অসম লাইভ২৪ঃ ‘ডলাৰৰ তুলনাত ভাৰতীয় টকাৰ মূল্য হ্ৰাস হোৱা নাই। কোনে কয় ভাৰতীয় অৰ্থনীতি দূৰ্বল হৈছে?’ সমগ্ৰতে ভাৰতীয় অৰ্থনীতি তললৈ নামিছে বুলি আলোচনা চলাৰ মাজতেই ভাৰতীয় টকাৰ মূল্য হ্ৰাস হোৱা নাই বুলি মন্তব্য কৰিছে বিত্তমন্ত্ৰী নিৰ্মলা সীতাৰমনে। বিত্তমন্ত্ৰীগৰাকীৰ মতে বিশ্বৰ অন্যান্য দেশৰ তুলনাত ভাৰতৰ স্থান ওপৰত। কেৱল আন্তৰ্জাতিক বজাৰত ডলাৰহে শক্তিশালী হৈছে টকাৰ মূল্য কমা নাই।
আমেৰিকা ভ্ৰমণৰ বাবে যোৱা বিত্তমন্ত্ৰীগৰাকীয়ে ওৱাছিংটনৰ এখন সংবাদমেলত টকাৰ মুল্য হ্ৰাসকলৈ কৰিছে এই মন্তব্য। বিত্তমন্ত্ৰী নিৰ্মলা সীতাৰমনে কয়, ‘টকাৰ মূল্য হ্ৰাস হোৱা নাই। মাৰ্কিন ডলাৰহে শক্তিশালী হৈছে। বিশ্বৰ অন্যান্য দেশৰ মুদ্ৰাৰ মূল্যও হ্ৰাস হৈছে। ভাৰতীয় ৰিজাৰ্ভ বেংকে টকাৰ মূল্য হ্ৰাসৰ দিশটোক লৈ পৰ্যালোচনা কৰি আছে।
উল্লেখ্য যে, খাৰুৱা তেলৰ দামবৃদ্ধি, বিদেশী বিনিয়োগৰ অভাৱ আদি বহুকেইটা কাৰণত টকাৰ মূল্য হ্ৰাস হৈছে বুলি অৰ্থনীতিবিদসকলে প্ৰকাশ কৰিছে। বিগত সপ্তাহত ডলাৰৰ তুলনাত টকাৰ মূল্য ৮২ টকালৈ নামি আহিছে। বিশেষজ্ঞসকলে প্ৰকাশ কৰা মতে চলিত বছৰতেই ডলাৰৰ তুলনাত টকাৰ মূল্য ১০.৬ শতাংশলৈ নামি আহিছে। ৰিজাৰ্ভ বেংকে প্ৰকাশ কৰা অনুযায়ী ২০১৪ চনৰ ৩১ ডিচেম্বৰত প্ৰতি এক ডলাৰৰ বিপৰীতে ভাৰতীয় টকাৰ মূল্য আছিল ৬৩টকা ৩৩ পইছা। আনহাতে ২০১৮ চনৰ ৩১ ডিচেম্বৰত প্ৰতি ১ ডলাৰৰ বিপৰীতে টকাৰ মূল্য আছিল ৬৯ টকা ৭৯ পইছা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
