নাছাৰ ১.৪ টন ওজনৰ নীল গেৰেলছ ছুইফট অবজাৰভেটৰি ধীৰে ধীৰে পৃথিৱীৰ বায়ুমণ্ডলৰ দিশে নামি আহিছে। মহাকাশ বিজ্ঞানীৰ এই বিষয়ক লৈ বাঢ়িছে দুশ্চিন্তা। যদি দ্ৰুতভাৱে ব্যৱস্থা লোৱা নহয় তেন্তে এই মহাকাশ টেলিস্কোপ আগন্তুক কেইবা বছৰৰ ভিতৰতেই পুৰি ছাই হৈ যাব। এতিয়াই সেই টেলিস্কোপক সেয়ে উচ্চতৰ কক্ষপথলৈ ঠেলি দিয়াৰো চেষ্টা আৰম্ভ কৰিছে বিজ্ঞানীয়ে।
ছুইফট অৱজাৰভেটৰি কি
২০০৪ চনত উৎক্ষেপিত ছুইফট টেলিস্কোপ মূলত গামা ৰে বাৰ্ষ্ট চিনাক্ত কৰাৰ বাবে ডিজাইন কৰা হৈছিল। গামা ৰে বিস্ফোৰণ হৈছে মহাবিশ্বৰ সকলোতকৈ শক্তিশালী বিস্ফোৰণ। টেলিস্কোপটোৱে দ্ৰুততৰভাৱে ঘূৰি এই ঘটনাসমূহক গামা ৰে, এক্স ৰে, অতিবেঙুনীয়া আৰু দৃশ্যমান পোহৰৰ তৰংগ দৈৰ্ঘ্য ৰেকৰ্ড কৰে। আৰু পৃথিৱীত থকা বিজ্ঞানীসকলক তাৎক্ষণিক তথ্য পঠিয়াই। ইয়াৰোপৰি ছুইফট ব্লেক হোল, নিউট্ৰণ তৰা, ছুপাৰনোভা আৰু নানান উচ্চশক্তিৰ মহাজাগতিক ঘটনাৰ ওপৰত নজৰ ৰাখে এই টেলিস্কোপে। বৰ্তমান এই টেলিস্কোপটো পৃথিৱীৰ পৰা প্ৰায় ৫৮৫ কিঃমিঃ উচ্চতাৰ নিম্ন কক্ষপথত অৱস্থান কৰি আছে। বায়ুমণ্ডলৰ টানৰ কাৰণে সেয়া ক্ৰমে তললৈ নামিবলৈ ধৰিছে।
নাছাৰ হিচাপ অনুসৰি যদি কোনো পদক্ষেপ গ্ৰহণ কৰা নহয় তেন্তে ২০২৬ চনৰ শেষত টেলিস্কোপটোৱে পৃথিৱীৰ বায়ুমণ্ডলত প্ৰৱেশ কৰাৰ ৯০ শতাংশ সম্ভাৱনা আছে। আৰু প্ৰৱেশ কৰিলেই পুৰি ছাই হোৱাৰো পূৰ্ণ সম্ভাৱনা আছে। এই বিশেষ টেলিস্কোপটোৰ দামো প্ৰায় ৫০০ মিলিয়ন ডলাৰ আৰু মহাকাশ বিজ্ঞানত এই টেলিস্কোপটোৰ অৱদানো অপৰিসীম। সেয়ে নাছাই টেলিস্কোপটোক বচাবৰ বাবে নাছা এৰিজোনা ভিত্তিক কোম্পানী কেটলিষ্ট স্পেছ টেকনোলজিছক দায়িত্ব দিছে। বিশেষ কোম্পানীটোৱে অচিৰেই এখন মহাকাশযান পঠিয়াই ছুইফটক ধৰি উচ্চতৰ কক্ষপথলৈ ঠেলি পঠিয়াব।
এই কামৰ বাবে নাছা কেটলিষ্টে ৩০ মিলিয়ন ডলাৰৰ চুক্তিও কৰিছে। ২০২৬ চনৰ মে মাহত এই ডকিং আৰু কক্ষপথৰ ঠেলি পঠিওৱাৰ মিছন আৰম্ভ হব। এইসমূহ সমস্যাৰ মাজতেই চীনে উন্নত কক্ষপথত ছেটেলাইট ঘূৰা ফুৰাৰ পদ্ধতি পৰীক্ষা কৰিছে। যাৰ বাবে ৱাছিংটন কিছু চিন্তিতও হৈছে। তেওঁলোকৰ মতে এই প্ৰযুক্তিৰে মহাকাশ প্ৰতিৰক্ষাৰ ওপৰিও আক্ৰমণাত্মক কামতো ব্যৱহাৰ হব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
