অসম লাইভ ২৪ঃ ৰাষ্ট্ৰীয় নাগৰিকপঞ্জীক লৈ বিভিন্ন প্ৰতিক্ৰিয়াশীল চক্ৰই শেহতীয়াকৈ আৰম্ভ কৰা কুচ-কাৱাজৰ আঁৰত ভয়ানক ষড়যন্ত্ৰ লুকাই আছে বুলি আজি গুৰুতৰ অভিযোগ তুলিছে নাগৰিকত্ব আইন সংশোধনবিৰোধী মঞ্চই। নাগৰিকপঞ্জীখন সম্পূৰ্ণ ‘ভ্ৰান্ত’ আৰু ‘পক্ষপাতদুষ্ট’ বুলি অপযশ দি কিছুমান মহলে তাক সম্পূৰ্ণ বাতিল কৰোৱাৰ অথবা সংশোধনৰ নামত উধৰ পৰা মূধলৈকে সলাই পেলোৱাৰ এক চক্ৰান্ত কৰিছে বুলি মঞ্চই অভিযোগ তুলিছে। নাগৰিকত্ব আইন সংশোধনবিৰোধী মঞ্চই এই সম্পৰ্কে অসমৰ জনগণক সকীয়াই দিয়াৰ লগতে এনে চক্ৰান্ত ব্যৰ্থ কৰিবলৈ আহ্বান জনাইছে।
নাগৰিকত্ব আইন সংশোধনবিৰোধী মঞ্চৰ হৈ আজি প্ৰকাশ কৰা এটা বিবৃতিত মঞ্চৰ অধ্যক্ষ ড০ হীৰেন গোহাঁই আৰু আহ্বায়ক মনজিৎ মহন্তই কয় যে মঞ্চই যুক্তিৰ আধাৰত বিশ্বাস কৰে যে ইমান বিশাল এক কৰ্মত কিছু ভুল-ত্ৰুটি ৰৈ যোৱা তেনেই স্বাভাৱিক। সেইখিনি যথাবিধি শুধৰোৱাটো অতি দৰকাৰ। কিন্তু নাগৰিকপঞ্জীখন সেই অজুহাততে সম্পূৰ্ণৰূপে নাকচ কৰাৰ অৰ্থ হ’ব অসমখনক এক এক ভীষণ অনিশ্চয়তা আৰু নৈৰাজ্যলৈ ঠেলি দিয়া, য’ত অসম আৰু অসমীয়াৰ ভৱিষ্যৎ বুলি আৰু একো নাথাকিবগৈ। উন্মাদ সাম্প্ৰদায়িকতাই প্ৰতিপত্তি বিস্তাৰ কৰিব। তাৰ সুযোগ লৈ অপশক্তিবোৰে অসমৰ নানা জাতি-জনগোষ্ঠীৰ মাজত যৎসামান্য বৰ্তি থকা ঐক্য-সম্প্ৰীতি চিৰকাললৈ বিলোপ কৰিব। সেয়ে নাগৰিকত্ব আইন সংশোধনবিৰোধী মঞ্চই অসমৰ দেশপ্ৰেমী জনতাৰ প্ৰতি এই আহ্বান জনাইছে, যাতে সন্মিলিত শক্তি আৰু উদ্যমেৰে এই পৰিকল্পিত অপপ্ৰচাৰ আৰু চক্ৰান্তক ৰাইজে প্ৰতিৰোধ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
