অসম লাইভ২৪ঃ এক দশকৰ অন্তত একদলীয় শাসনৰ ইতি পৰাৰ দিশে। দেশত ১০ বছৰৰ পাছত অন্ত পৰিব একদলীয় শাসন। অষ্টদশ লোকসভাত ইণ্ডিয়া জোঁটেও দেখুৱাই দিলে নভৱা মেজিক। অৱশ্যে তৃতীয়বাৰৰ বাবে নৰেন্দ্ৰ মোদীয়েই দেশৰ শাসনভাৰ হাতত তুলি লোৱাটোও প্ৰায় নিশ্চিত হৈ পৰিছে। ভোটগণনাৰ প্ৰৱণতাই দাবী কৰিছে যে ২০১৪ চন আৰু ২০১৯ চনৰ তুলনাত এইবাৰ বিজেপিৰ আসন বহু পৰিমানে কমি আহিল।
৪০০ আসন লাভেৰে সংখ্যাগৰিষ্ঠ দল হৈ চৰকাৰ গঠন কৰাৰ পৰিকল্পনা কৰা পদ্মশিৱিৰৰ আঢ়ৈশ আসন লাভো অসম্ভৱ হৈ পৰিছে। ৫৪৫ আসনৰ(দুখন মনোনীত আসনসহ) লোকসভাত সংখ্যাগৰিষ্ঠতা লাভৰ বাবে ২৭৩ খন আসন লাভ কৰাটো জৰুৰী। চলি থকা কাউণ্টিঙত বৰ্তমানলৈকে বিজেপিয়ে ২৪১খন আসনত আগবাঢ়ি আছে। তাৰ বিপৰীতে ইণ্ডিয়া জোঁট আগবাঢ়ি আছে ২৩০খন আসনত।
এনডিএ জোঁটৰ এইবাৰৰ যুঁজ অৱশ্যে বৰ এটা সহজো নহয়। বিজেপিয়ে একক সংখ্যাগৰিষ্ঠতাৰে কোনো কাৰণতে চৰকাৰ গঠন কৰা সম্ভৱ নহয়। চৰকাৰ গঠন কৰিবৰ বাবে বিজেপি বা এনডিএৰ দুই ব্যক্তি চন্দ্ৰবাবু নায়ডুৰ তেলেগু দেশম পাৰ্টী আৰু নীতীশ কুমাৰৰ জেডিইউৰ ওপৰত ভৰসা কৰিব লগা হব পাৰে মোদীৰ দলে।
এইখিনিতে উল্লেখ কৰা প্ৰয়োজন যে এই দুই দলৰ নেতাই পূৰ্বতেও কেইবাবাৰো বিজেপি দল এৰি আকৌ সেই দললৈ প্ৰত্যাবৰ্তন কৰিছে। দেশৰ ইতিহাসত মোদীয়েই দ্বিতীয় প্ৰধানমন্ত্ৰী যিয়ে তিনিবাৰ লেথাৰিকৈ ক্ষমতা দখলৰ দিশে। কিন্তু এইক্ষেত্ৰত মোদীয়ে জৱাহৰলাল নেহৰুৰ ইতিহাস ভংগ কৰিব নোৱাৰিলে। নেহৰুৱে একক সংখ্যাগৰিষ্ঠতাৰে তিনিবাৰ ক্ষমতা দখল কৰিছিল। মোদীয়েও সেই ৰেকৰ্ড ভংগৰ আশাৰেই বাৰে বাৰে এককভাৱে বিজেপিয়ে ৩৭০ আসনত জয়ী হব বুলি দাবী কৰি আহিছিল।
বিৰোধী দলনেতাৰ পদৰ বাবে লোকসভাত ৫৫খন আসনত জয়ী হোৱাটো প্ৰয়োজন। কিন্তু ২০১৪ চনত ৪৪খন আৰু ২০১৯চনত ৫২খন আসন জয় কৰা কংগ্ৰেছে সংসদীয় বিধি অনুসৰি সেই মৰ্যদা লাভ কৰা নাছিল। এইবাৰ সেই দিন নাই। কংগ্ৰেছে অকলেই ৯৯খন আসনত আগবাঢ়ি আছে।
যদি সমগ্ৰ ইণ্ডিয়া জোঁটলৈ চোৱা যায় তেন্তে আটাইকেইটা দলে মিলি প্ৰায় ২৩০ আসনত আগবাঢ়ি আছে। এইবাৰ লোকসভা অধিবেশনত এইবাৰ বিৰোধীৰ কাঢ়া নজৰৰ সন্মুখীন হৈ থাকিব শাসক দল। এবছৰ পূৰ্বে কংগ্ৰেছ, তৃণমূল, বাওঁমৰ্চা সহ কেইবাটাও আঞ্চলিক শক্তিৰ যৌথমঞ্চ ইণ্ডিয়ান নেশ্ব্যনেল ডেভেলপমেণ্টেল ইনক্লুছিভ এলায়েন্স গঠন হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
