প্ৰাৰ্থী দেৱাশীষ শৰ্মাই জনপ্ৰিয় শিল্পী জুবিন গাৰ্গৰ গান গাই নিৰ্বাচনী প্ৰচাৰত অংশ লোৱাৰ বিষয়টোৱে চৰ্চা লাভ কৰিছে। আনফালে কংগ্ৰেছ সাংসদ ৰকিবুল হুছেইনে হিন্দী ছবিৰ সংলাপৰ ধাঁচত বিজেপিক কটাক্ষ কৰি নিৰ্বাচনী সভাত ৰসিকতাপূৰ্ণ মন্তব্য আগবঢ়াইছে।
‘ৰাহুল গান্ধী প্ৰধানমন্ত্ৰী হ’ব’
নিৰ্বাচনী সভাত ৰকিবুল হুছেইনে বিজেপিক আক্ৰমণ কৰি কয় যে ২০২৭ চনত ৰাহুল গান্ধী দেশৰ প্ৰধানমন্ত্ৰী হ’ব। তেওঁ হিন্দী ছবিৰ জনপ্ৰিয় সংলাপৰ ধাঁচত বিজেপিক উদ্দেশ্য কৰি কয়—‘ৰাহুল গান্ধী প্ৰধানমন্ত্ৰী হোৱাৰ পাছত… বহুত পছতাওগে ঠাকুৰ, তুঝে য়াড ৰখুংগা।’ অৰ্থাৎ, কংগ্ৰেছৰ নেতা হিচাপে ৰকিবুল হুছেইনে আগন্তুক সময়ত কেন্দ্ৰত ৰাজনৈতিক পৰিৱৰ্তন হ’ব বুলি দাবী কৰি বিজেপিক সতৰ্ক কৰি দিয়ে।
‘কেৱল জুবিনৰ গান গালেই ন্যায় নাপায়’
ইপিনে দেৱাশীষ শৰ্মাই নিৰ্বাচনী প্ৰচাৰত জুবিন গাৰ্গৰ গান গোৱাৰ বিষয়টোক লৈ বদৰুদ্দিন আজমলে কটাক্ষৰে ভৰা মন্তব্য কৰা দেখা যায়। তেওঁ কয় যে কেৱল জুবিন গাৰ্গৰ গান গাই থাকিলেই জুবিন গাৰ্গে ন্যায় নাপায়। ‘জুবিন গাৰ্গক আমি ১০০ শতাংশই ন্যায় দিম।’ তেওঁ লগতে কয় যে সদনত জুবিনৰ গান গোৱা বা মছজিদলৈ যোৱা আৰু কলিমা পাঠ কৰাটোৱেই যথেষ্ট নহয়। ‘মছজিদত গ’লেই নহ’ব, লা ইলাহা কলিমা পাঠ কৰিলেই দেৱাশীষ শৰ্মাৰ সৈতে মই দোস্তী কৰিম।’ বুলিও মন্তব্য কৰে বদৰুদ্দিন আজমলে। তেওঁ লগতে নিৰ্বাচনৰ ফলাফল সন্দৰ্ভত কয়-‘৬ অক্টোবৰৰ দেখা যাব কোন কিমান পানীৰ মাছ।’
‘৯৯ শতাংশ ভোটত হাৰিব’
কেৱল বিজেপিৰ প্ৰাৰ্থীয়েই নহয়, ৰকিবুল হুছেইনকো কটাক্ষ কৰিছে বদৰুদ্দিন আজমলে। ৰকিবুল হুছেইন আগন্তুক সময়ত ক’লৈ যাব, সেই লৈ প্ৰশ্ন উত্থাপন কৰি আজমলে কয় যে-এইবাৰ ধুবুৰীতো ৰকিবুলৰ স্থান নাই। আজমলৰ দাবী, যদি ৰকিবুল হুছেইনে ধুবুৰীত তেওঁৰ বিৰুদ্ধে এইমুহূৰ্ততো নিৰ্বাচন খেলে তেন্তে ৯৯ শতাংশ ভোটত পৰাজিত হ’লহেঁতেন।
সংখ্যালঘু ভোটক লৈও ৰাজনৈতিক চৰ্চা
ইয়াৰ মাজতে সংখ্যালঘু ভোটক লৈও বিভিন্ন ধৰণৰ ৰাজনৈতিক মন্তব্য আৰু প্ৰতিক্ৰিয়া প্ৰকাশ পাইছে। একাংশ সংখ্যালঘু লোকে বিজেপিৰ পতাকা লৈ বিজেপিয়ে তেওঁলোকৰ কোনো ক্ষতি কৰা নাই বুলি মন্তব্য কৰাৰ বিপৰীতে কংগ্ৰেছে তেওঁলোকক প্ৰতাৰণা কৰা বুলি অভিযোগ কৰা দেখা গৈছে। এই মন্তব্যসমূহে নগাঁও উপ-নিৰ্বাচনত সংখ্যালঘু ভোটৰ গুৰুত্ব আৰু বিভিন্ন ৰাজনৈতিক দলৰ মাজত সেই ভোটক লৈ চলি থকা প্ৰচাৰৰ বিষয়টোও পুনৰ চৰ্চালৈ আনিছে।
সামগ্ৰিকভাৱে, নগাঁও লোকসভা উপ-নিৰ্বাচনৰ প্ৰচাৰ ক্ৰমাৎ অধিক তীব্ৰ হৈ পৰিছে। গান, চলচ্চিত্ৰৰ সংলাপ, ব্যক্তিগত কটাক্ষৰ পৰা আৰম্ভ কৰি ৰাষ্ট্ৰীয় ৰাজনীতি আৰু সংখ্যালঘু ভোটৰ প্ৰসংগলৈ—বিভিন্ন বিষয় এতিয়া নিৰ্বাচনী মঞ্চত চৰ্চাৰ কেন্দ্ৰবিন্দু হৈ পৰিছে। এতিয়া নিৰ্বাচনৰ দিন আগবঢ়াৰ লগে লগে এই বাকযুদ্ধ আৰু কিমান তীব্ৰ হয়, সেয়া লক্ষণীয় হ’ব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
