আজিয়ে অন্তিম দিন, ভাৰত এৰিব লাগিব সকলো পাকিস্তানীয়ে, অন্যথা কঠোৰ এক্সন
আজি ২৭ এপ্ৰিল তাৰিখ ভাৰতত থকা পাকিস্তানী সকলৰ বাবে অন্তিমটো দিন। আজিৰ ভিতৰতে ভাৰতভূমি ত্যাগ কৰিব লাগিব সকলো পাকিস্তানীয়ে। আজি উকলিব ভাৰতৰ ভিছাৰ ম্যাদ। আজি ভাৰত ত্যাগ নকৰিলে প্ৰশাসনৰ ফালৰ পৰা লোৱা হব কঠোৰ এক্সন।
পেহেলগামত সংঘটিত সন্ত্ৰাসবাদী আক্ৰমণৰ পিছত ভাৰতে পাকিস্তানৰ বিৰুদ্ধে কঠোৰ স্থিতি গ্ৰহণ কৰিছে। ভাৰতে সিন্ধু জল সন্ধিৰ পৰা আঁতৰি যোৱাৰ লগতে পাকিস্তানী নাগৰিকৰ ভিছাও বাতিল কৰিছে। এনে পৰিস্থিতিত আজি ভাৰতলৈ অহা পাকিস্তানী নাগৰিকে দেশ এৰি যোৱাৰ অন্তিম দিন।
দৰাচলতে চিচিএছৰ বৈঠকৰ পাছত ভাৰত চৰকাৰে সিদ্ধান্ত লৈছিল যে ২৭ এপ্ৰিলৰ পৰা পাকিস্তানী নাগৰিকক প্ৰদান কৰা হ্ৰস্বম্যাদী ভিছা বাতিল বুলি গণ্য কৰা হ’ব। এই সময়সীমাৰ কথা মনত ৰাখি ৰাজ্য চৰকাৰসমূহে নিজৰ অঞ্চলত উপস্থিত পাকিস্তানীক বিচাৰি উলিয়াই ঘূৰাই পঠিয়াইছে।
ঠিক তেনেদৰে ভাৰতৰ কঠোৰ স্থিতিৰ পিছত এতিয়া পাকিস্তানত থকা ভাৰতীয়সকলো পাকিস্তানৰ পৰা ঘৰলৈ উভতি আহিছে। বিগত তিনিদিনত আটৰী-ৱাগাহ সীমান্তৰে নিজৰ দেশলৈ উভতি আহিছে ৪৫০ জনতকৈ অধিক ভাৰতীয়। পাকিস্তানত চলি থকা পি এছ এলত এটা সম্প্ৰচাৰ কোম্পানীত কৰ্মৰত প্ৰায় ২৩ জন ভাৰতীয়ও শনিবাৰে উভতি আহে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
