অষ্ট্ৰেলিয়াৰ মেলবৰ্ণত বিমানবন্দৰত সমস্যাত পৰিছে জনপ্ৰিয় দক্ষিণী অভিনেত্ৰী নব্যা নায়াৰ৷ খোঁপাত ফুল গুজি বেগতো মালা কঢ়িয়াই নিয়া সংস্কাৰী অভিনেত্ৰীক কিয় বিমানবন্দৰত আটক কৰা হল সেই বিষয়ক লৈ উঠিছে বহু প্ৰশ্ন৷ অষ্ট্ৰেলিয়াৰ কাঢ়া বায়ো ছিকিউৰিটি আইন ভংগ কৰাৰ বাবে অভিনেত্ৰীক জৰিমনা হিচাপে বিহা হ’ল ১.১৪ লাখ টকা৷
ঘটনা কি?
দক্ষিণী সংস্কৃতিত খোঁপাত বা চুলিত মালা লগোৱাৰ প্ৰথা আছে৷ যিকোনো অনুষ্ঠান বাদেই আনকি দৈনন্দিন জীৱনতো তেওঁলোকে খোঁপাত মালা লগাই৷ মালায়ালম অভিনেত্ৰী নব্যা নায়াৰেও অষ্ট্ৰেলিয়াৰ ওনম উৎসৱত চামিল হ’ব৷ যি ভিক্টোৰিয়া মালায়ালি সংগঠনৰ পক্ষৰ পৰা আয়োজন কৰা হৈছিল৷ মেলবৰ্ণ বিমানবন্দৰৰ অধিকাৰীসকলে তেওঁলোকৰ বেগত তালাচি চলাই ১৫ ছেণ্টিমিটাৰ দীঘল ফুলৰ মালা লাভ কৰে৷ মেলবৰ্ণৰ এক ইভেণ্টলৈ গৈ নব্যাই সমগ্ৰ ঘটনা সন্দৰ্ভত বাখ্যা কৰিছে৷
কিয় বিহা হ’ল জৰিমনা?
নব্যাই কৈছে, তেওঁৰ পিতৃয়ে এই ফুলৰ মালা ক্ৰয় কৰিছিল আৰু অভিনেত্ৰীগৰাকীক যাত্ৰাৰ সময়ত খোঁপাত লগাবৰ বাবে দিছিল৷ আধাখিনি তেওঁ খোঁপাত লগাই বাকিখিনি বেগত থৈছিল৷ নব্যাই ভুল স্বীকাৰ কৰি কয় যে তেওঁ এই কাম কৰা উচিত নাছিল৷ কিন্তু নব্যাই পূৰ্বে এনে আইন থকাৰ কথা জনাও নাছিল৷ মেলবৰ্ণৰ বিমানবন্দৰৰ কাঢ়া আইন তেওঁ মানিবই লাগিব৷ ২৮ দিনৰ ভিতৰত সেয়ে তেওঁ এই জৰিমনা দিব লাগিব৷
বায়ো ছিকিউৰিটি আইন কি?
অষ্ট্ৰেলিয়াই তেওঁলোকৰ কৃষি আৰু পৰিবেশ ৰক্ষাৰ বাবে অত্যন্ত কঠোৰ জৈৱ নিৰাপত্তা আইন তৈয়াৰ কৰিছে৷ তাত তাজা ফুল, গছপাত, বীজ আৰু মাটিৰ দৰে সামগ্ৰী নিষিদ্ধ কৰিছে৷ কাৰণ ইয়াৰ মাধ্যমেৰে দেশত কীটপতংগ আৰু ৰোগ বিয়পি পৰিব পাৰে৷ সেয়ে ফুলৰ মালাৰ দৰে সামগ্ৰী তাত লৈ যোৱাটো অপৰাধ৷ এই মালাৰ বাবেই তেওঁক মোটা জৰিমনা বিহা হ’ল৷
অষ্ট্ৰেলিয়ালৈ কি কি লৈ যাব নোৱাৰিব?
অষ্ট্ৰেলিয়াৰ চৰকাৰৰ ৱেবচাইটত উল্লেখ থকা অনুসৰি যাত্ৰীসকলে অৱতৰণৰ সময়ত নিজৰ ইনকামিং পেছেঞ্জাৰ এৰাইভেল কাৰ্ডত এইসমূহ ঘোষণাও কৰে৷ ইয়াৰ মাজত আছে সকলোধৰণৰ খাদ্য, গছপাত, পশুপ্ৰাণী সংক্ৰান্তীয় সামগ্ৰী, ১০ হাজাৰ অষ্ট্ৰেলিয়ান ডলাৰ বা অন্য কোনো বিদেশী মুদ্ৰা তথা কিছু ঔষধ অনৰ্ভুক্ত আছে৷ যদি কোনো যাত্ৰীয়ে তেওঁৰ বেগত কি কি আছে পৰীক্ষা নকৰে তেন্তে তেওঁক জৰিমনা বিহা হ’ব৷
নব্যা নায়াৰ কোন?
উল্লেখ্য যে ২০০১ চনত চিবি মালায়িল পৰিচালিত ‘ইষ্টাম’ৰে অভিনয়ত আত্মপ্ৰকাশ কৰিছিল নব্যাই৷ ইয়াৰপাছতেই এটাৰ পাছত আনখন হিট ছবিত অভিনয় কৰে তেওঁ৷ দক্ষিণৰ তেওঁ এতিয়া এগৰাকী প্ৰভাৱশালী অভিনেত্ৰী৷ নন্দনম, কাল্যণাৰামন, গ্ৰামোফোন, দৃশ্য, ওৰুথি তেওঁৰ অভিনীত ছবিৰ তালিকাত আছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
