অসম লাইভ ২৪ঃ ভাৰতীয় ধ্ৰুপদী সংগীত শিল্পী পণ্ডিত যশৰাজৰ দেহাৱসান। সোমবাৰে আমেৰিকাৰ নিউ জার্চীত শেষ নিশ্বাস ত্যাগ কৰে পণ্ডিতগৰাকীয়ে। মৃত্যুৰ সময়ত তেওঁৰ বয়স হৈছিল ৯০ বছৰ। দীর্ঘদিন ধৰি বার্ধক্যজনিত নানা সমস্যাত ভুগি আহিছিল তেওঁ। শাস্ত্ৰীয় সংগীতৰ বাবে ভাৰতে পদ্ম বিভূষণ, পদ্মভূষণ, পদ্মশ্ৰী সন্মান আগবঢ়াইছিল যশৰাজলৈ। লাভ কৰিছিল বহু বিদেশী পুৰস্কাৰ আৰু সন্মানো। ১৯৩০ চনৰ জানুৱাৰীত হাৰিয়ানাৰ হিচাৰেত এটা ব্ৰাহ্মণ পৰিয়ালত জন্মগ্ৰহণ কৰিছিল যশৰাজে। যশৰাজৰ সৰুৰে পৰা আছিল শাস্ত্ৰীয় সংগীতৰ প্ৰতি ধাউতি। পিতৃ পণ্ডিত মতিৰামৰ পৰাই প্ৰথম শাস্ত্ৰীয় সংগীত শিকিছিল যশৰাজে। তেওঁৰ জ্যেষ্ঠ ভাতৃ পণ্ডিত প্ৰতাপ নাৰায়নো শাস্ত্ৰীয় সংগীতৰ এজন মহান শল্পী আছিল, যাৰ দুই পুত্ৰ যতীন-ললিত পৰৱর্তী সময়ত সংগীত পৰিচালক হিচাপে বলীউডত প্ৰভূত খ্যাতি অর্জন কৰিছিল। সমগ্ৰ বিশ্বত ভাৰতীয় শাস্ত্ৰীয় সংগীত বুলিলেই একেমুখে সকলোৱে লয় যশৰাজৰ নাম। উল্লেখযোগ্য যে বিগত বছৰত মার্কিন গৱেষণা সংস্থা ‘নাছা’ই এটা সৰু গ্ৰহৰ নামকৰণ কৰে পণ্ডিত যশৰাজৰ নামেৰে। প্ৰথম ভাৰতীয় সংগীতশিল্পী হিচাপে এই দুর্লভ সন্মান লাভ কৰে পণ্ডিত যশৰাজে। ৯০ বছৰৰ এই ক্লাছিকেল গায়কৰ নামেৰে গ্ৰহটিৰ নাম দিয়া হ’ল ‘পণ্ডিত যশৰাজ (৩০০১২৮)’। এই সৰু গ্ৰহটো ২০০৬ৰ ১১ নৱেম্বৰত আৱিষ্কাৰ কৰা হৈছিল। মঙল আৰু বৃহস্পতিৰ মাজত এটা গ্ৰহাণুপুঞ্জৰ মাজত এই গ্ৰহটোৰ অৱস্থান। সেই মহান শাস্ত্ৰীয় সংগীতৰ পণ্ডিতে চিৰকালৰ বাবে বিদায় ল’লে। শোকস্তব্ধ শিল্পী সমাজ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
