অমিক্ৰণৰ প্ৰাদুৰ্ভাৱৰ পাছতে ভাৰতত অধিক শোচনীয় হৈছে কোভিড পৰিস্থিতি৷ দৈনিক লাখ লাখ লোক আক্ৰান্ত হৈছে কোভিডত৷ বিগত ২৪ ঘণ্টাত দেশত কোভিডত আক্ৰান্ত হৈছে ২,৮৬,৩৮৪ জন লোক৷ মৃত্যু হৈছে ৫৭৩ গৰাকী কোভিড ৰোগীৰ৷
বৰ্তমানলৈকে ৪.১ কোটি লোক আক্ৰান্ত হোৱাৰ তথ্য প্ৰকাশ কৰিছে কেন্দ্ৰীয় স্বাস্থ্য মন্ত্ৰালয়ে৷ দৈনিক পজিটিভিটী ৰেট বৃদ্ধি পাইছে ১৯.৫৯ % লৈ৷ একেসময়তে দিল্লীত বুধবাৰৰ দিনটোত ৭,৪৯৮ নতুন কোভিড আক্ৰান্ত চিনাক্ত হৈছে৷ একেদৰে মুম্বাইত চিনাক্ত হৈছে ১,৮৪৮ টা কোভিড সংক্ৰমণৰ ঘটনা৷
চৰকাৰী তথ্য অনুসৰি, অসমতো ১,৯৫১ জন লোক কোভিডত আক্ৰান্ত হৈছে বিগত ২৪ ঘণ্টাত৷ সৰ্বাধিক ৪২২ জন আক্ৰান্ত হৈছে কামৰূপ মহানগৰত৷ পুনৰ দেশজুৰি জাৰি কৰা হৈছে কোভিডৰ নতুন নীতি-নিৰ্দেশনা৷ দেশৰ শেহতীয়া কোভিড পৰিস্থিতিৰ প্ৰতি লক্ষ্য ৰাখি বিদ্যালয়সমূহত পুনৰ পাঠদান বন্ধ কৰি দিয়া হৈছে৷ উল্লেখ্য, ইতিমধ্যে ১৬৩ কোটি ভেকচিন ড’জ প্ৰদান কৰা হৈছে ভাৰতত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
