বলীউডৰ ইতিহাসত বহু জনপ্ৰিয় গীত আছে যিয়ে একো একোগৰাকী কণ্ঠশিল্পীৰ জীৱন সলনি কৰি দিছে। তেনে এটা গীত হৈছে ১৯৮৮ চনত মুক্তিপ্ৰাপ্ত ‘কায়ামট চে কায়ামট টক’ ছবিখনৰ ‘পাপা কহতে হ্যায়…’ শীৰ্ষক ছুপাৰ হিট গীতটো। আপোনালোকে সকলোৱে নিশ্চয় জানে যে গীতটোত কণ্ঠদান কৰিছিল উদিত নাৰায়ণে। এই গীতটোৱে উদিত নাৰায়ণৰ কেৰিয়াৰত নতুন অধ্যায়ৰ সূচনা কৰিছিল। কিন্তু আশ্চৰ্যজনকভাৱে, এই গীতটো প্ৰথমে উদিত নাৰায়ণৰ সলনি অন্য এগৰাকী কণ্ঠশিল্পীৰ বাবেহে লিখা হৈছিল। সেই কণ্ঠশিল্পীগৰাকী হৈছে সুৰেশ ৱাডেকাৰ। আনকি এই গানটোৰ বাবে অনুশীলনো কৰিছিল সুৰেশ ৱাডেকাৰে। এই ছবিখন নায়ক হিচাপে মিষ্টাৰ পাৰফেক্টছনিষ্ট আমীৰ খানৰ প্ৰথমখন ছবি। ইয়াৰ পূৰ্বে আমীৰ খানে ১৯৭৩ত মুক্তিপ্ৰাপ্ত ‘য়াদো কি বাৰাট’ত শিশু শিল্পী হিচাপে ভূমুকি মাৰিছিল। ছবিখনৰ নায়িকাৰ ভূমিকাত অভিনয় কৰিছিল জুহি চাওলাই। ছবিখন পৰিচালনা কৰিছিল মনছুৰ খানে।
এতিয়াও গানটোৰ কথা স্মৰণ কৰে সুৰেশ ৱাডেকাৰে
‘কায়ামট চে কায়ামট টক’ ছবিখনৰ সেই বিখ্যাত গানটোৰ কথা সুঁৱৰি সুৰেশ ৱাডেকাৰে এটা সাক্ষাৎকাৰত কয় যে, ‘১৯৯২-৯৩ চনৰ পিছত যিবোৰ জনপ্ৰিয় গীত আহিল, তাৰ ভিতৰত পাপা কহতে হ্যায়… শীৰ্ষক গানটো আছিল অন্যতম। আচলতে সেই গীতটো প্ৰথমে মই গোৱাৰ কথা আছিল। ছবিখনৰ সকলো গীত মই গাম বুলি ঠিক হৈছিল। কিন্তু সেই সময়ত মোৰ ব্যস্ত সূচীৰ বাবে গানকেইটা হোৱাৰ সুযোগ হেৰুৱালো। সেই সময়ত মই আমেৰিকাত সংগীতানুষ্ঠান কৰিবলৈ গৈছিলোঁ। উভতি আহি ৰেকৰ্ডিং কৰাৰ কথা আছিল।’ তেওঁ লগতে কয় যে ‘মই যেতিয়া উভতি আহিলোঁ, তেতিয়া দেখিলোঁ যে গীতটো ইতিমধ্যে উদিত নাৰায়ণৰ কণ্ঠত ৰেকৰ্ড হৈ গৈছে আৰু নতুন অভিনেতা আমীৰ খানৰ ওপৰত চিত্ৰায়িত হৈছে। আৰম্ভণিতে ডাবিঙৰ বাবে হয়তো উদিতে গীতটোৰ কিছু অংশ গাইছিল। আমীৰ খানৰ সৈতে উদিতৰ কণ্ঠ ইমানেই সুন্দৰভাৱে মিলি গৈছিল যে নিৰ্মাতাসকলেও উদিতৰ কণ্ঠটোকে ৰখাৰ সিদ্ধান্ত লয়।’ প্ৰবীণ কণ্ঠশিল্পীগৰাকীয়ে লগতে আৰু কয় যে, ‘সংগীত পৰিচালক আনন্দ-মিলিন্দক পিছত ময়েই কৈছিলো যে নতুন অভিনেতা, নতুন কণ্ঠ। দুয়োৰে যুটি খুব ভাল লাগিছে। উদিতে গানটো সুন্দৰভাৱে গাইছে। এই গীতটো তেনেকৈয়ে থাকক।’ এই সিদ্ধান্তই উদিত নাৰায়ণৰ জীৱনত এক ডাঙৰ পৰিৱৰ্তন আনে। ‘পাপা কহতে হ্যায়…’ৰ সাফল্যৰ পিছত তেওঁৰ কণ্ঠ ধীৰে ধীৰে আমীৰ খানৰ ছবিসমূহৰ বাবে একপ্ৰকাৰ বাধ্যতামূলক হৈ পৰিল। পিছলৈ বহু ছবিত আমীৰ খানৰ বাবে উদিত নাৰায়ণে গান গায় আৰু দুয়োৰে যুটি দৰ্শকৰ মাজত অত্যন্ত জনপ্ৰিয় হয়। সুৰেশ ৱাডেকাৰৰ মতে, যদি ‘পাপা কহতে হ্যায়…’ তেওঁ গাব পাৰিলেহেঁতেন, তেন্তে সেই গীতটো তেওঁৰ কেৰিয়াৰৰো এক ডাঙৰ মাইলষ্টোন হৈ পৰিলেহেঁতেন। কিন্তু ভাগ্যই যেন আন কিবাহে লিখি ৰাখিছিল। সেই সুযোগ উদিত নাৰায়ণৰ কাষলৈ গ’ল আৰু সেয়াই তেওঁক বলীউডৰ শীৰ্ষস্থানীয় গায়কসকলৰ মাজৰ এজন কৰিলে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
