পাকিস্তানে প্ৰায়ে নকৰিবলগীয়া কামবোৰ কৰি সংবাদৰ শিৰোনাম দখল কৰি থাকে। পাকিস্তানলৈ পিতৃ-মাতৃৰ সৈতে ফুৰিবলৈ অহা এগৰাকী ৯ বছৰীয়া অষ্ট্ৰেলিয়ান কন্যাই পাকিস্তান আৰক্ষীৰ হাতত প্ৰাণ হেৰুৱাবলগীয়া হোৱাৰ এক দুখজনক ঘটনা সংঘটিত হৈছে। স্থানীয় পাকিস্তানী সংবাদ মাধ্যমৰ তথ্য অনুসৰি, অষ্ট্ৰেলিয়াৰ পাৰ্থৰ কেৱডেলৰ বাসিন্দা পাকিস্তান মূলৰ পৰিয়ালটোৱে পাকিস্তানৰ পাঞ্জাব প্ৰদেশৰ চকৱালত থকা আত্মীয়-স্বজনৰ ঘৰলৈ আহিছিল।
কেনেকৈ সংঘটিত হৈছিল ঘটনাটো
বুধবাৰে নিশা পৰিয়ালটোৱে এখন বাহনেৰে যাত্ৰা কৰি থকা সময়তে মটৰচাইকেল আৰোহী দুই দুৰ্বৃত্তই ডকা*ইতিৰে তেওঁলোকৰ গহনা আৰু ধন লুটি লৈ পলায়ন কৰে। এই সময়তে ঘটনাস্থলীত থকা এজন আৰক্ষী বিষয়াই এই সন্দেহজনক ঘটনাটো লক্ষ্য কৰে। ইতিমধ্যে মটৰচাইকেল আৰোহী দুৰ্বৃত্ত দুজনে ঘটনাস্থলীৰ পৰা পলায়ন কৰে। পাকিস্তানৰ পাঞ্জাব আৰক্ষীয়ে সদৰী কৰা তথ্য অনুসৰি ভুলবশতঃ ভুক্তভোগী পৰিয়ালটোৰ বাহনখনকেই ডকাইতৰ দলৰ বাহন বুলি ভাবি আৰক্ষীয়ে আক্ৰমণ কৰে। পাকিস্তান আৰক্ষীৰ আক্ৰমণত ৯ বছৰীয়া কন্যা শিশুটিৱে ঘটনাস্থলীতে প্ৰা*ণ হেৰুৱায়। এই ঘটনাত কন্যা শিশুটিৰ পিতৃ আৰু জ্যেষ্ঠ ভাতৃও গুৰুতৰভাৱে আহত হয়।
আৰক্ষী আৰু পৰিয়ালৰ বক্তব্যত মতভেদ
পাকিস্তানৰ পাঞ্জাব আৰক্ষীয়ে দাবী কৰা অনুসৰি ডকাইতি কৰা দুৰ্বৃত্ত দুজনে প্ৰথমে আৰক্ষীক আক্ৰমণ কৰিছিল যাৰ ফলত আৰক্ষী আৰু ডকাইত দুজনৰ মাজত সংঘৰ্ষ হৈছিল। কিন্তু ভুক্তভোগী কন্যা শিশুটিৰ পিতৃয়ে আৰক্ষীৰ এই দাবী নস্যাৎ কৰি কয় যে প্ৰথমে পাকিস্তান আৰক্ষীয়েই তেওঁলোকৰ ওপৰত নিৰ্বিচাৰভাৱে গু*লীচালনা কৰিছিল।
ঘটনাৰ পিছতে অষ্ট্ৰেলিয়াৰ প্ৰধানমন্ত্ৰীৰ প্ৰতিক্ৰিয়া
এই ঘটনাৰ খবৰ পোৱাৰ পিছতে ঘটনা সন্দৰ্ভত প্ৰতিক্ৰিয়া প্ৰকাশ কৰে অষ্ট্ৰেলিয়াৰ প্ৰধানমন্ত্ৰী এন্থনী এলবানিজে। এলবানিজে কয় যে-ঘটনাটোৰ সম্পূৰ্ণ স্বচ্ছ আৰু নিৰপেক্ষ তদন্ত হ’ব লাগিব, যাতে পৰিয়ালটোৱে আৰু জনসাধাৰণে প্ৰকৃত সত্য জানিব পাৰে। অষ্ট্ৰেলিয়াৰ বিদেশ মন্ত্ৰালয়ে ঘটনাটোৰ সত্যতা নিশ্চিত কৰি জানিবলৈ দিয়ে যে নি*হত কন্যা শিশুটিৰ পৰিয়াল আৰু দুৰ্ঘটনাত আহত অষ্ট্ৰেলিয়ান নাগৰিক দুজনক সকলোধৰণৰ চিকিৎসাৰ সহায় আগবঢ়োৱা হৈছে। অষ্ট্ৰেলিয়াৰ বিদেশ মন্ত্ৰালয়ে শোকসন্তপ্ত পৰিয়ালটোৰ প্ৰতি গভীৰ সমবেদনা প্ৰকাশ কৰিছে।
ঘটনাত জড়িত আৰক্ষী বিষয়াক গ্ৰেপ্তাৰ, তদন্ত আৰম্ভ
এই ঘটনাৰ পাছতে অভিযুক্ত আৰক্ষী বিষয়াজনক গ্ৰেপ্তাৰ কৰি তেওঁৰ বিৰুদ্ধে গোচৰ ৰুজু কৰা হৈছে। ঘটনাটোৰ তদন্তৰ বাবে এটা যৌথ তদন্তকাৰী দল গঠন কৰা হৈছে। আনহাতে তদন্তকাৰী দলটোৱে জনোৱা মতে, লুটপাটৰ ঘটনাত জড়িত দুই দুৰ্বৃত্তও ইতিমধ্যে আৰক্ষীৰ এন*কাউণ্টাৰত নি*হত হৈছে। এই ঘটনাৰ পিছতে পাকিস্তান আৰক্ষীৰ কৰ্মপদ্ধতি, অপৰাধ দমনত বলপ্ৰয়োগৰ নীতি আৰু সাধাৰণ নাগৰিকৰ মৃ*ত্যুৰ ক্ষেত্ৰত তদন্তৰ গাফিলতিৰ বাবে নতুনকৈ বিতৰ্কৰ মাজত সোমাই পৰিছে পাক আৰক্ষী। মানৱ অধিকাৰ সংগঠনসমূহেও দীৰ্ঘদিন ধৰি পাকিস্তান আৰক্ষীৰ জিম্মাত অপৰাধী নিৰ্যাতন আৰু ভুৱা এন*কাউণ্টাৰ সন্দৰ্ভত উদ্বেগ প্ৰকাশ কৰি আহিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
