বাংলাদেশে নিজকে নিৰপেক্ষ দেশ বুলি যিমানেই আস্ফালন নকৰক কিয়, সাম্প্ৰতিক সময়ত বাস্তৱত কিন্তু নিৰপেক্ষতাৰ কোনো লক্ষণ দেশখনে দেখুৱাব পৰা নাই। মুছলিম বসতিপ্ৰধান চুবুৰীয়া দেশখনত প্ৰায়ে হিন্দু লোকসকলে বিভিন্ন নিৰ্যাতন, ভাবুকিৰ সন্মুখীন হৈ অহাৰ খবৰে সংবাদ শিৰোনাম দখল কৰি আহিছে। পুনৰ আন এক এনে ঘটনা সংঘটিত হৈছে দেশখনত। বাংলাদেশৰ গাইবান্ধাত নিৰ্মীয়মান ৮২ ফুট উচ্চতাৰ এক বিশাল ৰাম মূৰ্তিৰ প্ৰকল্প দেশখনৰ কাট্টৰপন্থী সংগঠনসমূহৰ তীব্ৰ বিৰোধিতাৰ বাবে স্থগিত ৰখিবলৈ বাধ্য হৈছে। গাইবন্ধাস্থিত শ্ৰী শ্ৰী ৰাধা গোবিন্দ আৰু কালী মন্দিৰ প্ৰাংগনত এই মূৰ্তি নিৰ্মাণৰ কাম চলি আছিল। মন্দিৰ পৰিচালনা সমিতিয়ে জনোৱা অনুসৰি সাম্প্ৰদায়িক সম্প্ৰীতি অটুট ৰাখিবলৈ সাময়িকভাৱে কাম বন্ধ ৰখা হৈছে শ্ৰীৰামৰ বিশাল প্ৰতিমূৰ্তি। সাম্প্ৰদায়িক সম্প্ৰীতি অটুট ৰখাৰ পৰোক্ষ অৰ্থই হৈছে কাট্টৰপন্থী সংগঠনসমূহৰ প্ৰচণ্ড আপত্তি আৰু হেঁচা।
শ্ৰীৰামৰ প্ৰতিমূৰ্তি নিৰ্মাণৰ বাবে প্ৰয়োজন হোৱা বিত্তীয় উৎস ৰাজহুৱা কৰাৰো দাবী
এই সংগঠনসমূহে কেৱল প্ৰকল্পৰ কাম বন্ধ কৰাই নহয়, যিমানখিনিলৈ শ্ৰীৰামৰ প্ৰতিমূৰ্তিটো নিৰ্মাণ কৰা হৈছে সেইখিনিও ভাঙি পেলোৱাৰ দাবী উত্থাপন কৰিছে। ইমাম-উলমা পৰিষদে প্ৰকল্পটো সম্পূৰ্ণৰূপে নিঃচিহ্ন কৰাৰ লগতে ভৱিষ্যতে এনে কোনো উদ্যোগ গ্ৰহণ নকৰিবলৈ আহ্বান জনাইছে। কেৱল এয়াই নহয় সংগঠনটোৱে এই প্ৰকল্পটোৰ বিত্তীয় উৎসও ৰাজহুৱা কৰাৰ দাবী কৰাৰ লগতে এই সন্দৰ্ভত তদন্তৰো দাবী কৰিছে। কেৱল ইমাম-উলমা পৰিষদেই নহয়, আন কেইবাটাও সংগঠনে প্ৰকল্পটোৰ পুঁজি সংগ্ৰহৰ উৎস সন্দৰ্ভত দাবী জনাইছে যে এই প্ৰতিমূৰ্তিৰ বাবে প্ৰয়োজনীয় ধন ক’ৰ পৰা আহিছে সেই সন্দৰ্ভত চৰকাৰে তদন্ত কৰিব লাগে যাতে সেয়া কোনো বিদেশী চৰকাৰ বা সংগঠনৰ পৰা অহা নাই। এই দাবীয়ে পৰোক্ষভাৱে ভাৰতৰ প্ৰতিয়েই যে আঙুলি তুলিছে তাত কোনো সন্দেহ নাই। প্ৰকল্পটোৰ সৈতে জড়িত ব্যক্তিসকলৰ বেংক একাউণ্ট আৰু সম্পত্তিৰো তদন্ত বিচাৰিছে। এই সংগঠনসমূহৰ মতে এই প্ৰকল্পই বাংলাদেশৰ সাৰ্বভৌমত্বৰ ওপৰত প্ৰভাৱ পেলাব পাৰে।
২০২৫ৰ পৰা আৰম্ভ হৈছিল শ্ৰীৰামৰ প্ৰতিমূৰ্তিৰ নিৰ্মাণ
শ্ৰী শ্ৰী ৰাধা গোবিন্দ আৰু কালী মন্দিৰ পৰিচালনা সমিতিয়ে এই সন্দৰ্ভত স্পষ্ট কৰে যে ব্যক্তিগত পুঁজিৰে ২০২৫ চনৰ আৰম্ভণিতে এই মূৰ্তি নিৰ্মাণৰ কাম আৰম্ভ হৈছিল। মন্দিৰ চৌহদত ইতিমধ্যে ১০০ৰো অধিক দেৱ-দেৱীৰ মূৰ্তি আছে। ইয়াৰ ভিতৰত ৩০ ফুট উচ্চতাৰ শিৱ মূৰ্তি আৰু ৫৩ ফুট উচ্চতাৰ কৃষ্ণ মূৰ্তিও অন্তৰ্ভুক্ত। শ্ৰীৰামৰ মূৰ্তিটোক এছিয়াৰ ভিতৰতে সৰ্ববৃহৎ শ্ৰীৰাম মূৰ্তি হিচাপে গঢ়ি তোলাৰ পৰিকল্পনা কৰা হৈছিল। এই বৃহৎ প্ৰকল্পটোৰ বাবে বাংলাদেশী টাকাৰ মূল্যত ১৭ কোটি টাকাতকৈ অধিক ব্যয় হোৱাৰ সম্ভাৱনা আছিল।
বাংলাদেশত পূৰ্বেও বন্ধ হৈছিল হিন্দু ধৰ্মীয় বিভিন্ন প্ৰকল্প
বাংলাদেশে নিজকে নিৰপেক্ষ বুলি যিমানে ঢাক-ঢোল নবজাওক কিয় বিগত দুবছৰৰ বিভিন্ন কাৰ্যকলাপে এই দাবীক সম্পূৰ্ণৰূপে নস্যাৎ কৰে। বিগত দুবছৰত বাংলাদেশত হিন্দু ধৰ্মীয় আস্থা আৰু পৰম্পৰাৰ সৈতে জড়িত আন দুটা প্ৰকল্পয়ো তীব্ৰ বিৰোধিতা আৰু ভাবুকিৰ সন্মুখীন হৈছিল। ২০২৫ চনত কাট্টৰপন্থী গোটসমূহৰ আপত্তিৰ পিছত ঢাকাৰ এটা দুৰ্গা মন্দিৰৰ নিৰ্মীয়মান আন্তঃগাঁথনি ভাঙি পেলাবলৈ বাধ্য হৈছিল। আনহাতে, ২০২৪ চনত ঢাকাৰ উত্তৰা অঞ্চলত দুৰ্গা পূজাৰ বাবে স্থাপন কৰিবলগীয়া মূৰ্তিৰ স্থান বিৰোধিতাৰ ফলত সলনি কৰিব লগা হৈছিল।
সংখ্যালঘু সম্প্ৰদায়ৰ ওপৰত বিভিন্ন সময়ত আক্ৰমণৰ অভিযোগ
বাংলাদেশৰ হিন্দু-বৌদ্ধ-খ্ৰীষ্টিয়ান ঐক্য পৰিষদৰ তথ্য অনুসৰি, ২০২৪ চনৰ আগষ্টত শ্বেখ হাছিনা চৰকাৰৰ পতনৰ পিছৰে পৰা দেশখনত হিন্দুসহ বিভিন্ন সংখ্যালঘু সম্প্ৰদায়ৰ ওপৰত ২,৮৩৯টা আক্ৰমণৰ ঘটনা সংঘটিত হৈছে। সংগঠনটোৰ তথ্য মতে, ২০২৪ চনৰ ৪ আগষ্টৰ পৰা ২০ আগষ্টৰ ভিতৰত ২,০১০টা ঘটনা সংঘটিত হৈছিল। ২০২৫ চনত ৫২২টা আৰু ২০২৬ চনৰ প্ৰথম তিনিমাহত ১৩৩টা এনে ঘটনা নথিভুক্ত হৈছে। এই ঘটনাসমূহৰ ভিতৰত ১০০ৰো অধিক হত্যাকাণ্ড, যৌন হিংসা, গৃহ তথা ব্যৱসায়িক প্ৰতিষ্ঠানত আক্ৰমণ, মন্দিৰ আৰু মূৰ্তি ভাঙি পেলোৱা, লুটপাত, অগ্নিসংযোগ আৰু ভূমি দখলৰ দৰে অভিযোগ অন্তৰ্ভুক্ত আছে। আপাতত শ্বেখ হাছিনাক প্ৰধানমন্ত্ৰীৰ আসনৰ পৰা আঁতৰোৱাৰ পিছৰে পৰা দেশখনত এনেধৰণৰ কাৰ্যকলাপ দ্ৰুত হাৰত বৃদ্ধি পাইছে
বিভিন্ন তথ্যৰ পৰা সংগৃহীত এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
