অসম লাইভ২৪ঃ গাজাত এটাৰ পাছত আনটো ৰকেট আক্ৰমণ ইজৰাইলৰ। চাৰিওফালে ধ্বংসৰ ছবি। তাছপাতৰ দৰে খহি পৰিছে কেইবামহলীয়া অট্টালিকা। এই অট্টালিকাৰ তলত চেপা খায়েই মৃত্যু হৈছে বহুলোকৰ। প্ৰাণ ৰক্ষা কৰিবলৈ গাজা এৰি নিৰাপদ আশ্ৰয় বিচাৰি গাজা এৰিছে স্থানীয়লোকসকলে। আহতসকলক ধ্বংসস্তুপৰ তলৰ পৰা উদ্ধাৰ কৰিছে একাংশ উদ্ধাৰকাৰী দলে। উদ্ধাৰকাৰী দলে ১৩ মহলীয়া এটা অট্টালিকাৰ তলৰ পৰা জীৱন্তে উদ্ধাৰ কৰিবলৈ সক্ষম হৈছে এটি শিশুক।
কংক্ৰীটৰ তলৰ পৰা শিশুটিক জীৱন্তে উদ্ধাৰ কৰি আচৰিতো হৈছে উদ্ধাৰকাৰী দল। এগৰাকী মহিলাৰ নিথৰ দেহৰ কাষতেই জীৱন্ত অৱস্থাত লাভ কৰিছে শিশুটিক। মৃত মাতৃৰ দেহৰ পৰা স্তন্যপান কৰি আছিল শিশুটিয়ে। এই দৃশ্য দেখি উদ্ধাৰকাৰী দলৰ বহুতেই কান্দিও পেলাইছে। হামাছৰ আক্ৰমণত ইজৰাইলত ১৩০০ জনতকৈয়ো অধিক লোকে প্ৰাণ হেৰুৱাইছিল। আহত হৈছিল কেইবাশ ব্যক্তি। অন্যহাতে ইজৰাইলে গাজাত চলোৱা আক্ৰমণত বৰ্তমানলৈকে ১৪০০তকৈয়ো অধিক লোকে প্ৰাণ হেৰুৱাইছে। প্ৰতিমুহূৰ্ততেই চলি আছে আক্ৰমণ। ইজৰাইলী বাহিনীয়ে পূৰ্ণগতিত যুদ্ধ অব্যাহত ৰখাৰ মাজতেই বহুতেই নিজৰ আত্মীয়ক বিচাৰি উদ্ধাৰ অভিযানো চলাই আছে। ১৩মহলীয়া ভঙা অট্টালিকাৰ তলত এমহীয়া শিশুটিক জীৱন্তে উদ্ধাৰ কৰি আচৰিত হৈ পৰিছে উদ্ধাৰকাৰী দলো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
