অসম লাইভ ২৪ঃ এগৰাকী প্ৰতাৰক বাবা। ৫ গৰাকী পত্নী থকাৰ পাছতো অসংখ্য যুৱতীৰ সৈতে বাবাৰ প্ৰেমৰ সম্পৰ্ক। অৱশেষত কানপুৰত আৰক্ষীৰ জালত পৰিল এইগৰাকী ভুৱা বাবা। ৫ গৰাকী পত্নী থকাৰ পাছতো ৩২ গৰাকী যুৱতীৰ সৈতে বাবাই চলাই নিছিল প্ৰেমৰ সম্পৰ্ক। ষষ্ঠ বিবাহৰ বাবে বাবাই প্ৰস্তুতি চলাওতে বিবাহৰ পূৰ্বেই আৰক্ষীৰ জালত পৰে বাবা। ধৃত বাবাৰ প্ৰকৃত নাম অনুজ চেতন কঠেৰিয়া। উত্তৰ প্ৰদেশৰ চাহজাহানপুৰত বাবাৰ ঘৰ। বাবাই shaadi.com ত নিজকে শিক্ষক, ব্যৱসায়ী, তান্ত্ৰিক, মৌলবী আদি বিভিন্ন ভুৱা পৰিচয়েৰে যুৱতীসকলক প্ৰেম নিবেদন কৰে। আৰক্ষীৰ ভাষ্য অনুসৰি, চাহজাহানপুৰত বাবাই ‘মা কামাখ্যা বঞ্জাৰে বাবা কল্যান সেৱা ট্ৰাষ্ট’ নামেৰে এটা ট্ৰাষ্ট গঠন কৰি বছৰ বছৰ ধৰি মহিলাসকলক প্ৰৱঞ্চনা কৰি আহিছে। কানপুৰ থানাত আটাইকেইগৰাকী পত্নীয়ে এজাহাৰ দাখিল কৰিছে প্ৰতাৰক স্বামীৰ বিৰুদ্ধে। পত্নীৰ এজাহাৰৰ ভিত্তিত গোচৰ ৰুজু কৰি কানপুৰ আৰক্ষীয়ে গ্ৰেপ্তাৰ কৰিছে অনুজ চেতন কেঠেৰিয়াক। বাবাৰ বিৰুদ্ধে বলাৎকাৰৰ অভিযোগ উত্থাপন হৈছে। ২০১৬ চনত নিজৰ ভাইবোৱাৰীক বলাৎকাৰ কৰি গ্ৰেপ্তাৰ হৈছিল বাবা। মেট্ৰিম’নিয়েল ৱেবচাইত shaadi.com ত লাকী পাণ্ডে নামেৰে প্ৰফাইল তৈয়াৰ কৰিছিল অনুজ চেতন কঠেৰিয়াই। উল্লেখ্য, অভিযুক্ত অনুজ কঠেৰিয়াই প্ৰথমে ২০০৫ চনত মনিপুৰৰ এগৰাকী যুৱতীৰ সৈতে বিয়াত বহিছিল। প্ৰথমা পত্নীৰ সৈতে বিবাহ বিচ্ছেদৰ প্ৰক্ৰিয়া আদালতত বৰ্তমান বিচাৰাধীন হৈ আছে। ২০১০ চনত ব্যক্তিগৰাকীয়ে দ্বিতীয় বিবাহ আৰু ২০১৪ চনত তৃতীয় বিবাহ সম্পন্ন কৰে। চতুৰ্থ বিবাহ সম্পন্ন কৰে তৃতীয়া পত্নীৰ সম্পৰ্কীয় ভনীয়েকৰ সৈতে। স্বামীৰ প্ৰকৃত সত্য পোহৰলৈ অহাত আত্মহত্যা কৰে চতুৰ্থ পত্নীয়ে। ২০১৯ চনত পঞ্চম বিবাহ সম্পন্ন কৰে অভিযুক্ত অনুজ চেতন কঠেৰিয়াই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
