পশ্চিমবংগ বিধানসভা নিৰ্বাচনত বিজেপিৰ নজিৰবিহীন জয়ৰ পাছত উচ্ছ্বাসত ভাহিছে গেৰুৱা শিবিৰ৷ সেই সময়তেই ধুতি পাঞ্জাৱী পৰিধান কৰি বাঙালী বাবুৰ সাজেৰে দিল্লীৰ বিজেপি সদৰ দপ্তৰত উপস্থিত হৈছে প্ৰধানমন্ত্ৰী নৰেন্দ্ৰ মোদী৷ তাৰপৰাই দেশবাসীক উদ্দেশ্যি ভাষণ ৰাখিছে প্ৰধানমন্ত্ৰী মোদীয়ে৷
সামাজিক মাধ্যমত প্ৰধানমন্ত্ৰী মোদীয়ে লিখিছে, ‘২০২৬ চনৰ পশ্চিমবংগ বিধানসভা নিৰ্বাচন চিৰস্মৰণীয় হৈ থাকিব৷ জনগণৰ শক্তিৰ জয় হৈছে আৰু সুশাসনৰ ৰাজনীতি জয়ী হৈছে৷ মই বংগৰ প্ৰতিজন মানুহকে মোৰ প্ৰণাম জনাইছো৷’
প্ৰধানমন্ত্ৰীয়ে লগতে আশ্বাস দিছে, ‘বিজেপিয়ে এনে এক চৰকাৰ গঢ়িব যিয়ে সকলো শ্ৰেণীৰ মানুহৰ সুযোগ, মৰ্যাদা আৰু উন্নয়ন নিশ্চিত কৰিব৷ জনগণৰ এই অভূতপূৰ্ব ৰায়ক সন্মান জনাই ৰাজ্যৰ মানুহৰ সপোনপূৰণৰ সৰ্বোচ্চ চেষ্টা কৰাৰ কথাও কৈছে প্ৰধানমন্ত্ৰী মোদীয়ে৷’
ইফালে অমিত শ্বাহে পশ্চিমবংগৰ মানুহক কোটি কোটি প্ৰণাম জনাই এই ৰায়ক ভয়, তোষণ আৰু অনুপ্ৰৱেশকাৰীসকলৰ সমৰ্থকসকলৰ বিৰুদ্ধে ধৰাল জবাব বুলি অভিহিত কৰিছে৷ তেওঁৰ দাবী, এই জয় প্ৰধানমন্ত্ৰী মোদীৰ প্ৰতি মানুহৰ আস্থা আৰু বিশ্বাসৰ প্ৰতিফলন৷
শ্বাহে কয়, ‘গংগোত্ৰীৰ পৰা গংগাসাগৰ পৰ্যন্ত আজি সৰ্বত্ৰ বিজেপিৰ পতাকা উৰিছে৷ এই সাফল্য দলৰ অসংখ্য কৰ্মীৰ ত্যাগ, সংগ্ৰাম আৰু আত্মবলিদানৰ ফল বুলিও উল্লেখ কৰিছে তেওঁ৷ হিংসা আৰু প্ৰতিকূলতাৰ মাজতো যিয়ে দলক সামৰি ৰাখিছে তেওঁলোকৰ প্ৰতি কৃতজ্ঞতা জনাইছে কেন্দ্ৰীয় গৃহমন্ত্ৰীগৰাকীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
