দ্বিতীয় দিনাও ইণ্ডিগৰ বিমান পৰিসেৱা স্বাভাৱিক হোৱা নাই৷ বৃহস্পতিবাৰে দিনজুৰি মুঠ ৫৫০ খন বিমান বাতিল কৰিলে ইণ্ডিগ’ই৷ চলিত অব্যৱস্থাৰ বাবে বৃহস্পতিবাৰে নিশা যাত্ৰীসকলৰ ওচৰত ক্ষমাও বিচাৰিছে ইণ্ডিগ’ই৷ বৃহস্পতিবাৰে দিনে নিশাই দেশৰ বিভিন্ন বিমানবন্দৰত ইণ্ডিগ’ বিমান চলাচলত বিষম গাফিলতি দেখা গৈছে৷ ইণ্ডিগ’ৰ যাত্ৰীসকলৰ অভিযোগ যে যথাযথ খাদ্য আৰু আশ্ৰয় অবিহনেই ঘণ্টাৰ পাছত ঘণ্টা বিমানবন্দৰত অপেক্ষা কৰিছে তেওঁলোকে৷ কিন্তু ঠিক কোন সময়ত নিৰ্দিষ্ট গন্তব্যৰ বিমান এৰিব সেয়া এতিয়াও বিমানসংস্থাৰ তৰফৰ পৰা জনোৱা হোৱা নাই৷
হায়দৰাবাদৰ পৰা কলকাতা, দিল্লীৰ পৰা মুম্বাই-দেশৰ বিভিন্ন বিমানবন্দৰৰ টাৰ্মিনেলত যাত্ৰীসকলে বেগপত্ৰ, ছুটকেছ জমা কৰিছে৷ বহু যাত্ৰীয়ে বাধ্য হৈ টাৰ্মিনেলৰ ভিতৰত শুয়েই নিশা কটাইছে৷ বহুতেই খাদ্য আৰু পানীৰ বাবে হাহাকাৰ কৰি ক্ষোভো উজাৰিছে৷ বিমানসংস্থাৰ বিৰুদ্ধে শ্লোগানো উঠিছে বিভিন্ন বিমানবন্দৰত৷ এগৰাকী যাত্ৰীয়ে কয়, ‘আমি ১২ ঘণ্টা ধৰি অপেক্ষা কৰি আছো৷ প্ৰতিবাৰেই ইণ্ডিগ’ই কৈছে এক-দুইঘণ্টা পলম হব৷ তেওঁলোকৰ কৰ্মীসকলেও একো কব খোজা নাই৷’ যাত্ৰীসকলৰ একাংশৰ প্ৰশ্ন-বৰ্তমান পুৰণি যাত্ৰীসকলকলে যদি পঠিয়াব পৰা নাই আকৌ নতুনকৈ টিকট দি যাত্ৰীসকলক কিয় বিমানবন্দৰলৈ আনি থকা হৈছে?
বিভিন্ন সংবাদসংস্থাৰ প্ৰতিবেদন অনুসৰি বৃহস্পতিবাৰে ইণ্ডিগৰ বহু আন্তৰ্জাতিক বিমানো বাতিল কৰিছে৷ কেৱল দিল্লী বিমানবন্দৰতেই ১৭২ খন বিমান বাতিল কৰা হৈছে৷ মুম্বাই আৰু বাংগালুৰুত এই সংখ্যা ক্ৰমে ১০০ আৰু ৭৫৷ বৃহস্পতিবাৰে নিশা চাৰে ১১ বজাত সামাজিকমাধ্যমত এটা পোষ্ট কৰি ইণ্ডিগৰ এই খেলিমেলিৰ বাবে ক্ষমাও খুজিছে৷ সেই পোষ্টত তেওঁলোকে জনাইছে যে পৰিসেৱা স্বাভাৱিক কৰাৰ বাবে ইণ্ডিগই ভাৰতৰ বিমানবন্দৰ কৰ্তৃপক্ষ উৰাণ নিয়ন্ত্ৰক সংস্থা আৰু সংশ্লিষ্ট অন্যান্য সংস্থাসমূহে কাম কৰি আছে৷ সংবাদসংস্থা পিটিআইৰ সূত্ৰৰ উদ্ধৃতি দি জনাইছে যে দিল্লীসহ দেশৰ বিভিন্ন বিমানবন্দৰ মিলাই শুকুৰবাৰে ৪০০খন বিমান বাতিল কৰিছে ইণ্ডিগই৷
ইতিমধ্যেই পৰিস্থিতি মোকাবিলাৰ বাবে দেশৰ অসামৰিক বিমান পৰিবহন সংস্থাই কাম আৰম্ভ কৰিছে৷ বিমানমন্ত্ৰী ৰামমোহন নায়ডুয়ে সামগ্ৰিক পৰিস্থিতিক লৈ তেওঁৰ মন্ত্ৰণালয়ৰ অধিকাৰি আৰু ইণ্ডিগ কৰ্তাসকলৰ সৈতে কথা পাতিছে৷ ইণ্ডিগৰ তৰফৰ পৰা কেন্দ্ৰীয় মন্ত্ৰীক জনোৱা হৈছে যে তেওঁলোকৰ পৰিসেৱা সম্পূৰ্ণ স্বাভাৱিক কৰিবৰ বাবে ১০ ফেব্ৰুৱাৰী পৰ্যন্ত সময় লাগিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
