২২ বছৰৰ মূৰত পাকিস্তানৰ কৰিশ্মা, অষ্ট্ৰেলিয়াৰ দৰে দলক ঘৰুৱা খেলপথাৰতে পৰাস্ত
অষ্ট্ৰেলিয়াৰ দৰে শক্তিশালী দলক ঘৰুৱা খেলপথাৰতে পৰাস্ত কৰি ইতিহাস ৰচিলে পাকিস্তানে। ২২ বছৰৰৰ অন্তত এনে কৰিশ্মা কৰি দেখুৱালে ভাৰতৰ চীৰবৈৰী দেশখনৰ খেলুৱৈয়ে। তিনিখনীয়া খেল খনৰ ২খনত পাকিস্তানে বিজয় সাব্যস্ত কৰি শৃংখলা নিজৰ নামত কৰে।
নতুন অধিনায়ক আৰু প্ৰশিক্ষকৰ মাজত দোদুল্যমান হৈ থকা পাকিস্তানী ক্ৰিকেট দলৰ এনে বিজয়ে ইতিহাসৰ সৃষ্টি কৰাৰ লগতে সমগ্ৰ বিশ্বৰে দৃষ্টি আকৰ্ষণ কৰিছে।
মহম্মদ ৰিজৱানৰ দলটোৱে তৃতীয়খন এদিনীয়া খেলত অষ্ট্ৰেলিয়াক ৮ উইকেটত পৰাস্ত কৰে। আজি দেওবাৰে অনুষ্ঠিত হোৱা শৃংখলাৰ তৃতীয়খন খেলত অষ্ট্ৰেলিয়াই ৩১.৫ অভাৰত কেউটা উইকেট হেৰুৱাই ১৪০ ৰান কৰি অল আউট হোৱাৰ পিছত পাকিস্তানে ২৬.৪ অভাৰতে ২টা উইকেট হেৰুৱাই লক্ষ্যত উপনিত হয়।
শৃংখলাখনত পাকিস্তানৰ বিজয়ৰ মুল নায়ক হিচাপে এতিয়া সকলোৱে এই ৫ জন খেলুৱৈৰ নাম লৈছে-
১) হেৰিছ ৰাউফৰ বিস্ফোৰক বলিং-
হেৰিছ ৰাউফে অষ্ট্ৰেলিয়াৰ মাটিত একপ্ৰকাৰৰ যাঁদু বলিং কৰিছিল। ৩ মেচৰ শৃংখলাত হেৰিছ ৰাউফে ১০টা উইকেট দখল কৰে। ৰাউফক শৃংখলাখনৰ শ্ৰেষ্ঠ খেলুৱৈ হিচাপে নিৰ্বাচিত কৰা হয়। দ্বিতীয় আৰু তৃতীয় মেচতো হেৰিছ ৰাউফে প্লেয়াৰ অৱ দ্য মেচৰ বঁটা লাভ কৰে।
২) ৰিজৱানৰ শক্তিশালী বেটিং –
অষ্ট্ৰেলিয়া ভ্ৰমণৰ সময়ত পাকিস্তানী দলৰ অধিনায়কত্ব মহম্মদ ৰিজৱানৰ হাতত আছিল। এই উইকেটকীপাৰ বেটছমেনে ছিৰিজত ভাল বেটিং কৰাই নহয়, উজ্জ্বল অধিনায়কত্বও কৰে। ৰিজৱানে তিনিখন মেচত মাত্ৰ দুবাৰহে বেটিং কৰিছিল। প্ৰথমখন মেচত তেওঁ নিজৰ দলৰ হৈ সৰ্বাধিক ৪৪ ৰান সংগ্ৰহ কৰে। তৃতীয়খন এদিনীয়াত ২৭টা বলত ৩০ ৰান সংগ্ৰহ কৰি অপৰাজিত হৈ থাকে।
৩) আফ্ৰিদিৰ নিয়ন্ত্ৰিত বলিং-
হেৰিছ ৰাউফৰ সমানে সমানে সৰ্বোত্তম বলিং কৰিছিল শ্বাহীন শ্বাহ আফ্ৰিদিয়েও। বলাৰগৰাকীয়ে তিনিখন মেচত ৮টা উইকেট দখল কৰে। দ্বিতীয় আৰু তৃতীয় এদিনীয়াত পাকিস্তানে জয়লাভ কৰাৰ লগতে এই দুয়োখন খেলতে শ্বাহীন আফ্ৰিদীয়ে ৫-৫ উইকেট দখল কৰে।
৪) আয়ুবৰ সুন্দৰ ইনিংছ-
শক্তিশালী ইনিংছ খেলিছিল ছাইম আয়ুবেও। প্ৰথমখন ১ ৰান কৰি বিফল হলেও পাছৰ দুখন মেচত ক্ৰমে ৮২ আৰু ৪২ ৰান সংগ্ৰহ কৰে।
৫) প্ৰশিক্ষক জেছন গিলেস্পিৰ
অষ্ট্ৰেলিয়াৰ মাটিত পাকিস্তানৰ এই জয়ত এজন ব্যক্তিৰ নাম বিশেষ ভাৱে উল্লেখযোগ্য। তেখেত হৈছে পাকিস্তানী দলৰ প্ৰশিক্ষক জেছন গিলেস্পি। পাকিস্তানৰ জয়ত আটাইতকৈ গুৰুত্বপূৰ্ণ ভূমিকা পালন কৰিছিল দ্ৰুত বলাৰ কেইগৰাকীয়ে। পাকিস্তানৰ এই শক্তিকেই ভালদৰেই কাৰত খটুৱাইছে জেছনে গিলেস্পিয়ে। তেখেনো নিজৰ খেলৰ কেৰিয়াৰক বিধ্বংসী পেচাৰ আছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
