দাঁতৰ আলুৰ পৰা ৰক্তপাত, আলছাৰো কৰ্কটৰ লক্ষণ নেকি? ৫সংকেতে দেখা দিছে যদি আজিৰ পৰাই সাৱধান হওক

দাঁত ঘঁহাৰ সময়ত দাঁতৰ আলুৰ পৰা সামান্য ৰক্তপাত বা মুখগহ্বৰৰ ভিতৰত সৰু সৰু গুটি উঠিলে তাক বেছিভাগ মানুহেই সাধাৰণ সমস্যা বুলি উৰুৱাই দিয়ে৷ বিশেষকৈ যিসকলে নিয়মিত পানমছালা, গুটখা, চিগাৰেট বা চাধা জাতীয় দ্ৰব্য ব্যৱহাৰ কৰে তেওঁলোকে এই লক্ষণসমূহক মুঠেও গুৰুত্ব নিদিয়ে৷ কিন্তু চিকিৎসকে কৈছে যে এই সাধাৰণ অৱহেলাই মাতি আনিব পাৰে অকালমৃত্যু৷ দেশত ক্ৰমশ বাঢ়িছে অৰেল কেন্সাৰ বা মুখৰ কেন্সাৰ৷ প্ৰাথমিক স্তৰত ধৰা পৰিলে মুখৰ কেন্সাৰ সম্পূৰ্ণ নিৰাময় কৰা সম্ভৱ৷ সেয়ে চাধাজাতীয় দ্ৰব্য ব্যৱহাৰকাৰীসকলে মুখৰ ভিতৰত সৰু পৰিবৰ্তন আহিলেও অত্যন্ত সতৰ্ক থকাটো প্ৰয়োজন৷

অৰেল কেন্সাৰৰ লক্ষণসমূহ কি কি?

মুখৰ ভিতৰত কোনো ঘাঁ বা আলচাৰ যি দুসপ্তাহতকৈ বেছি সময় ধৰি যদি নাযায় তেতিয়া সতৰ্ক হোৱাটো প্ৰয়োজন৷

মুখৰ ভিতৰত, জিভা, দাঁতৰ আলুত বগা অথৱা ৰঙা ৰঙৰ গুটি দেখা পালে চিকিৎসকৰ পৰামৰ্শ লোৱাটো প্ৰয়োজন৷

খাদ্য চোবাই খাওঁতে বা গিলাত অসুবিধা হ’লে অৱহেলা নকৰিব৷

মুখৰ ভিতৰৰ কৰোবাত অস্বাভাৱিক ফোলাভাৱ, বা কোনো অংশ টান হৈ পৰিলে চিকিৎসকৰ পৰামৰ্শ গ্ৰহণ কৰা জৰুৰী৷

কোনো কাৰণ অবিহনেই দাঁতৰ মাজত ফাঁক বাঢ়ি যোৱাও স্বাভাৱিক নহয়৷

মুখত ভিতৰত বা ওঁঠত অৱশ ভাৱ বা অনবৰতে মুখত দুৰ্গন্ধ হলেও সাৱধান হোৱাটো প্ৰয়োজন৷

যিসকলে চিগাৰেট, বিড়ি, হুক্কা বা জৰ্দা আৰু চাধাজাতীয় দ্ৰব্য ব্যৱহাৰ কৰে তেতিয়া মুখত দুৰ্গন্ধ ওলোৱাটো খুবেই স্বাভাৱিক৷ কিন্তু ভালকৈ ব্ৰাছ কৰা বা মাউথ ৱাছ ব্যৱহাৰৰ পাছতো যদি অনবৰতে মুখত দুৰ্গন্ধ থাকে তেতিয়া সেয়া দাঁতৰ আলুৰ ৰোগ বা ইনফেকশ্ব্যন কিংবা অৰেল কেন্সাৰৰ প্ৰাথমিক লক্ষণ হ’ব পাৰে৷ দুৰ্গন্ধৰ সৈতে দাঁতৰ আলুৰ পৰা তেজ ওলালে অনতিপলমে চিকিৎসকৰ পৰামৰ্শ লোৱা উচিত৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ